أفكار هتسهل عليكي تعليم ابنك النطق
كتير من الأمهات بتسأل إزاي اعلم طفلي النطق، وقبل الاجابة على السؤال ده لازم تعرفي أنه قبل ما تسألي السؤال ده إنك تكون على دراية بحاجات كتير بترتبط بالموضوع ده، ياتي على رأسها ايه هو الوقت المناسب اللي أبدا فيه تعليم طفلي النطق، وكمان لازم تعرفي امتى ممكن تقولي إني ابني عنده تأخير في النظق.
واهم حاجة لازم تأخدى بالك منها أن قدرات الاطفال مختلفة ما بين طفل والتاني، يعني بلاش تقارني ابنك بحد من عمره في النطق او في أي حاجة تانية، وفي كوكب الاطفال هنجاوبك على كل الاسئلة اللي ممكن تشغل بالك.
بعض الطرق السهلة اللي هتساعدك تعلمي طفلك النطق
في أكتر من طريقة سهلة ممكن نستخدمها في تعليم الاطفال النطق، وفي كوكب الاطفال هنقولكم على بعضها، واللي ممكن تختاروا منها اللي تحبوه في تعليم أطفالكم النطق، واللي منها:-
كثرة الحديث مع طفلك
ودي واحدة من أسهل الطرق في تعليم الاطفال النطق، يعني كلميه عن الحاجات اللي بتعمليها في يومك، يعني أنتي وبتغيريله هدومه مثلا قوليلي عايزين نحضرا الغدا بسرعة قبل ما بابا يجي من الشغل، وبلاش تقولي لنفسك ابني صغير ومش هيفهم الحاجات دي، هو لسه صغير، هو فعلا كده لكن كتر الكلام معاه هيعرفه أنه في حاجة اسمها الكلام، كمان الكلام مع طفلك هيزود الرابط العاطفي بينكم.
احكيله حواديت كتييير
وده لأنه حكاية الحواديت لأبنك تعتبر بالنسبة ليه شباك صغير بييبص منه على العالم اللي حواليه وبيحاول يفهمه، كمان هتعلمه حاجات كتير، واللي بيجي على رأسها تعليمه النطق،وده لحد ما يقدر يتكلم زيه زيك.
التكرار
ودي حاجة مهمة في تعليم ابنك النطق واللي المفروض تاخدي بالك منها، وده لأنه بعض الكلمات والجمل البسيطة قدام طفلك هتساعدك كتير في تعليمه النطق بسهولة، وده لأنه هيعززه عنده ويخليه يحاول يتعلم بشكل أسرع.
خليه يسمع اغاني الاطفال ويشوف أفلام الكرتون
وده لأنه لم تخلي طفلك يسمع الأغاني اللي بتيجي على قنوات الاطفال وكمان يشوف أفلام الكرتون اللي بتيجي عليها هتخليه يتفاعل معاها يحاول النطق، وده بسبب حبه للحاجات اللي بيشوفها وبيحاول يقلدها.
أسباب تأخر النطق عند الاطفال
في حاجات كتير ممكن تكون السبب في تأخر النطق عند طفلك، واللي منها:-
ضعف المستوى العقلي للطفل
وده سبب واضح ومباشر في تأخر النطق عند الطفل، وده لأنه في علاقة قوية بين ذكاء الطفل وقدرته على النطق، وده لأنه التخلف العقلي اللي بيكون عند الطفل بيأثر بدرجة كبيرة على تطور النطق ومراحله عند الطفل.
ولأن الطفل المتخلف عقليا بيكون مستوى الذكاء عنده أقل بيكون مستوى تركيزه أقل والانتباه عنده بيخليه مش قادر يقلد أو يحاكي الناس اللي موجوده حواليه.
لم يكون سمع الطفل ضعيف أو منعدم
وده واحد من أهم الأسباب في تأخر النطق عند الطفل، وده لأنه وسيلة مهمة وأساسية واللي بتساعد الطفل في تعلم النطق أو أي حاجة تانية، وده لأنه الطفل لم بيسمع كلمة بيحاول يقلدها ويتجاوب معاها، خاصة لو كل اللي حواليه اهتموا بالكلام معاه وحاولوا يعلموه النطق.
وجود عوامل وراثية
ودي حاجة تالتة ممكن تكون سبب في تأخر النطق عند الطفل، ممكن ان يكون الطفل مستوى ذكاؤه معقول، وبالرغم من كده إلا أنه متأخر في النطق.
وفي الغالب المشكلة دي بتكون بسبب وجود عامل وراثي، وده لأنه بتكون في حالات زيه في تاريخ العيلة، وده طبعا لأنه الكلام والنطق يعتبروا شكل من أشكال النمو الأخري، واللي بتعتمد بشكل مباشر على نضج ونمو الخلايا النخاعية في الجهاز العصبي، ده غير طبعا الأجزاء اللي بيكون لها القدرة على السيطرة والتحكم في عملية النطق عند الطفل.
السخرية من الطفل
والسبب ده واحد من أهم الاسباب اللي بتسبب تأخر النطق عند الطفل، وده بيكون بسبب ضحك باباه ومامته على كلامه في بداية تعلمه النطق، واللي ممكن تأثر بشكل قوي على نفسية الطفل وتخليه يفضل السكوت عن أنه يتكلم، علشان كده لازم تخلي بالك من الحتة دي وما توقعيش فيها.
امتى تقلقي من تأخر النطق عند طفلك
كتير من الامهات بعد أن يتم طفلها عمره الأول وهو العمر المناسب لتعليم ابنك النطق تبدأ تقلق بسبب تأخره في النطق، لكن حبيبتي قبل ما تقلقي لازم تعرفي امتى الحالة اللي ممكن تقلقي فيها وامتى لأ.
يعني مثلا لو كنتي بتهملى ابنك أو بنتك ومش بتحاولي تتكلمي معاه وبتتشغلي بباقي أمور البيت فكده طبيعي أنه يتأخر في النطق، وده لانه مش بتحاولي تدربيه وتتفاعلي معاه علشان يتعلم.
أما لو كنتي عملتي كل الحاجات اللي قولناه فوق، وتجنبتي الاخطاء اللي ممكن تتسبب في تأخر النطق عند طفلك وكمل سنتين يبقى هنا المفروض تروحي لدكتور وتشوف حل لمشكلة طفلك.
كده أنا أكون قدمتلك أسهل بعض الطرق اللي ممكن تساعدك في تعليم طفلك النطق واللي منها لازم تحكيله حواديت، وتكررى عليه الكلام، وتخليه يسمع أغاني وكرتون الأطفال.
لو عندك أي تعليق حبيبتي ممكن تكتبيه وأنا هتابع وأرد عليكي.
تابع جميع موضوعات كوكب الأطفال فور نزولها على قناة تليجرام
كتبت: شيماء عبدالباقي
