الخجل عند الاطفال قد يكون لأسباب وراثية أو مكتسبة، شخصية الطفل، والعلاقات الأسرية
كتير من أطفالنا بيتكسف بزيادة وخاصة في سنين عمره الأولى، وعلى الرغم من أن الخجل بيبقى صفة محمودة في الأطفال إلا أنه مفيش أم تحب أن الصفة دي تكون فيه، وده لأنها من الطبيعي أنها هتأثر على حياته الاجتماعية والعملية.
وده لأنها بتقضي على استقلاليته وحريته الشحصية، وأنه يقول رأيه بكل صراحة في أي حاجة يتعرض ليها، وهنا في كوكب الاطفال هنتعرف مع بعض على الخجل عند الاطفال وأسبابه، وازاي نتغلب عليه.
مفهوم الخجل عند الاطفال
أول حاجة من المهم إنك تعرفيها إنه امتى تقدري تقولي إنه طفلك خجول، وده بيكون طفلك بيتكسف ويحس أنه قلقان لم تقابله مواقف عادية جدا، أو لم يتفاعل مع ناس تانية خاصة لو كان ميعرفهمش.
ده غير إنه ممكن يتعرض طفلك لضغط نفسي وتوتر غير طبيعي لم يحس أنه محور اهتمام الناس اللي موجوده حواليه، يعني مثلا هتلاقي طفلك اللي بيعاني من الكسوف مش بيحب أنه يقابل حد جديد أو حد ما يعرفوش، واللي غالبا لم هيتعرض للموقف ده هتلاقيها يستخبى وراكي، وبرضو هتلاقي مش مضطر أنه يتكلم قدام الناس وبيفضل انه يسكت.
سلبيات الخجل عند الاطفال
طبعا لكل حاجة موجودة في حياتنا ليها ايجابيات وسلبيات، ودلوقتي هنتعرف مع بعض على السلبيات اللي بتواجه الطفل الخجول:-
- بيكون عدد أصحابه أقل مقارنة بعدد صحاب أي حد من أقرانه الغير خجولين.
- في أغلب الوقت بنلاقيه مش بيحب المشاركة في الألعاب والأنشطة الترفيهية، واللي بتحتاج لتفاعل مع الناس التانية زي الرقص، والرياضة، والمسرح، والموسيقى.
- من أهم سلبيات الخجل عند الاطفال أنه بنلاقيه دايما عنده شعور بالوحدة، وعدم الاهتمام بنفسه.
- بيكون القلق عنده موجود بشكل كبير وبمستويات عالية.
- كمان الطفل الخجول بيكون للخجل تأثيرات سلبيه على جسمه واللي غالبا بتكون احمرار في وشه، أو إنه بيترعش في بعض الأوقات.
الجوانب الايجابية لخجل الاطفال
على الرغم من أنه الخجل عند الطفل بيكون ليه سلبيات كتير لكن برضو ليه بعض الايجابيات واللي منها:-
- إنه يسمع للناس التانية بتركيز وانتباه.
- بيعرف يتصرف كويس لم يتعرض لأي موقف، وبيتجنب وقوع المشاكل مع أي حد تاني.
- بيجتهد كويس في دراسته.
صفات الطفل الخجول
في صفات بتكون موجودة في الطفل، وبمجرد أنها تكون موجودة بنعرف أنه الطفل ده خجول، وفي الحالة دي المفروض إنك تتعاملي مع الخجل ده بدل من إنك تتصدي ليه وتحاولي تغيريه غصب عنه وبطرق هتقلب نتايج عكسية، ومن أهم الصفات الموجودة إنه:-
- غالبا الطفل الخجول بيكون طفل بيذاكر بشكل كويس جدا، وبيكون شخص عاطفي، ولكن مش بيحب إنه يجرب حاجات جديدة.
- بتلاحظي كمان أنه هو شخص بطئ في التعامل مع الناس التانية ومش بيحب يتعرف على ناس جديدة، يعني مثلا هتلاحظي أنه ياخد وقت طويل علشان يتكيف مع أي موقف جديد ممكن يتعرض ليه، ممكن يكون حابب أنه يبقى حد اجتماعي وبيتفاعل أكتر لكن بيخاف أنه يقرب من التانيين وده لأنه مش عارفة يقرب ليهم إزاي أو يبدأ من فين.
أسباب الخجل عند طفلك
في حاجات كتير ممكن تخلي الطفل بيعاني من مشكلة الكسوف عنده واللي منها:-
أسباب وراثية
من أهم الحاجات اللي ممكن تتسبب في وجود خجل لطفلك إنه يكون في أسباب وراثية لده، وده لأنه في حد من العيله بيعاني من نفس المشكلة.
شخصية الطفل
وده واحد من الاسباب المهمة، انه يكون الطفل من السهل تخويفه، فيكون الطفل خجول اكتر من غيره من أصحابه اللي في سنه.
أسباب مكتسبة
وده بيكون فيها طفلك مكتسب صفة الخجل منك أو من باباه، وده لأنه بيعتبرك أنتي وباباه مثله الأعلى فبيحاول يقلدكم.
