تعليم ابنك القراءة بطرق سهلة
كتير من الأمهات بتلاحظ وجود ضغف في القراءة عند أطفالهم، وده بيخليهم يعتقدوا أنهم أقل ذكاء من الاطفال اللي في سنهم، وبتظن أنه محتاج لمساعدة سواء كانت المساعدة دي نفسية أو سلوكية، وده اعتقاد غلط بالمرة.
وده لأني القراءة مش أمر فطري هيقدر يتعلمه الطفل بنفسه، لكن هي حاجة مكتسبة محتاجين ندرب أطفالنا عليها، وفي كوكب الاطفال هقولكم على طرق مش هتتوقعوها في تعليم الاطفال القراءة.
بعض الطرق الفعالة لتعليم طفلك القراءة
في طرق كتير ممكن تستخدميها في إنك تعلمي طفلك القراءة، لكن هنا اختارنا بعض الطرق السهلة منها:-
إبدئي بالصوتيات
وده هيكون إزاي؟، في كتب بتتباع في المكتبات ومتوفرة بشكل كبير للحروف الصوتيه، الكتب دي بيبقى مكتوب فيها الحروف على شكل زرار، لم بتضغطي على الزر بيتنطق الحرف اللي أنتي ضغطي عليه.
الطريقة دي واحدة من أسهل الطرق لتعليم الاطفال القراءة، وده لأنها بتجمع بين اللعب والتعليم، واللي بطبيعتها هتشد الطفل وتخليه يتعلم بسهولة.
عرفيهم على الكتب
وده بأنك تشتري كتب لقصص قصيرة بيكون فيها صور ملونة واشكال جذابه، وقدميها لطفلك وعرفيه عليها، هتلاقي بشكل تلقائي هيقلب في الكتاب وهينجذب لصفحة معينة، غالبا الصفحة دي بتكون الصفحة اللي فيها صورة لحيوان أو ألون جذابة.
طبعا الطفل لا يفقه سياسة البدء بالصفحة الأولى، وأن نتنتقل من صفحة لصفحة لحد ما نوصل لأخر صفحة في الكتاب، طبعا أنتي هتعلميه الموضوع ده، وده هيبقى من إنك تحكيله القصة بتاعت الكتاب، وأنتي وبتحكيله بتتنقلي بين صفحات الكتاب بناء على الحتة اللي بتحكيها.
واربطي بين الكلام وبين الصور اللي موجودة في الكتاب، كده طفلك هيربط بين الكلام اللي بتقوليه وبين الصورة اللي شافها وعجبته، كل الحاجات دي هتسهل عليكي أنه طفلك يتعلم القراءة.
اجعلي خيال طفلك واسع
لم تقرأي أي قصة من كتاب لابنك حاولي تساعديه في أنه يتخيل الحاجات اللي أنتي بتحكيها ليه، وده ممكن تعمليه بأنك تحكي الحدوته بصوت عالي، وتحاولي تعبري عن الكلام اللي بتحكيه بتعبيرات وشك وأيديك، ده هيخلي طفلك يفهم المشاعر اللي بتمثلها كل كلمة من الكلمات اللي بتقرأيها عليه، مع التدريب المستمر وبشكل تدريجي هيكون طفلك قادر على القراءة.
تطبيق أنشطة مونتيسوري مع الأطفال فى المنزل
اجمعي بين القراءة واللعب
ودي واحدة من الطرق القوية في تعليم الاطفال القراءة، واللي بتحاولي فيها تجمعي بين اللعب وبين تعليم طفلك القراءة، يعني مثلا هتقومي مثلا باستخدام عجينة اللعب في تشكيل حروف، وتطلبي من طفلك أنه يشاركك في اللعبة دي، واللي هتطلبي منه فيها أنه يقوم بتجميع حروف كلمة معينة أنتي هتطلبيها منه، أو أنه تكوني أنتي كلمة وتطلبي منه أن يقرأها، وتتبادلوا الأدوار، للعبة دي هتساعده كتير في تعليم القراءة.
اتركي الحروف تتكلم
وأمهات كتيير طبعا هتقول إزاي أخلى الحروف تتكلم، انا هقولك، يعني مثلا حاولي تعملي دمى صغيرة لكل حرف من الحروف الابجدية، وتشغيل أغنية للطفل بهذه الحروف، دي هتساعدك كتير في أنه طفلك يتعلم القراءة، وده لانه الطفل هيكون مثير ليه انه يشوف الدمى بتتكلم وتغني، وده هيخليه يحاول يتعرف ويقرأه كل حرف من خلال لعبة بالدمي.
خلي طفلك يشوفك انتي وبتقرأي الكتب
وده لانه الطفل بطبيعته بيقلد الكبار في كل تصرف، في إنه يشوفك أنتي بتقرأي كتاب ده هيخليه هو يعمل نفس الحاجة برضو، وهيقدر يفهم أن النشاط ده حاجة مهمه في روتينه اليومي.
أهم الطرق لتشجيع طفلك على القراءة
في حاجات كتير ممكن تتبعي منها اللي يناسبك وتحبيه في تعليم طفلك القراءة، واللي منها:-
- إنك تعرفي نوع القصص اللي طفلك بيحب يقرأها، وتحاولي كل يوم تقرأيها معاه، وتركزي على الجزء اللي بيحبه فيها وتكرريه على مسامعه، وما تكتفيش بقصة واحدة ممكن تقرأيها ليه في اليوم.
- شجعي طفلك في كل مرة يحاول أن يقرأ قصة، أو أنه ينطق كلمة بشكلها الصحيح، الحاجات دي هتساعدك كتير في إنك تعلمي ابنك القراءة.
- روحي مع ابنك المكتبة خليه هو يختار الكتاب اللي يحبه من قسم الاطفال، طبعا هو هيختار بشكل عشوائي بناء على الصور اللي ممكن تكون مرسومة على كتاب القصة، وده لأنه لسه ماوصلش لمرحلة الادراك لنوع القصص اللي بيحبها.
كده نكون قولنا على بعض أهم الطرق وأسهلها في تعليم الاطفال القراءة، واللي من أهمها إنك تشتريله كتاب صوتي، وإنك تستخدمي تعبيرات وشك وأيديكي أنتي وبتحكيله حدوته.
هستنى تعليقك بالموضوع، ورأيك فيه، وهنكون سعداء لو شركتينا بفكرة جديدة من خلال تجربتك مع ابنك.
كتبت: شيماء عبدالباقي
