مدرسة ومنهج مونتيسوري للأطفال
أنشطة مونتيسوري كثيرة ومتعددة للأطفال بمختلف أعمارهم، ولكن هنا سنتكلم عن الأنشطة المناسبة للأطفال من عمر 3 سنين إلى عمر 6 سنين.
كتير من الأمور الحياتية والعملية، زي تعليمهم كيفية زراعة النباتات في زجاجات صغيرة، وطريقة الاهتمام بيها لحد ما تكبر، وتعتبر الأنشطة دي مفيدة جدا في تطوير وتنمية العقل.
وفي كوكب الأطفال من خلال المقال ده هنعرفك أهم أنشطة مونتيسوري للأطفال من سن 3 سنين لحد 6 سنين، فتعالي نتابع مع بعض.
من هي ماريا مونتيسوري
هي مدرسة ومربية مشهورة عالميا، وتعتبر أول طبيبة اتبعت المنهج العلمي في التعليم، واستعانت بالتطبيق والتجارب لتحقيق ذلك.
ولدت ماريا في وسط إيطاليا سنة 1870، واترشحت لجائزة نوبل للسلام ثلاث مرات، واهتمت ماريا مونتيسوري في دراستها بأعمال جان جاك روسو واللي كان بيطالب بعودة الطفل لأحضان الطبيعة، وده السبب اللي خلى مونتيسوري تتبنى فكرة أنه يتم تربية الطفل بناء على اهتماماته، وده علشان يتم تنميته فكريا، وروحيا، وحركيا.
نقاط أساسية في منهج مونتيسوري التعليمي
في مجموعة من النقط الأساسية اللي بيركز عليها منهج مونتيسوري التعليمي، واللي منها:-
- تعتبر أفكار المنهج ده مزيج يجمع بين العقلانية والعملية.
- بنقدر نتحكم في اللي ممكن يتعلمه الطفل، وده لأنه بنوفر البيئة المعدة لذلك.
- بيركز على حرية الطفل في اختياراته وحركته، وليس التقليد بشكل مباشر.
- بسبب توفر الكثير من الأدوات التعليمية بيتفاعل الطفل مع المعرفة من خلال حواسه.
- دور المعلم ألا يتدخل في اختيارات الطفل، وأنه يقوم بدور القيادة في التعلم.
- الاهتمام بالطفل بكل الطرق، وتشجيع الطفل، وتزوديه بكل المعلومات اللي ممكن يحتاجها، وده علشان يكون قادر على معرفة الحاجات اللي المفروض يعملها.
فلسفة ومبادئ منهج مونتيسوري التعليمي
في مجموعة من المبادئ والفلسفة اللي بتتبناها مونتيسوري في منهجها التعليمي للأطفال:-
- التركيز على استقلال وحرية الطفل، ولكن في نطاق محدود، واللي بتتمثل في اختياره للأنشطة اللي بيحبها واللي بيكون تم تحديدها بشكل مسبق.
- الفصول في مدارس مونتيسوري لازم يكون فيها مختلف الأعمار من بين أطفال عمرهم 3 سنوات لحد أطفال عمرهم 9 سنوات.
- المرحلة العمرية للطفل من عمر 3 سنين، وحتى 6 سنين بتكون مرحلة بناء الفرد.
- الحرص على احترام النمو النفسي للطفل.
- الطفل بيكون في حالة مستمرة ومكثفة سواء كانت في عقله أو في جسمه.
- التعليم عند مونتيسوري بيؤمن بأن التعليم لابد أن يكون فعال وداعم وبيتم توجيهه للطفل.
- منهج مونتيسوري عبارة عن منهج حياة الأسرة كلها بتقوم باتباعه.
- يتعلم الطفل بشكل ذاتي، يبني معرفته من خلال الاحتكاك والتفاعل الجسدي مع البيئة.
- الطفل في منهج مونتيسوري بيكون منظم والفصول هادية وآمنة وكل العوامل دي بتساعد الطفل على التركيز والتنظيم.
- احترام قدرات الطفل، والايمان بأنها تختلف من طفل لآخر، يعني مثلا لم تكلمي طفلك أبدأي كلامك من فضلك، لو سمحت.
- تشجيع الطفل على تحمل المسؤلية.
- الطفل سيتعلم كل شئ، ولكن في وقته فلا تقلقوا.