العلاقات الاسرية المتوترة
ممكن عدم ارتباط الطفل بـ باباه ومامته بطريقة غير طبيعية بيخليه خجول، وده بيكون لأنه الأب والأم مثلا منفصلين عاطفيا عن بعض، أو مطلقين.
امتى ممكن يكون الخجل عند الطفل مشكلة
في بعض الحالات بيكون خجل الطفل مشكلة كبيرة ولازم نستشير دكتور في التعامل مع الطفل والتغلب على هذه المشكلة، ومن الاحالات دي الآتي:-
- أنه طفلك ما يحبش يروح المدرسة.
- لم تلاحظي كمان إنه طفلك عنده مشكلة في أنه يعمل صداقات مع ناس غير زمايله.
- لم تلاحظي انه طفلك ما بيحبش أنه يروح حفلات أعياد الميلاد لحد من زمايله، او إنه بيتجنب يشارك في أي نشاط جماعي زي اللعب وغيره.
- أو إنه طفلك يقولك ياماما دايما بحس أني وحيد، وإنه ومش عارف اختلط اكتر مع زمايلي في المدرسة.
- أو إنه يقولك مش بقدر أجاوب في الفصل قدام زمايلي، أو إني أقول السؤال اللي عايز أسأله.
الحاجات دي كلها من الحاجات اللي تعرفي منها أنه من المهم إنك تستعيني بدكتور في حل مشكلة ابنك.
إزاي أساعد طفلي أن يتغلب على خجله
مش كل حالات الخجل عند الاطفال بتحتاج إني نلجأ لدكتور علشان نتعامل معاها، لكن بتحتاج إننا نتعامل معاها بذكاء شوية، واللي منها:-
إنك ما تجبريش طفلك الخجول على أنه يتفاعل مع الاخرين
ودي حاجة من الحاجات المهمة الي هتساعدك في إنك تحلي مشكلة الكسوف عند ابنك، كمان ما تحاوليش تعاقبيه أو تقللي من قيمته قدام الناس أو نفسه لأنه مش بيتجاوب معاكي في إنه يتكلم مع أقاربكم.
إنك تكوني حريصة إنك تكوني معاه في المواقف اللي بيخاف ويتكسف منها
يعني مثلا ما تخلهوش يبقى لوحده في الألعاب الي بيخاف أنه يشارك فيها بسبب خجله، وأنه مش قادر يتفاعل مع زمايله، حسسيه إنك دايما معاه وقريبه منه واقعدي على مسافة بعيدة شوية منه ولكن متابعاه، الحاجات دي هتشجعه أنه يتجرأ ويتغلب على الكسوف اللي عنده.
عدم مجاراة الطفل في كسوفه
وده بيكون من خلال إنك بتتعاملي مع كسوفه بشكل مبالغ فيه أنتي وباباه، وإنكم بتخافوا علي مشاعره بشكل مبالغ فيه، التعامل بالطريقة دي يوتر طفلك أكتر، وبيخليه يعتقد أنه الخوف اللي بيشعر بيه حاجة مقبولة ويبدأ الخجل يزيد بدل منه أنه يقل.
علشان كده إنك تمدحي السلوك الشجاع قدامه هتخليه يتشجعه على الخطوة دي، يعني مثلا تمدحي في الطفل اللي بيلعب مع زمايله دايما، أو اللي دايما بيحاول أنه يجرب حاجة جديدة زي أنه يلعب مع حد جديد في النادي من الاطفال اللي في سنه.
تصحيح ما يقولوه الآخرون عن الطفل بأنه خجول
يعني مثلا لو حد من أقاريبكم قال قدام الطفل أنه بيتكسف أووي ممكن تصححوا ليه المعلومة بإنه هو مش بيتكسف، لكن بيحتاج لوقت شويه علشان يقدر يتأقلم ويتجاوب مع الآخرين.
بناء الثقة
ودي من الحاجات اللي هيكون ليها دور كبير في التخلص من الخجل اللي موجود عند طفلك، زي مثلا أنك دايما تفكريه بالمواقف الصعبة اللي مر بيها واللي كان دايما بيقدر يتغلب عليها ويتجاوزها، زي مثلا أنه قبل كده حضر حفلة عيد ميلاد، وإنه أول ما دخل الحفلة كان قلقان وحاسس إنه مش مبسوط، لكن بعد شوية ولم لعب مع زمايل قدر أنه يتجاوز الموقف ويكون مبسوط.
بكده يكون تعرفنا على بعض الاسباب اللي بتخلي الطفل مكسوف واللي منها ممكن يكون مكتسب بسبب وجود حد خجول في العيلة، وأنه الخجل ليه ايجابيات واللي منها انه طفلك بيكون مجتهد في دراسته ومش بيعمل مشاكل مع حد، واللي من أهم سلبياته أنه طفلك بيحس أنه وحيد، ومعندوش صحاب كتيير، وكمان عرفتي إزاي نتغلب على المشكلة واللي منها إنك ما تجاريش طفلك في شعوره بالخجل، وايه الحالات اللي ممكن نلجأ فيها للدكتور.
هنكون سعداء لو شاركينا بتجربتك في كيفية التغلب على الخجل عند طفلك.
كتبت: شيماء عبدالباقي
