كيف أعلم طفلي أن يكون صبورا؟
كتير من الامهات بتسأل إزاي اعلم طفلي الصبر؟، وده لأنه الصبر بالنسبة للطفل بيكون زي تحدي كبير ليه، وده عايز كل حاجة في الوقت اللي بيطلبه ومن غير ما يستنى، وده لانه طبعا معندوش الخبرة والادراك اللي تخليه يفهم أنه في وقت محدد هتكون الحاجات اللي بيطلبه متاحة فيه مش في أي وقت هو عايزه.
علشان كده بنلاقي الاطفال بتبدأ تصرخ وتبكي لو مجبتلهاش الحاجات اللي ممكن تطلبها، وفي كوكب الاطفال هنقولك على طرق متنوعة لتعليم الاطفال الصبر، هنتعرف عليها مع بعض.
4 طرق لتعليم طفلك الصبر وضبط النفس
والأربع طرق دول أنا بعتبرهم من أسهل الطرق اللي ممكن تساعدنا في تعليم الاطفال الصبر، واللي منها:-
علميه الانتظار
وتعتبر الطريقة دي واحدة من أهم الطرق اللي ممكن تعلمك إزاي تعلمي ابنك الصبر، وده هيكون مثلا إنه لما ابنك يطلب منك أي حاجة تخلي في وقت بين الوقت اللي طلب فيه الحاجة، وبين الوقت اللي هتديله فيه الحاجة اللي هو طلبها.
حتى لو كانت الحاجة دي متوفرة بمجرد ما بيطلبها، وفي كل مرة يلح عليكي أنه تديله الحاجة استخدمي معاه كلمة استنى او انتظر، الكلمة دي هتخليه يفهم أنه الحاجة اللي طلبها جاية.
في أساليب كتير غلط بتتبعها بعض الامهات لم ابنها يطلب منها أي حاجة، خلي بالك أنك توقعي فيها، يعني مثلا ممكن ابنك يكون محتاج منك تجيبيله تفاحة في الوقت اللي أنتي أصلا فيه مش فاضية، فتقوليله حاضر يا حبيبي هجيبلك، وتستني لم تخلصي الحاجة اللي في أيديكي علشان تجيبله التفاحة، والأسلوب ده غلط تماما، وده اللي بيخلي الطفل يزن أكتر على دماغ مامته.
وغالبا بيفضل يشدها من هدومها لحدما تتعصب وتفقد السيطرة على نفسها وتفضل تزعق، والموضوع بيقلب للعكس، ونتائج سلبيه بدل ما إنك بتعلميه صفة كويسة، هنا كتير من الأمهات بتسأل طيب احل المشكلة دي إزاي؟.
أنا هقولك تحلي المشكلة إزاي لم ابنك يطلب منك حاجة ولتكن التفاحة زي ماقولنا فوق أنتي هتقومي علطول تجيبيهاله، لكن هتتواني في خطوات احضارها، يعني هتفحي مثلا التلاجة وتبيني قدام ابنك إنك بتدوري على التفاح في التلاجة أو تدوري على المطبخ، ولم هتلاقيها هتغسلي التفاحة ببطء، وأنت وبتعملي الحاجات دي كلها بتقولي لطفلك من وقت للتاني حاضر يا حبيبي أه بجيبلك.
هتلاقي طفلك سكت لوحده رغم إنك متأخرة عليه في إنك تجيبيله التفاحة، لكن الفرق بين هنا واللي حصل فوق إنك هنا أظهرتي ليه إنك بتجيبي اللي هو طلبه فعلا، وده هيعلمه أنه يصبر.
اللعب مع طفلك العاب الصبر وضبط النفس
ودي واحدة من أهم الطرق اللي ممكن تساعدك في تعليم الاطفال الصبر، وده لأنه من أكتر الحاجات اللي ممكن تخلي الطفل يتعلم أي حاجة أنك تربطيها باللعب، وده لأنهم بطبيعتهم بيحبوا اللعب طبعا، وفي ألعاب كتير من اللي بيكون لها علاقة بالتحكم في جسمهم بتعلمهم الصبر وإزاي يكون قادر على أنه يظبط نفسه.
يعني مثلا كنا بنلعب بعض الالعاب دي واللي منها لعبت قيام وجلوس لو أنتي فاكراها، اللعبة دي كنا كلنا مثلا بنقعد على الكراسي، وفي حد بيقولنا قيام جلوس وهكذا، واحنا بنطبق اللي هو بيقوله، يعني لو واقفين وقال جلوس في وقتها بنقعد، وبنقعد منتظرينه لحد ما يتكلم تاني علشان نشوف هيقول أيه ونعمله، اللعبة دي من الحاجات الحلوة اللي بتعلم الاطفال الصبر.
ممكن تعرضي على طفلك بعض الخيارات اللي تشجعه على الصبر
إنك تستخدمي أساليب الخيارات المتعددة وإنك تحاولي تغريه في الخيارات والعروض اللي بتقدميهاله ده هيخليه يتعلم الصبر، وده لانه بيخليه يأخر دوافع ناحية الحاجة اللي بيطلبها مقابل أنه يأخد العرض والمكافآة الأكبر، يعني مثلا لو ابنك طلب منك حتة بسبوسة قبل الغدا، اعرضي عليه إنه يأخد دلوقتي حتة واحدة، ولا يستنى بعد الغدا، وياخد حتتين.
تجنبي التفاعل مع الحاح طفلك
في أطفال كتير بتتبع أسلوب الزن والالحاح لم بتطلب حاجة معينة، وللأسف الأم بتجيبله اللي عايزه علشان تتخلص من الحاجه، والأسلوب ده غلط خالص، وده لأنه لو وافقتي على اللي ابنك عايزة هيقلل من الصبر عنده.
فمثلا لو طفلك طلب منك حاجة وأنتي بتتكلمي في التليفون بلاش تقطعي المكالمة بتاعتك علشان تجيبله الحاجة اللي هو عايزها، وفهميه إنك بتتكلمي في التليفون وإنك هتشوفي عايزة ايه بعد ما تخلصى المكالمة.
كده يكون تعرفنا مع بعض على أسهل وأهم بعض الامور اللي هتساعدك تعلمي ابنك الصبر إزاي، واللي منها إنك تعلميه الانتظار، وتلعبي معاه الالعاب اللي ليها علاقة بالصبر.
هنكون سعداء لو شاركتينا بتجربتك في تعليم ابنك الصبر.
كتبت: شيماء عبدالباقي
