تربية الطفل على الإعتراف بالخطأ وثقافة الإعتذار
بالطبع تجتهد كل أم في تربية أولادها بأحسن طريقة ممكنة .. حتى يصبحوا أسوياء، ويكونوا قادرين على التحديات التي تواجهم في الحياة، ولذلك تبدأ الأم بتقديم النصيحة لأولادها، وتعلمهم الأمور الصحيحة والأمور الخاطئة التي يقومون بها.
أحيانًا تُفاجأ الأم عندما تواجه طفلها بخطأه فينكره، وقد يكون ذلك لأسباب متعددة؛ إما لأنه لا يريد الاعتراف بخطئه، أو خوفًا من العقاب، أو لأنه مُدلل أكثر من اللازم. وفي جميع الحالات، أنتِ المسؤولة عن عدم اعتراف ابنك بخطئه. لذا، في كوكب الأطفال سنُرشدك إلى كيفية تشجيع طفلك على الاعتراف بخطئه.
كيف أعلم إبني ثقافة الإعتراف بالخطأ؟
من الحجات المهمة اللي ضروري تربي عليها ابنك أنه لازم يعترف بغلطه، وأنه الغلط اللي بيعمله لازم يصححه، وده علشان يدرك أنه الغلط ليه تمن ولازم يدفع ويحاول يتجنبها.
لكن في بعض الاطفال بتكون عنيده ومش بتعترف بالغلط ده، ودي ممكن تتصرفي معاها بطريقة من الطرق اللي هنتعرف عليها مع بعض دلوقتي واللي منها:-
خففي من عقابه إذا اعترف بخطأه
من الحاجات المهمة اللي هتخلي اعتراف الطفل بخطئه سهل إنك تخففي من العقاب اللي ممكن تعاقبيه بيه لو اعترفلك بالغلط، وده لأنه هيخلي طفلك يدرك إنه المصارحة والاعتراف بالغلط حاجة بتقلل من العقوبة بسبب مصارحته ليكي، لكن من المهم إنك ما تلغيش العقاب بشكل كامل، وده علشان ما يوصلش لطفلك إنه الاعتراف بالغلط وسيلة للهروب منه، ويبقى أسلوب حياة بالنسبة ليه.
بلاش تثوري عليه
يعني بلاش أول ما تشوفي ابنك عمل حاجة غلط تصرخي في وشه وتزعقيله، او إنك تلوميه بشكل قاسي وتحاولي تنتقديه، الحاجات دي كلها بتخلقي طفلك لم يعمل حاجة غلط بينكر ده ويلجأ للكدب علشان يهرب من العقاب، وممكن تتغلبي على المشكلة دي بأنك تستني شويه قبل ما تتكلمي مع ابنك وتواجهيه بغلطه، وده علشان تكوني هديتي وتقدري تتصرفي بشكل صح معاه.
يعني مثلا إنك تواجهيه بغلطه بطريقة لوم بناء، يعني لو كسر كوبايه، أسأليه عن رد فعله عن كسر الكوبايه، صح ولا غلط، ولو اعترف أسأليه إن كان ينفع تتصلح ولا لأ، الحاجات دي هتخليه يدرك إنه عمل حاجة غلط، وهتخليه يعترف بغلطه بسبب هدوئك معاه في الحوار.
بلاش تدلعيه بزيادة
ما تخليش كلامك لطفلك كله انتقاد للحاجات اللي بيعملها وتصرفاته، وبلاش كمان تدلعيه بزياده فأي حاجة غلط يعملها تهملي في عقابه بحجة إنه طفل وإنه اللي اتكسر يتصلح، حاولي توازني بين الأمور، وإنك تعلمي طفلك يعترف بغلطه، وده هيبدأ بإنك توجهيه في المرة الأولي اللي يغلط فيها وتعرفيه أنه ده غلط، وإنه لو عمله تاني هيتعاقب عليه.
والحاجة اللي من المهم إنك تأخدي بالك منها إنه مرحلة الطفولة هي مرحلة التأسيس من حياة أي طفل ولو اتعود على إنك تتغاضي عن الغلط اللي بيعمله ومش بتعاقبيه عليه هيرفض الاعتراف بغلطه بعد كده.
اتكلمي مع ابنك وناقشيه
ودي واحدة من الحاجات المهمة اللي هتساعدك على اعتراف الطفل بخطأه، وده لأنه الأطفال بطبيعتهم أذكياء جدا، علشان من الصعب جدا إنك تلاقيه يستسلم بسهولة ويعترف بغلطه لمجرد إنك قولتليه أنت غلطان، في الحالة دي اقعدي معاه واتكلمي، وأسأليه هو ليه مش شايف نفسه غلطان، يمكن يقدملك سبب مقنع للي عمله.
