متى تتخلصي من حفاضات الأطفال وتعلمي طفلك دخول الحمام
في كتير من الأمهات بتبدأ تعلم طفلها دخول الحمام في وقت سابق لآوانه، والأمر ده غلط تماما، وده لأنه الطفل في المرحلة دي بيكون غير قادر على إدراك الحاجة دي، ده غير أنه بطبيعته بيميل للحاجة اللي بتريحه وما يبذلش مجهود فيها، يعني بيفضل يعمل الحمام في الحفاضة عن أنه هو يروح الحمام.
علشان كده هو محتاج إنك تدريبه على الحتة دي فترة من الوقت، وصرحت الدكتورة دينا صبري استشارية طب الاطفال أنه تعليم الاطفال دخول الحمام مهمة تحتاج لصبر من الأم في تعليم طفلها، ولازم تدرك أنه الموضوع مش هيتحقق من أول أو تاني مرة.
وأهم حاجة في الموضوع إنك لازم تتعاملي بحكمة، وده لأنه أي تصرف غلط منك ممكن يأثر على نفسية ابنك، وفي النهاية تقدري توصلي لبر الامان بطفلك من غير ما يحصل أي حاجة سلبية تسبب خلل في تربيتك لابنك.
أيه هو العمر المناسب اللي أبدا اعلم فيه ابني دخول الحمام
الاجابة على السؤال ده مهمة جدا، وكتييير من الدكاترة وضح أنه العمر اللي نبدأ فيه تعليم الطفل دخول الحمام مش حاجة ثابته، وده لأنه بيختلف من طفل لآخر، وده على حسب القدرات البدنية والنفسية لكل طفل، لكن ممكن نبدأ من عمر سنتين ونصف كحد أدنى مش قبل كده، وده لأنه في الغالب بيكون الطفل عنده المهارات الحركية اللي تخليه يقدر يدخل الحمام لوحده.
إزاي اعرف إني ابني عنده استعداد أنه يدخل الحمام لوحده
في حاجات كتير ممكن نتعلم منها إزاي ابني مستعد أنه يدخل الحمام، ودي بتكون إشارات واضحة لبدء تعليم الاطفال دخول الحمام، ودلوقتي هنتعرف على شوية منهم مع بعض.
- بيكون عند طفلى اهتمام زايد بدخول الحمام، وبيحاول يعرف يقعد إزاي على القعدة، ودي أول إشارة في إني نبدأ تعليم الاطفال دخول الحمام.
- من الحاجات المهمة اللي تبين ليكي استعداد ابنك للحمام هو أن الحفاضة تقعد وقت كبير جافة، وإني ابنك لم يحاول يعمل حمام ما يحسش بالراحة أنه يعمل فيها زي ما كان متعود.
- أنه طفلك يكون قادر وفاهم أنه يشد بنطلونه لتحت لم يكون عايز يعمل حمام.
- كمان من اهم الحاجات اللي بتخليني اعرف إنه ابني على استعداد لدخول الحمام لوحده إنه بيبدأ يقبل حاجات ويرفض حاجات تانية.
4 طرق هتساعدك في إنه ابنك يتعلم دخول الحمام
في أكتر من طريقة ممكن تعتمدي عليها في تعليم ابنك دخول الحمام، ودلوقتي هنتعرف سوا على أسهل بعض الطرق منها:-
اليوم الأول دربي طفلك على دخول الحمام
وده هيكون إزاي، أول يوم تبدئي في تعلمي طفلك دخول الحمام هيكون بنفس لبسه المعتاد عليه بيلبسه لكن من غير ما يكون لابس حفاضة، بعد كده هتروحي أنتي وهو الحمام وتحاولي تقوليله احنا بنعمل ايه في الحمام، وكرهيه في لبس الحفاضة، يعني مثلا تقولي يع ايه ده دي وحشة، وفي كل مرة كرري على مسامعه الكلمات دي.
طبعا لم هتبدئي تعلمي طفلك يستخدم الحمام إزاي هتكوني أنتي مجهزة نونية علشان يعرف يقعد عليها، لأنه في البداية هيخاف يقعد على الحمام، وممكن يتخيل إنك بمجرد ما تسيبيه هيقع في الفتحة بتاعت الحمام.
من أهم الحاجات اللي لازم نخلي بالنا منها إنه في وجبة الافطار نزود من الاكل اللي فيه سوائل وألياف ووده لأنه هيسرع من عملية قضاء الحاجة عند طفلي وطفلك، ويخلينا نبدأ في تعليمه.
كمان من المهم أنك تعلمي طفلك أنه يبدأ في استخدام كرسي النونية أول ما يحس بضغط، وخديه أنتي وهو علشان تقضوا حاجتكم، مثلي قدامه أنك بتقضي أنتي برضو حاجتك، يعني مثلا اقعدي على الكرسي المقفول المخصص للكبار وبيني ليه إنك بتعملي زيه.
من الحاجات المهمة كمان اللي لازم تاخدي بالك منها إنك ما توبخيش ابنك لو معملش الحمام بنفس الطريقة اللي فهمتيها ليه، وده لأنه الموضوع محتاج صبر طويل.
لم ينتهي طفلك من الحمام نضفيه بمناديل التواليت، وفهميه أنه لازم نعمل كده بعد كل مرة نعمل فيها بيبي، وتاني مرة خليه هو يحاول يعمل كده بنفسه، حتى لو معملش المهمة على اكمل وجه.
الملحوظة اللي المفروض تخلي بالك منها أنه ابنك خلال فترة تدريبه دخول الحمام مش هتتخلي تماما على الحفاضات، ولكن هيكون بشكل تدريجي، يعني ممكن تستغني عنها في النهار وتستخدميها باليل.
اليوم الثاني من التدريب
كرري نفس الخطوات اللي عملتيها في اليوم الأول، وخليه في المرة دي هو اللي ينظف نفسه، طبعا طريقته مش هتعجبك، لكن دورك هيكون في إنه إزاي توجيهي ويتدرب على الخطوة دي بشكل صح.
اليوم التالت
هتكرري نفس الخطوات اللي عملتيها في اليوم الاول، لكن هتغيري بعض الحاجات واللي منها تطولي وقت الجولة مع ابنك اللي بتسبق دخوله الحمام، وده هيمنح طفلك ثقه بنفسه أكبر.
وبعد مرور فترة من التدريب ممكن تكون أسبوع أو أكتر، واللي هتتوقف على مدى استجابة ابنك للتدريب تبدأي تعودي طفلك أنه يقعد على القعدة المخصصة للكبار، وممكن تخلي كرسي تحت رجله، وده علشان يحفظ توازنه وهو قاعد على القعدة.
كده بيكون تعرفنا مع بعض على امتى نبدأ نعلم ولادنا دخول الحمام لوحدهم، واللي أول خطوة منها أنه ندخله الحمام وهو لابس هدومه المعتاده، ونحاول نقعده على القصرية وأنك تقعدي على القعده المخصصة للكبار وتمثلي إنك بتعملي حمام ويقلد اللي بتعمليه، وكمان وضحنا ليكي امتى تبدأي تعلميه واللي منها أنه يكون طفلك بدأ يرفض حاجات ويقبل حاجات.
لو حابه تشاركينا بتجربتك في تعليم طفلك دخول الحمام هنكون سعداء بده، ولو حابة تسألي أي سؤال سيبي كومنت، وأنا هتابعك وأرد عليكي.
كتبت: شيماء عبدالباقي
