تعليم ابنك الحبو هيكون أسهل بالطرق دي
كتير من الأمهات بتحتار في إزاي تعلم طفلها الحبو، وايه هو الوقت المناسب اللي تبدأ فيه بالتعليم، وفي بعض الأوقات بتكون قلقانة بسبب أنها خايفة أنه يكون طفلها أتاخر في الحبو، ومش عارفة ايه هو السبب، كل الحاجات دي هنجاوبك عليها في كوكب الاطفال.
إزاي تساعدي طفلك على الحبو
في حاجات كتير ممكن تساعدك في تعليم طفلك إزاي يجبو، وهنا في موقع كوكب الاطفال اختارنا ليكي بعض من أسهل هذه الطرق، هقولك على بعضها:-
وضع الطفل على بطنه
ودي واحدة من أهم الطرق لتعليم الاطفال الحبو، وده لأنه وضع الطفل على الارض بيديله فرصة كبيرة ووقت طويل في إنه يكتشف الأرض بنفسه، كمان هي أمان ليه ومش هتخافي عليه لو سبتيه لوحده أن يقع، زي ما بيحصل لو سبتيه على السرير.
وكمان الطريقة دي بتساعد طفلك كتير في تقوية المهارات الحركية، وده علشان بتساعده التحكم في رأسه، وجسمه وباقي العضلات، كمان إني تخلي طفلك على بطنه هيخليه يحس إن الوضع ده مش مريح بالنسبة ليه وهيحاول يغيره، وكل الحاجات دي في النهاية هتساعده أنه يتعلم الحبو.
مساعدة الطفل على تقوية عضلات ظهره
ودي هتساعدك كتير في تعليم طفلك الحبو، وده لانه هتساعديه في تقوية العضلات اللي هو هيستخدمها لم يحاول يحبو، علشان كده حاولي تساعديه في أنه يثبت رأسه فوق ومن غير ما تحصله حاجة أو يتأذي، وده علشان ما يخافش يعمل الحاجة دي مرة تانية، يعني مثلا حطي وراه مخده بحيث لو وقع على راسه المخدة تفاديه.
كمان حاولي تساعديه في أنه يقوي العضلات بتاعته في منطقة الأيد والكتفين، وده ممكن يكون من إنك مثلا تستخدمي الالعاب ملونة وتحاولي تلوحي بيها فوق راسه، الحاجة دي هتخليه يحرك ايديه بشكل عفوي لانه بيحاول ياخد اللعبة.
حماية الطفل من المخاطر
طبعا الطفل اللي بيزحف وهي المرحلة اللي قبل الحبو بيكون معرض لمخاطر كتير، علشان كده لازم تتأكدي من أن بيتك خالي من أي خطر ممكن تواجه طفلك هو بيتعلم الحبو.
كمان لم تحطيه في مكان علشان يتعلم الحبو خليه في مكان بعيد عن السلالم، وراقبي عملية الحبو ليه عن بعد، علشان تتأكدي أنه مفيش أي أذى ممكن يتعرض ليه طفلك هو وبيحبو.
استخدمي الالعاب في تحفيز طفلك على الحبو
ودي واحدة من الطرق المهمة في تعليم الاطفال الحبو، واللي هتدي فيها مجموعة من الالعاب الجذابة لطفلك، أو اللي هو بيحبها بالفعل عن مسافة بعيدة منه، وتحطي طفلك على بطنه على الأرض الالعاب هتحفزه أنه يحبو علشان يقدر يوصلها.
كمان ممكن تستخدمة المرايه وتحطيها قدام طفلك، ودي حاجة حلوة وهتحفزه أنه يتحرك ليها وتشجعه على الحبو، وده لأنه يشوف نفسه في المراية هيخلي عنده فضول يعرف ايه الحاجة دي، واللي في النهاية بتشجعه على الحبو.
قللي من وقت الجلوس على الكراسي
ودي من الحاجات المهمة اللي لازم تأخدي بالك منها لم تحبى تعلمي طفلك الحبو، وده لأنه تقليل الوقت اللي بيقعد فيه الطفل على الارض بيأخر من تعلم الطفل الحبو.
على الرغم من أنه جلوسه على الكراسي المخصصة للأطفال، او أنه يقعد في المشاية كلها وسائل أمان للطفل وحمايته من أي خطر، لكن لازم تخليه يقعد أطول فترة ممكنة على الارض علشان يتعلم الحبو، ويتشجع على الحركة والزحف.
الجلوس عن بعد ومناداة الطفل باسمه
ودي واحدة من الطرق المهمة في تعليم الاطفال الحبو، وده من أنه تخلي طفلك على الأرض وتبعدي عنه شوية، وتنادي عليه باسمه وتحاولي تجذبيه ليكي بأي طريقة، يعني مثلا إنك تكوني ماسكة نوع بسكوت بيحبه أو حاجة زي كده، كل الحاجات دي بتديله دافع أنه يتعلم الحبو.
السن المناسب لبداية تعليم طفلك الحبو
كتير من الأمهات بتسأل امتى أبدأ اعلم طفلي يحبو، وده لأنه الحبو يعتبر أول حاجة بتحسس الطفل أنه بدأ يستقل ويحس بالحرية لم بيتعلمها، وده بناء على كلام قالته الدكتورة رالي مكاليستر في كتاب (دليل الأمهات الطبي للسنة الأولى من حياة الطفل).
وعلى الأغلب يبدأ الطفل في أنه يحبو في عمر ما بين 6 شهور إلى 10 شهور، لكن بالطبع كل طفل يختلف عن الطفل التاني، وأنه مش لازم ده يكون مقياس ثابت، لأنه في أطفال مش بتحبو أصلا، وبتنتقل للمرحلة اللي بعدها على طول وهي المشي، لكن كل اللي عليكي أنك تستمري في تدريب طفلك على الحبو، حتى إن طالت فترة التدريب.
كده أكون قولتلكم على بعض أسهل الطرق لتعليم الاطفال الحبو، واللي من أهمها إنك تخلي طفلك على الارض أطول فترة ممكنة، كمان التدريب على تقوية عضلات ايديه، وكتفه بالتلويح بالالعاب فوق راسه.
لو حابة تشاركينا بأي فكرة جديدة هنكون سعداء بمشاركتك لينا من خلال تجاربك
كتبت: شيماء عبدالباقي