علشان كده من المهم إنك تكوني مستعده لأي اجابه يقولها، وتتكلمي معاه بهدوء، وده لأنه في كتير من الاطفال مش بيقتنعوا إلا بأسلوب الحوار والنقاش.
كوني قدوة ليه
وده مهم إنك تعرفيه وهو إنك ما تتوقعيش إنه ابنك يعترف بغلطه وأنتي نفسك مش بتعترفي بالغلط اللي بتعمليه، يعني مثلا لو كسر ابنك كوبايه هتفضلي تزعقي فيه وتعرفيه أنه مهمل، لكن لو نفس الموقف حصل معاكي هتلاقي رد فعل تاني، وهو إنك هتبدأي تلومي الشخص اللي خلى الكوباية في المكان ده، أو هتخلي اللوم على اللي بيكلمك ومشتت تفكيرك، لكن هنا من المهم إنك تعترفي بالغلط قدام طفلك، وده علشان يدرك ابنك أن الاعتراف بالغلط حاجة مش بتقلل من قدره، أو إنها مهينة بالنسبة ليه.
ادعمي واحتوي ابنك
إنك تخلي ولو نص ساعة يوميا تتكلموا فيها عن يومكم وتحسسي إنه طفلك حد كبير بتهتمي بالكلام معاه وترتاحي هيخليه يحكيلك عن يومه بكل حب، حتى لو عمل حاجة غلط، وده لأنك كسرتي حاجز الخوف الموجود جواه من أنه يعترف بغلطه.
اختاري طريقة ايجابيه في عقابك لابنك
بلاش تخلي العقاب على الغلط اللي يعمله ابنك مهين، يعني بلاش تهنيه بألفاظ قبيحة زي إنك تقوليله أنت غبي، أو إنك تستخدمي معاه الضرب كعقاب جسدي، أو إنك نحرميه من مصروفه.
يعني مثلا لو كسر أزاز الشباك هو بيلعب الكورة عاقبيه بأنه محروم من مصروفه يومين، أو إنك تحرميه من أنه يلعب بالكورة لفترة معينه.
طرق العقاب الصحيحة للطفل
اللي من المهم إنك تعرفيه إنه العقاب في حالة ارتكاب طفلك لأي غلط هو مش وسيلة لكسر ثقته بنفسه، أو السيطرة عليه، وإنما هو وسيلة للتهذيب والارشاد للسلوك الصحيح، وانه يتعلم إزاي يقيم أفعاله بشكل صح، ويبعد عن التصرفات الغلط، وده علشان خوفه من العقاب، ولكن علشان ممكن تسبب ليه ولغيره الأذى، ودلوقتي هنتعرف على بعض طرق العقاب الصح اللي ممكن تطبيقها مع ابنك واللي منها:-
اصلاح ما أفسد
ودي واحدة من الطرق الفعالة في عقاب طفلك على أي غلط يعمله يعني مثلا لو عمل أي لخبطة أو فوضى في الأوضة يبقى لازم يعيد ترتيبها.
مصادرة بعض ألعابه أو الحاجات اللي بيحبها
يعني لو في مرة عمل حاجة غلط، ممكن تشيلي منه بعض الألعاب بتاعته، زي ما قولنا فوق يعني لو كسر ازاز الشباك بالكورة، احرميه من أنه يلعب بالكورة لفترة معينة.
التجاهل
يعني ممكن طفلك يعمل أي تصرف غلط في أي وقت، في الوقت ده حاولي إنك تتجنبيه وتتجاهليه، يعني مثلا لو هو بدأ يصرخ ويبكي بدون سبب وده علشان بس يلفت انتباهك ليه، بلاش تعملي نفسك واخدة بالك منه وتجاهليه تماما وكملي الحاجة اللي بتعمليها، بعد ما يدي شوية من الوقت هتلاقيه سكت لوحده.
كده يكون تعرفنا على أكتر الحاجات اللي تساعدك في اعتراف الطفل بخطئه واللي منها إنك تصارحيه وتشاركيه أحداث يومك، وإنك تعاقبيه بطريقة ايجابيه، كمان عرفنا مع بعض أهم الطرق للعقاب بطريقة ايجابية.
كتبت: شيماء عبدالباقي
