تعليم الاطفال الصلاة بالخطوات
دين الاسلام طلب مننا إن نربي أولادنا على التربية الحسنة، وكل ما هو جميل، وكمان نعلمهم على أهم العبادات الموجودة في دينا الاسلامي، واللي من أهمها الصلاة، واللي هي ركن من أركان الاسلام.
وقال رسولنا الكريم {مروا أولادكم بالصلاة وهم أبناء السبعة سنين، واضربوهم عليها، وهم أبناء عشر، وفرقوا بينهم في المضاجع}
دلوقتي هنتعرف مع بعض على كيفية تعليم الصلاة للاطفال.
خطوات تعليم الصلاة للأطفال
من المهم أننا نبدأ نأمر أطفالنا بالصلاة فى سن سبع سنين، زي ما الرسول صلى الله عليه وسلم أمرنا، طيب ازاى نبدأ معاهم خطوة بخطوة ؟
تعليم الوضوء
الوضوء ودي من الحاجات الضرورية اللي مهم إنك تعلميها لطفلك علشان يتعلم الصلاة، وأنه ما ينفعش نصلي من غير ما نكون على طهارة، وأنه الطهارة دي أو الوضوء بشكل وترتيب معين مش يتحصل بطريقة عشوائية، وفيها بتتوضي قدام طفلك وبتطلبي منه أنه يعمل زي ما أنتي بتعملي، مع التكرار هيحفظ ده ويعرفه لحد ما يوصل أنه يتوضى بنفسه صح.
وممكن بعد ما الطفل يتعلم الوضوء بالشكل الصحيح تكافئيه بأي حاجة بسيطة كنوع من زيادة ثقته بنفسه، وإنك تحببيه في الصلاة وإنه يتعلمها.
تعليمه النية
ودي أول خطوة بعد الوضوء بتعلميه فيها أنه في حاجة اسمها النية بنعملها قبل ما نصلي، وبتشريحها له بحيث يفهمها، يعني مثلا هتقوليله أنك لازم تخلي في قلبك وعقلك قبل ما تصلي إنك رايح في الوقت ده تصلي، وإني دي حاجة بنتقرب بيها من ربنا علشان يحبنا.
استقبال القبلة
ودي الحاجة التانية اللي من المهم إنك تعلميها لطفلك، وأنه ما ينفعش نصلي في أي اتجاه، وإنه في اتجاه اسمه القبله، وهو ده اتجاه الصلاه، وعلشان طفلك يعرف اتجاه القبلة في أي مكان لازم تعلميه الاتجاهات الاربعة كلها وأزاي بنحددها، وممكن تستعيني بأي فيديو من اليوتيوب يشرحلك إزاي تعلمي طفلك الاتجاهات.
التكبير وإقامة الصلاة
وهنا بتعلميه إنه يرفع إيده قبل ويخليها قصاد ودنه، مع توجيه باطن الكف للأمام، ويقول (الله أكبر)
إزاي بنبدأ الصلاة وما نعملش أي حاجة أو نبص في أي مكان أول ما تبدأ الصلاة، ونقف ثابتين وبنحط الايد اليمين فوق الشمال
تلاوة سورة الفاتحة
من الحاجات المهمة إني لم طفلك يبدأ يتعلم القراءة والكتابة تبدأي تعلميه سورة الفاتحة، والآيات القرآنية الصغيرة، واللي منها الفاتحة واللي هي ركن أساسي في الصلاة علشان تكون الصلاة صح.
ولم تعلمي ابنك الفاتحة في قت سابق من تعليمه للصلاة هيكون قادر على أنه يقرأها بشكل صح في الصلاة، واللي مهم تأخدي بالك منه أنك تصبري على ابنك في تعليمه الصلاة، وأنه مش هيعرفها بشكل كامل وصح من أول مرة، وإنه الموضوع هيحتاج تكرار.
الركوع
، وبعدين ينحني ويحط ايديه على ركبته، وده بيكون تعظيم لربنا سبحانه وتعالى، وإنه لم بنركع بنقول (سبحان ربي العظيم) ثلاث مرات.
والخطوة دي تعتبر من الخطوات الصعبة على الطفل، لانه فيها كذا حاجة هو بيتعلمها، علشان كده هتطلبي منه أنه يقلدك، وإنك هتكرري معاه الخطوة دي كذا مرة، لحد ما يتعلم، ومن المهم إنك تعلميه عدد الركعات كل صلاة، وإنها بتختلف من صلاة للتانية.
