أهم طرق تعبير الاطفال عن الجوع
طبعا من المعروف أنه الاطفال بتاكل عدد وجبات اكتر وبتجوع أكتر من الكبار، وده لانه معدتهم صغيرة جدا، فلم بياكل بياخد كميات قليلة جدا من الاكل، ولكن كل ما بيتقدم العمر بالطفل بتبدأ شهيته تتفتح أكتر واكتر،واللي بتتلائم مع معدل نموهم وكفاءة الاجهزة اللي في جسمهم.
ولكن الحاجة اللي من المهم إنك تاخدي بالك منها إني الاطفال بتختلف حاجتهم للأكل عن بعض، ولكنهم بيتشابهوا في طرق التعبير عن ده، وفي كوكب الاطفال هنقولك على بعض الطرق المهمة في طرق تعبير الاطفال عن الجوع.
علامات الجوع عند الاطفال
في حاجات كتير ممكن يعملها طفلك وحركات بتدل على أنه جعان، ودلوقتي هنتعرف مع بعض على بعض منها:-
الاستيقاظ مع الارق
ودي حاجة من الحاجات المهمة في طرق تعبير الاطفال عن الجوع، أنه هو يصحى هو وفي عز نومه بطريقة تقلقه، ده غير أنه هو يبدأ يحرك بقه، ويحط أيديه على وشه، كل الحاجات دي بتعرفك إنه ابنك جعان.
مص الاصابع
ودي أكتر حاجة ممكن تكون واضحة بالنسبة ليكي أو لغيرك من الأمهات في طرق تعبير الاطفال عن الجوع، وهو أنه يحط ايديه في بقه ويمص صوابعه وشفايفه، ويحرك لسانه.
الالتفات
والالتفات هو أنه الطفل يحرك راسه في كل مكان، ناحية اليمين، وناحية الشمال، وهو هنا بيحاول يعبر عن جوعه بالطريقة اللي يقدر عليها، وبيحاول يلفت نظر اللي حواليه ليه.
يبحث عن ثدييك
دي من الحاجات الواضحة اللي بتبينلك جوع طفلك، وهو أنك بمجرد ما بتشيله بتلاقي راح ناحية ثدييكي بشكل عفوي علشان يرضع، كمان هتلاقي بمجرد إنك تقربي ثدييكي ليه هيرضع بسرعة ولهفة.
اصدار أصوات
وهنا طفلك بيبدأ يطلع أصوات ونغمات غريبة تسمعيها بس لم يكون ابنك جعان.
البكاء
والمرحلة دي بيكون فيها طفلك لأقصى مراحله من الجوع، وده لانه بيكون حاول يستخدم كل الحاجات اللي قولناها فوق علشان يفهمك أنه جعان لكن ما فهمتهوش، وبيكون البكاء بصوت عالي وصراخ شديد.
إزاي اعرف أنه طفلي بيتغذى بشكل صح
في كتير من الاحيان دكتور الاطفال مش بيعملك جدول خاص بعدد رضاعات الطفل خلال اليوم، وده بيكون لأسباب صحية، وفي الحالة دي من الافضل إنك تراقبي طفلك بشكل كويس وتنتبهي لعلامات الجوع اللي بيحاول يعبر عنها واللي عرفناها مع بعض فوق، لكن السؤال اللي كتير من الأمهات عايزة تعرف إجابته إزاي اعرف أنه طفلي بيتغذى بشكل صح، دلوقتي هنتعرف على الحاجات اللي تعرفك الحتة دي:-
تغيير الحفاضات بشكل كتيير
تغيير الحفاضات لطفلك من أكتر الحاجات اللي بتعرفك أنه طفلك بيتغذى بشكل صح، وده لأنه في الغالب الطفل اللي بيرضع رضاعة طبيعية مشبعة تقريبا بيغير من 6 حفاضات لـ 10 في اليوم، ومن الحاجات اللي من المهم تاخدي بالك ليها أنه لون البراز في اليوم الأول لولادة الطفل بيكون لزج ولونة أسود غامق، لكن في العادي وبعد اليوم الرابع من الولادة بيكون لونه أصفر، والصحي أنه يكون قوام البراز لين.
اكتساب الوزن
الحاجة اللي مهم إنك تعرفيها أنه ابنك بعد اليوم التالت ليه من الولادة بيبدأ يقل وزنه، وفي الغالب بيخسر من 5 إلى 7 في المية من وزنه، وده طبيعي جدا، لكن اللي مش طبيعي أنه يخسر من 10% من وزنه أو أكتر من كده، ده بيدل على أنه في مشكلة مرضية طفلك تعبان منها، وهي اللي مسببة خسارة الوزن الكبيرة اللي عنده.
وإنه طفلك من اليوم العاشر من ولادته يبدأ يرجع لوزنه الطبيعي اللي بعد الولادة علطول دي من الحاجات اللي بتعرفك أنه ابنك بيتغذى صح، وصحته كويسه.
يتغذى الطفل بانتظام
أنه الطفل يرضع بشكل مستمر من اهم الحاجات اللي بتعرفك إنه بيتغذى صح، وده لأنه الرضاعة بشكل مستمر بتساعد بشكل كبير في نمو الطفل، وخاصة في الشهر الأول والتاني بعد الولادة.
كده نكون تعرفنا مع بعض على طرق تعبير الاطفال عن الجوع، واللي منها أنه بيمص صوابعه، أو أنه يبكي بصوت عالي ودي بتكون علامة على أنه الطفل وصل لمرحلة كبيرة من الجوع.
هنكون سعداء في كوكب الأطفال لو شاركتينا بتجربتك بالطرق اللي بتعرفي بيها أنه ابنك جعان.
كتبت: شيماء عبدالباقي