تعليم الاطفال الموسيقى .. بطرق تربوية حديثة
أنشطة مونتيسوري للأطفال من عمر 3 سنوات وحتى 6 سنين
في كتير من أنشطة مونتيسوري المناسبة للأطفال في العمر ده، واللي منها:-
اللعب بالصلصال
وده بيكون من خلال إنك تشتري صلصال لطفلك من الأنواع الملونة الطرية، وده علشان يقدر يشكله طفلك بكل سهولة، واللي ممكن يرسم منه أشكال كتير زي مظلات الشتاء، والكرة، والبيوت، والسيارات، والحاجات دي هتساعد طفلك على أنه يكون قادر على الاستمتاع بيومه.
اللعب بصور الحيوانات
وهنا بتعلمي طفلك أنه يتعرف على أشكال الحيوانات المختلفة، من خلال بطاقات من الصور لبعض الحيوانات، ومجموعة تانية بيكون مكتوب عليها أسماء الحيوانات، واطلبي من طفلك أنه يختار كل اسم حيوان والصورة الخاصة بيه بشكل صح.
ألعاب المتاهة
وده بيكون من خلال رسمك لمربع وفيه مجموعة من الحواجز، وفي نهاية المربع قطعة من الجبنة، وفي بداية مسار هذه المتاهة ارسمي فار، واطلبي من طفلك أن يوصل الفار لقطعة الجبنة من خلال المتاهة دي، واللي هيوضحها من خلال رسمها بخط رصاص.
لعبة الرسم على الظهر
وتعتبر دي واحدة من أهم أنشطة مونتيسوري للأطفال، وانتشرت في الفترة الأخيرة بشكل كبير على الفيس بوك، واليوتيوب، وفيها بتحطي ورقة على ضهر ابنك، وتبدأي ترسمي أي حاجة ممكن تيجي في بالك، وتطلبي منه أنه يرسم نفس الشئ اللي حاسس بيه من خلال التخطيط، ومن مميزات اللعبة دي أنها بتساعد على قوة التركيز والاحساس عند طفلك.
ألعاب خاصة بالحواس
وده بيكون من خلال إنك تعملي أي نوع من الأكل، وتخلي طفلك يتذوق الأكل هو ومغمض عينيه، ويتعرف على نوع الأكل من خلال حاسة التذوق.
لعبة التخمين
وفيها بتحاولي تقلدي أصوات الحيوانات ، وتطلب من ابنها يتعرف على الصوت ده، يعني مثلا تعملي صوت مواء، وتطلبي منه يعرف الصوت ده صوت أيه من الحيوانات.
الحضانة أم التعليم المنزلي .. أيهما أفضل؟
ألعاب مونتيسوري في البيت
ألعاب مونتيسوري مفيش قاعدة ثابتة ليها المهم إنها في النهاية بتكون بتهدف لافادة طفلك، وكده بيكون طبقتي أننشطة مونتسيوري في المنزل لطفلك، واللي منها:-
مونتيسوري سقاية الألوفيرا
مفيش بيت لا يوجد فيه نبات سواء كان الألوفيرا أو أي نبات تاني، اشتري رشاش ميه لطفلك صغير، وامليه ميه، واطلبي منه أن يرش بيه على نبات الألوفيرا الموجود في البيت أو أي إن كان نوع النبات المتوفر، وده علشان يتعلم أنه لازم يسقي النباتات حتى لا تبذل أو تموت.
مونتيسوري تنظيف السجاد من الوبر
لو كنتي تمتلكي مكنسة كهربائية بتنضفي بيها السجاد خلي طفلك يقوم بالنشاط ده، خليه يمسك مقبض المكنسة ويعدي بيه على كل حتة في السجادة ويجمع منها الوبر لحد ما تنضف تماما.
كده يكون انتهينا من مقال أنشطة مونتيسوري للأطفال وده بعد ما تعرفنا على أهم الأنشطة للأطفال من عمر 3 سنين، وحتى 6 سنين، واللي منها أنشطة التخمين، والحواس، وصور الحيوانات، وكمان تعرفنا على فلسفة هذا المنهج، والنقط الأساسية ليه.
بعد أن تعرفتي عزيزتي على منهج مونتيسوري لتعليم الأطفال هل ترغبي في الحاق طفلك بمدرسة تتبع هذا المنهج؟.
كتبت: شيماء عبدالباقي