الرفع من الركوع
واللي بتعلمي فيها طفلك إنه في حاجات بنقولها بعد الرفع، زي إنه مثلا الامام بيقول جملة (سمع الله لمن حمده) ، والناس ترد وتقول (ربنا ولك الحمد).
السجود
ودي بتعلمي فيها طفلك أنه بنخلي الركبتين وكفة الايد مرتاحين ومسندوين على الأرض، ، وتكون الجبهة كمان مسنودة على الأرض ويكون ثابت مش بيتحرك، وأنه الأنف والجبهة بتكون ملامسة للأرض، ونقول (سبحان ربي الأعلى)، ثلاث مرات بصوت واطي، وأنه السجدة بتكون مرتين في كل ركعة.
التشهد
وتعتبر أكتر حاجة سهلة في تعليم الاطفال الصلاة، وده لأنه بالتكرار على مدار اليوم هيكون قادر أنه يحفظها بكل سهولة.
التسليم
ودي بتعلمي فيها الطفل إنه بعد ما يقرأ التشهد ويخلصه يبص ناحية اليمين ويقول (السلام عليكم ورحمة الله وبركاته)، وبعدين يبص ناحية الشمال وينقول نفس الجملة، ومن المهم إنك تلفتي نظر ابنك إنه يبص ناحية اليمين الأول وبعدين الشمال، وإنه ما ينفعش نعمل ده بطريقة عشوائية.
بعض الأخطاء يجب الانتباه لها أثناء تعليم الصلاة للأطفال
بسبب أنه الطفل بتكون ذاكرته ضعيفه في المرحلة دي وده بسبب عدم اكتمال نموه، هيتعرض لحاجات كتيير ممكن ينساها هو وبيتعلم الصلاة، وإنه في حاجات كتير ممكن يغلط فيها، هنا دورك كأم إنك تفكريه بالحاجات اللي ممكن ينساها، وتصححيله الحاجات اللي ممكن يغلط فيها، واللي منها:-
طفلي لا يصبر .. كيف يتعلم الاطفال الصبر؟
الصلاة بسرعة
وده لأنه الطفل مش بيكون مدرك لقيمة الصلاة ولا عارف فضلها، وأنها مجرد فرض جسمي لازم يعمله، فبيعمل ده في أسرع وقت ممكن، علشان كده من المهم إنك تكلميه عن فضل الصلاة، وإنه اللي بيصلي بيدخل الجنة ، وبالتدريج ابنك هيفهم قيمة الصلاة وهيعرف أهميتها وهيبدأ يصلي بتأني وخشوع.
الالتفات أثناء الصلاة
ودي واحدة من اهم الحاجات الغلط اللي ممكن طفلك يقع فيها، خصوصا في البداية، فممكن تلاقيه هو بيصلي فجأة كلم حد من أخواته الأصغر منه، أو إنه يبص على حد ماشي قدامه، وهنا لازم تفهميه إنه الحاجات دي ما ينفعش نعملها في الصلاة، وممكن تتغلبي على المشكلة دي بإنك تخصصي مكان محدد للصلاة بعيدا عن اللهو.
الجلوس فجأة
ممكن تلاقي طفلك فجأة قعد وهو بيصلي، وده لأنه بيعتقد إنه ممكن لو حس بالملل أو التعب يقعد عادي، وهنا دورك إنك تفهميه ما نفعش نقدم خطوة على التانية، أو أنه يقعد في أي وقت هو يحبه، ولكن من غير ما تخويفه أو تتبعي أسلوب الضرب.
كده نكون انتهينا من كيفية تعليم الاطفال الصلاة، واللي بدأناها مع بعض خطوة خطوة واللي كانت بدايتها إنك تعلميه الوضوء، وبتنتهي بقراءة التشهد والتسليم، وتعرفنا على أهم الغلطات اللي ممكن طفلك يقع فيها في الصلاة واللي منها أنه ممكن يقعد فجأة لم يحس بالتعب، أو انه يتكلم مع غيره في الصلاة.
هنكون سعداء أكتر لو شاركتينا بتجربتك في تعليم ابنك الصلاة.
تابع جميع موضوعات كوكب الأطفال فور نزولها على قناة تليجرام
كتبت: شيماء عبدالباقي
