إزاي تخلي الطفل يعتمد على نفسه في الاكل؟
مهمة تعليم الاطفال الاكل لوحده مهمة بتحتاج إلى صبر وممارسة كتير من الام، وكمان لازم تقدم التشجيع الايجابي لطفلها وتخليه قادر على الثقة بنفسه أنه هيقدر يتعلم الحاجة دي، ولازم تاخدي بالك أنه لازم يكون عندك ثبات انفعالي في الوقت اللي بتعلميه تتقبلي كل حاجة ممكن تحصل تعلمي طفلك للاكل.
يعني بلاش تتعصبي لو الأكل وقع على السجادة، وبلاش تزعقي فيه لم يعرفش من أول أو تاني مرة، لأنه الموضوع هيحتاج لتكرار كتير لحد ما يتعلم بشكل كويس.
وفي كوكب الاطفال هنقولك على بعض الحاجات اللي ممكن تسهل عليكي تعليم طفلك الاكل.
الوقت المناسب : امتى نبدأ نعلم الطفل ياكل لوحده؟
قبل ما تفكرى وتدوري على إزاي تعلمي ابنك يأكل لوحده، لازم تكوني عارفة الوقت المناسب اللي ممكن تبدأي فيه تعلمي طفلك إزاي ياكل لوحده، والسن المناسب للمرحلة دي هو أنه يكون طفلك عمره سنه ونص على الأقل، وده لانه قبل العمر ده المهارات الحركية لطفلك بتكون محدودة، وكمان ما تسمحش أنه نعلمه إزاي ياكل لوحده فيها.
لكن ممكن تدربيه على بعض الحاجات اللي هتسهل عليكي تعليمه إزاي ياكل لوحده، ودي هتكون أول ما يتم عمره الأول ويبدأ يعرف إزاي يمسك الحاجات وياخدها من على الأرض، يعني مثلا ممكن تديله حتة بسكوت أو فاكهة، أو أي نوع من الخضار، وتسيبيه ياكلها لوحده.
الطريقة : إزاي نبدأ نساعد الطفل ونعلمه ياكل لوحده
بعد ما علمتي ابنك إزاي ياكل حتة خضار أو فاكهة لوحده، يجي وقت إنك تعلميه إزاي ياكل بالمعلقة لوحده، والمرحلة دي بتكون أصعب بالنسبة للطفل، وده طبعا لأنه بيقوم بمجهود وحركة أكتر بالنسبه ليه من أنه ياكل حتة فاكهة أو بسكوت.
الأول علميه إزاي يمسك المعلقة لوحده ومن غير ما تساعديه، يعني مثلا تطلبي منه أنه يقلدك في اللي هتعمليه وتبدأي تمسكى المعلقة وتوجيهها على الطبق اللي حابه تاكلي منه، وتاخدي كمية قليلة من الاكل، وبعد كده وجهي المعلقة لبقك.
حاولي تاخدي بالك أنه لازم تلفتي نظر طفلك لكل خطوة بتعمليها، سيبي طفلك على راحته وهواه في التصرف مع الاكل والمعلقة، وده لأنه مش هيتعلم من أول مرة بشكل صحيح.
اللي لازم تأخدى بالك منه أن تعليم طفلك الأكل هيخلي في فوضى كبيرة على السفرة فبلاش تضايقي من المنظر اللي هتشوفيه، وخلي عندك شوية صبر، وده لأنه الحاجات دي هترجع عليكي بالنفع وهتعلم طفلك إزاي ياكل لوحده.
ومن أهم الحاجات اللي هتساعد طفلك أن يتعلم الاكل بسرعة إنك تديله معلقة يلعب بيها في أوقات اللعب، وفي غير أوقات تعليمه الاكل، وده لأنه هتحسن من مهاراته الحركية.
