كيف يمكن مساعدة الطفل على الحفظ الجيد ؟
العديد من الأطفال يعانون من مشكلة في حفظ دروسهم، وذلك نتيجة للأعباء الدراسية الكثيرة التي تُلقى على عاتقهم، مما يؤدي إلى تشتيت تركيزهم وانتباههم، والكثير من الأمهات يبحثن عن حل لهذه المشكلة
ولمكافحة التعب الذي يؤثر سلبًا على طفلك وتركيزه، سنقدم لك في “كوكب الأطفال” بعض الطرق البسيطة التي ستساعدك على تحسين قدرة طفلك على الحفظ.
حيل سهلة لمساعدة الطفل على الحفظ بشكل أسرع
في حيل كتير ممكن تستخدميها في إنك تساعدي طفلك على الحفظ واللي منها:-
اختيار الوقت المناسب للطفل
اختاري الوقت المناسب اللي طفلك يكون قادر على مذاكرة دروسه وحفظها، يعني مثلا بلاش تختاري الوقت اللي بيحب يعمل فيه حاجات بيحبها وتريح نفسيته، أو إنك تختاري وقت تذاكري ليه فيه يكون شغال فيه كرتون بيحب يتفرج عليه هيكون اختيار غير موفق ليكي، وده لأنه الحاجات دي بدورها هتساعد على تشتيت انتباهه، وبالتالي مش هيكون عنده قدرة على الحفظ.
الاستعانه بالألوان والرسم
ودي واحدة من الحيل السهلة لمساعدة الطفل على الحفظ اللي هتساعدك على إجابة سؤالك كيف أساعد طفلي على الحفظ، وده من خلال إنك ممكن تستعيني بالألوان ورسم الكلمات بشكل معين تساعد بشكل قوي في تعزيز التركيز عند طفلك، وبالتالي هيقدر يحفظ بشكل سريع.
التشجيع والمدح
ودي واحدة من أفضل الطرق المهمة لتدريب الأطفال على الحفظ بشكل سريع، وده بإنك تشجعيه على حفظ دروسه مقابل إنك تجيبله اللعبة اللي بيحبها، أو إنك تخرجيه في المكان اللي بيحبه في العطلة الاسبوعية، ودي هتديكي نتايج ممتازة في حفظ طفلك لدروسه بشكل سريع.
والحاجة اللي من المهم إنك تاخدي بالك منها إنك دايما حاولي تمدحي في طفلك قدام الناس، وعن اجتهاده في حفظ دروسه، وبلاش تستخدمي الأساليب اللي ممكن تعمل معاكي نتايج عكسيه، يعني مثلا بلاش تذميه لأنه بطئ في حفظ دروسه، وتوصفيه بأسوء الالفاظ زي أنه غبي، أو كسلان، خاصة لو كان قدام الناس، لأنه ده عمره ما هيكون حل، ده غير أنه هيأثر على نفسيته ويقلل من ثقته بنفسه، ده غير أنه هيكره المذاكره أصلا.
الابتعاد عن أسلوب التهديد
كتير من الأمهات بتلجأ لأسلوب الضرب والتهديد لو ابنها ما ذاكرش دروسه وحفظها بشكل سريع، وده أسلوب غلط بالمرة طبعا، لأن الأساليب دي بتعمل نتايج عكسية، وبتشتت تفكير وانتباه الطفل، وبدل ما أنه يحفظ بشكل سريع، مش بيحفظ أصلا لا بطئ ولا سريع.
التركيز على غذاء الطفل
ودي واحدة من الحاجات المهم إنك تعمليها واللي تعتبر وسيلة مهمة لمساعدة الطفل على الحفظ ، لأنه تركيزك على نوع الأكل اللي بتأكليه لابنك ليه دور كبير في أنه يحفظ دروسه بشكل سريع، علشان كده من المهم إنك تقدمي ليه وجبة متكاملة تحتوي على البروتين والنشويات وكل عنصر من العناصر المفيدة.
كمان حاولي تقدمي ليه الأطعمة اللي بتحتوي على عناصر بتساعد على تعزيز الذكاء عند طفلك زي السمك والسالمون واللي هيترتب عليها إنه طفلك يحفظ دروسه بشكل سريع.
التحضير المسبق للدرس
من المهم إنك تعودي طفلك إنه يحضر دروسه بشكل مسبق، وده مش هيكون أنه يحضره بشكل كامل، لأ هو مجرد هيلقي نظره عليه، ويتعرف على موضوع الدرس، وده علشان لم ياخده في الدرس أو المدرسة يكون مستعد لسؤال مدرسه الاسئلة الصعبة اللي معرفهاش اللي موجودة في الدرس، ده غير أنه التحضير بشكل مسبق هيساعده كتير في إنه يذاكر الدرس بكل سهولة بعد ماياخده في المدرسة.
تقسيم الدرس إلى أقسام صغيرة
وده لأنه هيساعده بشكل كبير في أنه يذاكر ويحفظ الدرس بطريقة سهلة، وده لأنه تقسيم المعلومة إلى شكل أصغر ليه دور كبير في حفظ المعلومة بشكل أسرع من المعلومات اللي بيتم تقديمها بشكل أكبر، ده غير إنه ممكن طفلك ينسى المعلومات بسهولة لو حفظ الدرس بشكل كامل وكبير.
- التكرار
ودي واحدة من الطرق اللي هتساعدك في تدريب الأطفال على الحفظ بشكل سريع، يعني مثلا لو هو عنده مشكلة في إنه يحفظ معلومة ما حاولي تكرريها على مسامعه أكتر من مرة، ودي طريقة فعالة في حفظ الدروس، وزي ما بيقول مثل شعبي التكرار بيعلم الشطار.
الحفظ عن طريق الكتابة
ودي واحدة من الطرق المهمة والسهلة، واللي تعتبر إجابة على سؤالك كيف اساعد طفلي على الحفظ، وده لأنه لم طفلك يقوم بكتابة المعلومة الصعبة بالنسبة ليه، هيقدر يحفظها بسهولة.
كده يكون تعرفنا مع بعض على الطرق المفيدة والسهلة في كيف اساعد طفلي على الحفظ، واللي منها اختيار الوقت المناسب للمذاكرة لطفلك، وعدم استخدام أساليب التهديد.
هنكون سعداء لو شاركتينا بتجربتك في الطرق اللي استخدمتيها في مساعدة الطفل على الحفظ
كتبت: شيماء عبدالباقي
