خطوات تعليم الطفل أن يمسك القلم
وما هو الوقت المناسب ؟
أي أم وهي بتشوف ابنها بيكبر قدام عينها وبدأ يتعلم شوية شوية الحاجات اللي حواليه بتزيد رغيتها في إنه يتعلم كل حاجة، وأول ما يبدأ يقرب يدخل الحضانة بتبدأ تفكر إزاي تعلمه يمسك القلم صح، وده لانه يعتبر من أول الحاجات اللي هيعملها في الحضانة.
ولأنه عندك رغبة في إنه يكون متفوق في كل حاجة بتحاولي تعلميه الخطوة دي من قبل مايدخل الحضانة بفترة، وفي كوكب الاطفال هنتعرف أنا وأنتي مع بعض طرق تعليم الاطفال مسك القلم.
ايه هو السن المناسب اللي أبدأ اعلم طفلي فيه يمسك القلم
الاجابة على السؤال ده في الأول اهم من سؤال إزاي اعلم ابني يمسك القلم، وغالبا الطفل ممكن يقدر يمسك القلم لم يكمل عمر الاربع سنين، وفي البداية ممكن تبدئي بأنك تسيبي طفلك يتعلم التلوين، وده لأنه مسك القلم في التلوين بيكون أخف من إنك تعلميه يمسكه علشان يبدأ يكتب، وبعد كده هيبدأ يتعود على مسك القلم بشكل تدريجي لحد ما يمسكه بشكل صحيح.
ايه الوقت المناسب لمسك طفلي القلم في كل مرة
مفيش حاجة معينة ممكن نقيس بها أو تبين لينا الوقت المناسب في كل مرة يمسك فيها طفلك القلم، وده لأنها بتختلف من طفل لطفل، لكن أهم حاجة هو أنه بيحس بالالم مع الوقت، وده هيخليه يسيب القلم بشكل تلقائي، هنا بلاش تجبري على طفلك أنه يكمل مسك القلم، وسيبيه على راحته، ومع التدريب بصورة مستمرة كل مرة هتزيد المدة، وهيتعلم يمسكه بشكل صح.
خطوات تعليم مسك القلم لطفلك
- في البداية حاولي تشدي انتباه طفلك للقلم، يعني مثلا جيبي مجموعة من الاقلام الرصاص بألوان مختلفة، وخليها قدام عينه، هتلاقيه بشكل عفوي هيروح ناحيتها ويمسكها.
- الحاجة اللي المفروض تاخدي بالك منها ومتضايقيش منها أنه ابنك في الأول هيمسك القلم زيه زي أي حاجة ممكن يمسكها، يعني مثلا هتلاقيه ماسك القلم وكأنه ماسك خيارة أو جزره، وده طبيعي جدا.
- بعد كده امسكي أنتي قلم من الاقلام الموجودة وخربشي بيها على ورق أبيض تكوني مجهزاه قدام طفلك، وهتلاقيه بينبهر في البداية، وهيحاول يقلدك، هنا بقى هتبدأي تعلميه يمسك القلم إزاي بشكل صح علشان يعرف يخربش بيه زي ما أنتي عملتي.
- وهنا هتجيبي القلم اللي اختاره طفلك وتحطيه مابين صوابعه، بين السبابة والابهام، وخلي الاصبع الاوسط في جنب القلم، وامسكي ايده بخفة، يعني بلاش تخليه معتمد عليكي في حركة القلم، انتي يدوب بتحاولي تسانديه في البداية، وأبدأوا خربشوا سوا، ساعتها هتلاقي انبهار في عينيه وهو حاسس أنه هو اللي بيخربش بنفسه.
- بالتدريج هتبدأي تسيبي إيدك منه وتخليه يخربش بنفسه ومن غير ما يعتمد عليكي، في البداية هيضايق لأنه هيلاقي صعوبة في الموضوع، لأنه لم هيمسك القلم بشكل غلط مش هيخربش معاه زي ما هو متعود، في المرحلة دي ما تبعديش عنه بشكل كلي، مرة ساعديه وكلميه وأنتي بتعلميه يمسكه إزاي.
- بالتكرار هتلاقي ابنك فعلا بدء يمسك القلم بشكل صح.
- بعد ما يتعلم طفلك يمسك القلم صح، خليه يمسكه ويمشي في البيت وهو ماسكه، وده علشان ما ينساش طريقة مسكة القلم مع تركها، وبلاش تزعقي فيه لم تلاقيه خربش على حيطه أو كرسي، وعرفيه أنه ده غلط وأني الخربشة بنعملها على الورق الأبيض بس.
إزاي اقوي عضلات ابني علشان يعرف يمسك القلم صح؟
في حاجات كتير ممكن تعمليها هتساعد ابنك في تقوية عضلات ايديه، واللي منها:-
- الصلصال، وده لأنه مرن والاطفال كلها بتحب تلعب بيه، ممكن تجيبي لطفلك صلصال وتلعبي أنتي وهو بيه، وتحاولوا تعملوا اشكال مختلفة بيه، وتطلبي منه أنه يلعب معاكي، وأنه يشكل أي حاجة بالصلصال، وده هتساعد كتير في توقية عضلات ايديه.
- وفي نشاط تاني ممكن تعمليه مع ابنك وهيساعده كتير في تقوية عضلات ايديه، وغالبا الاطفال بتحبه، والأمهات بتضايق منه، وهو تقطيع الورق، يعني ممكن تحيبي شوية ورق أبيض، او أي ورق ملهوش لزمة وتقطعوه أنتي وهو مع بعض.
حاجات غلط بتعملها الأم هي وبتعلم طفلها مسك القلم
في حاجات كتير ممكن تقعي فيها أو أنا ممكن اقع فيها أحنا وبنعلم ولادنا إزاي يمسكوا القلم، ومن غير ما ناخد بالنا منها، ولكن للأسف بتتسبب في نتايج عكسية، واللي منها:-
- انه نخلي معاد محدد كل يوم نعلم فيه الطفل إزاي يمسك القلم.
- أو إني نطلب منه يسيب العابه ويجي يبدأ يخربش بالقلم، ودي أكتر حاجة بيكرهها لم نبدأ تعليم الاطفال مسك القلم.
- إني نطول مدة تمرين مسك القلم، ودي هتخلي الطفل يحس بالاحباط وإنه مش قادر يكمل، وبدل ما نحببه في ممارسة النشاط ده، نخليه يكرهه.
- أن نعنف الطفل ونزعق فيه لم يمسك القلم بطريقة غلط بعد ما كان يمسكه بشكل صح، ودي نتغلب عليها بأننه نوجهه بشكل هادئ، يعني مثلا اقوله امسكه زي ما مسكته المرة اللي فاتت، أو إني أنا امسك القلم واطلب منه يقلدني، وفي وقتها هيفتكر بسرعة لانه بالفعل تعلم إنه يمسك القلم بشكل صح.
كده أكون قولتلك على بعض أسهل الطرق في تعليم الاطفال مسك القلم، واللي منها إنك تجيبي شوية أقلام بألوان حلوة وتفرديها قدامه، وتبدأوا تخربشوا مع بعض على الورق، وكمان عرفنا الوقت المناسب اللي نبدأ نعلم ولادنا مسك القلم.
هنكون سعداء لو شاركتينا بتجربتك في تعليم ابنك مسك القلم.
كتبت: شيماء عبدالباقي