نصائح هتساعدك كتير في تعليم طفلك الاكل لوحده
طبعا في حاجات كتير ممكن تسهل عليكي تعليم ابنك الاكل لوحده، وهنا هنقولك على بعض منها:-
- افرشي مفرش كبير تحت كرسي السفرة اللي هتقعدي عليه ابنك لم تعلميه الاكل، وده علشان لم يوقع الاكل يقع على المفرش ويخفف عليكي مجهود النظافة اللي ممكن يعصبك.
- خلي لطفلك كرسي مخصص يقعد عليه لم تعلميه الاكل، ودي حاجة من أهم الحاجات اللي بتساعدنا في تعليم الاطفال الاكل.
- خليله معلقة صغيرة مخصصة ليه لم يأكل، وياريت لو كانت بلاستيك علشان تبقى خفيفه على ايده.
- اعمليله لبس مخصص يلبسه لم تعلميه الأكل فوق اللبس اللي هو لابسه، يعني زي مريلة المطبخ اللي بتلبسيها لم تدخلي المطبخ علشان تحافظي على هدومك.
- زي ما وفرتي أدوات مناسبة وخاصة بطفلك لتعليمه الاكل لوحده، لازم تعرفي أنه مينفعش تأكليه أي حاجة في العمر ده وانه أكله ممكن يكون عبارة عن شوية رز بملوخية، او فاكهة أو خضار مهروس.
تعليم النطق للأطفال بالطرق التربوية الصحيحة
تعليم طفلك آداب الاكل في سن صغير
لم تبدأي تعلمي طفلك آداب الاكل خلي في اعتبارك أنك بلاش تستخدمي أسلوب الاجبار والضغط الشديد ده لأنه هيجيب نتيجة عكسية معاكي، وكمان أنه الحاجة دي مش هتيجي مرة واحدة ولكن هتحصل بالتدريج والتكرار، ودلوقتي هقولك على بعض الحاجات المهة اللي تعلميها لطفلك لم ياكل:-
غسل ايديه قبل ما ياكل
وده لأنه السلوك ده بيعبر عن احترامه للناس اللي بياكل معاها، وكمان هي عادة صحية علشان ما يحصلش لينا أي تلوث.
ما ياكلش إلا لم يتقدم الاكل لكل الناس الموجودة
ودي من أهم الأمور اللي لازم نعلمها لأطفالنا في آداب الاكل، وأنه ما ينفعش نبدأ في الأكل لم يتحط الاكل لكل الناس الموجودة على السفرة، وكلنا نبدأ مع بعض مرة واحدة.
أنه يقفل بقه لم ياكل
ودي حاجة مهمة لازم تعلميها لابنك، وفكريه بيها دايما، وأنه لازم بقه يفضل مقفول أثناء ما بياكل، وكمان ياخد قضمات صغيرة من الطعام وبلاش الكبيرة.
الكلام بلطف
يعني لو طلب حاجة من حد على السفرة زي أنه يقرب ليه الميه أو أي حاجة من الاكل يقوله لو سمحت، من فضلك، وكلمة شكرا.
علميه أنه ما ينفعش أنه ينتقد الاكل
أولا مش معنى إنك تعلميه ما ينفعش أنه يقول لأ على أكل معين إنك تجبريه على أنه ياكل الأكل ده، لكن فهميه برضو أنه لو مش حابب ياكل حاجة معينة ممكن يأكل أي حاجة تانية من الموجودة على السفرة من غير ما يقول أن الاكلة دي مش بحبها أو مش عجباني.
كده بنكون وضحنا ليكي أهم الحاجات اللي ممكن تشغل بالك بخصوص تعليم الاطفال الاكل، واللي منها قولنا أن تبدأي تعلمية الاكل في عمر سنة ونص، وأنه في آداب للاكل واللي منها غسل الايدين وعدم انتقاد الاكل.
منتظرين مشاركتك لينا بأي تعليق أو استفسار أو نصيح في الموضوع ده.
تابع جميع موضوعات كوكب الأطفال فور نزولها على قناة تليجرام
كتبت: شيماء عبدالباقي
