مجموعة من الأناشيد التعليمية التي ستساعد طفلك على التعلم بيسر وسهولة.
العديد من الأمهات يشكين من صعوبة تعليم أطفالهن أموراً معينة أثناء وجودهم في الحضانة، لكن إذا تأملت في ذكرياتك قليلاً، ستجدين أن الطريقة التي تعلمت بها أنتِ في الحضانة لا تزال عالقة في ذهنك حتى الآن، وهي طريقة يمكنك تطبيقها الآن مع طفلك.
فاكرة زمان كانوا بيعلمونا أي حاجة في الحضانة بالغنا والأناشيد، سواء كانت أرقام، أو حروف، أو حتى ألوان، وفي كوكب الأطفال هنقولك على بعض الأناشيد التعليمية للأطفال في الحضانة، واللي هتساعد طفلك على أنه يتعلم بشكل سريع وسهل.
أهم وأسهل الأناشيد التعليمية للأطفال
في كتير من الأناشيد التعليمية اللي ممكن طفلك يتعلم منها حاجات كتير زي الصلاة، وأنواع الخضار، واللي بتسهل على طفلك عملية التعلم، ومن أسهل هذه الأناشيد الآتي:-
نشيد عن السمك
وده مثال لتعليم الأطفال الحروف، والنشيد ده بيعلم طفلك حرف السين، والجميل في النشيد ده أنه سهل، وده لأنه بيمثل حركة السمكة وبيعرفنا صفاتها وهو
سين يعني سمكة
وهي تحب الحركة
تجري وتسبح
وتقفز وتمرح
تتنفس دون عناء
تتنفس تحت الماء
ويصطاد الصياد السمكة
بالسنارة أو الشبكة
وأنا أكل لحم السمكة.
إقرأ أيضا : تعليم الاطفال الموسيقى .. بطرق تربوية حديثة
نشيد عن الأعداد
والنشيد ده واحد من الأناشيد المهمة في تعليم طفلك الأرقام، واللي بيعلمه إزاي يعد من واحد لعشرة هو وبيغني وبطريقة سهلة، والنشيد بيربط بين العدد وحب طفلك للأشخاص الموجودة في حياته حسب الترتيب ، وأهم الأنشطة اللي بيعملها بشكل يومي.
واحد هو ربي
اتنين بابا وماما
ثلاثة هم أخواتي
أربعة هم صحابي
خمسة صوابع يدي
ستة اصحى بدري
سبعة أروح مدرستي
ثمانية أدخل فصلي
تسعة اخرج فسحة
عشرة ألعب واجري.
نشيد الشمس
وده واحد من أهم الأناشيد التعليمية للأطفال، وده لأنه بيربط بين تعليم طفلك أحد الحروف الهجائية وهو حرف الشين، وربطه بأحد مخلوقات الله العظيمة اللي هي الشمس، والنشيد ده السهل فيه أنه بينتهي بنفس القافية، وده بيكون سهل على الأطفال في الحفظ.
شين يعني شمس تنير
تشرق في الدنيا بالنور
تضئ سحابا وسماء
جعل الله الشمس ضياء
تسعد الناس صيفا وشتاءا.
إقرأ أيضا: الحضانة أم التعليم المنزلي .. أيهما أفضل؟
نشيد عن النخلة
وده واحد من الأناشيد المهمة لتعليم الأطفال الحروف الهجائية، والنشيد ده بيعلم طفلك حرف النون، ونشيد النخلة بيحكي عن الثمر اللي بيخرج لينا منها، وأيه الفوايد اللي بتخرج لينا من النخل زي البلح اللي بناكله، و أغصان النخلة اللي بنصنع منها الحصير، ده غير أنه ممكن نزرع النخل وسط الصحراء علشان تظلل المكان اللي حواليها اللي ممكن الناس تستريح فيه هي وماشية في الصحراء.
نون يعني نخلة في البستان
تعطي بلح مثل السكر
لها سقف كالأغصان
يمكن صنع حصير منه
نون يعني نخل ما أجمله
يزهو وسط الصحراء
يوجد له جزع ما أطوله
لا يشكو نقص الماء.
نشيد باسم الله
والنشيد ده بيعلم طفلك أنه يقول بسم الله قبل حاجات كتير ما يبدأ يعملها، زي أنه يقول بسم الله قبل ما يبدأ ياكل، أو قبل يشرب، أو يلعب، أو حتى يذاكر.
بسم الله بسم الله
أحلى كلام اتعلمناه
بسم الله بسم الله
قبل ما نقرأ وقبل ما نكتب
لازم نقول بسم الله
بسم الله بسم الله
أحلى كلام اتعلمناه.
إقرأ أيضا : تعليم النطق للأطفال بالطرق التربوية الصحيحة
نشيد فصول السنة
والنشيد ده بيعلم طفلك أنه السنة فيها أربع فصول، وكل فصل ليه وقت معين، وظروف جوية وصفات معينة تختلف عن أي فصل،
اسمع وقول
أن السنة فيها أربع فصول
شتا وربيع وصيف وخريف
الشتا دايما فيه مطر
والشتا فيه البرد قاسي ويا طول لياليه
والربيع آه يا عيني على جماله
وفيه تفتح أزهاره
والصيف ياعيني عليه
فيه الشمس حامية كده ليه
والخريف دايما زعلان
وفيه الشجر دايما دبلان.
نشيد الأشكال الهندسية
وده يعتبر واحد من الأناشيد التعليمية المهمة لطفلك، ولأنه في النشيد ده بيتعلم الأشكال الهندسية اسمها ايه وإيه شكلها،
أنا الصديق المستطيل
واسمي على رسمي جميل
صديقتي مدورة
سميتها الدائرة
لي صاحب مثلث
وآخر مربع
أشكالنا محببة
ولطيفة ومرتبة.
نشيد حي على الصلاة
والنشيد ده بيعلم طفلك الصلوات الخمسة اللي فرضها علينا ربنا في اليوم، واللي بتبدأ بالفجر وتنهتي بالعشاء، ونختم صلاتنا بالحمد والثناء،
حي على الصلاة
حي على الفلاح
فلنذكر الصلاة في أول الفجر
والظهر والعصر
ثم نصلي المغرب
ثم نصلي العشاء
ثم نصلي العشاء
ثم نختم صلاتنا بالحمد والثناء.
قد قامت الصلاة
يا أخوة الإيمان
الله في علاه
قد أمر الإنسان
أن يعبد الإله
ويطلب الاحسان.
نشيد الحضانة حلوة
وده واحد من الأناشيد اللي بتعلم طفلك مجموعة من القيم والمبادئ الجميلة، والنشيد
الحضانة حلوة
بتعلمنا غنوة
شمر إيدك شمر
ابني معايا وعمر
ابني مسجد عالي
هو أملنا الغالي
واحنا يا هنانا
أطفال الحضانة
والميس دايما بتوصينا
نحب بعضينا.
نشيد الخضار
وده واحد من الأناشيد اللي بتعلم طفلك أنواع الخضار
الخضار احنا الخضار
مين زينا مين
فينا معادن
فينا فيتامين
خس وطماطم
وفلفل وجزر
نحمي الأسنان
ونقوي النظر.
كده يكون انتهينا من مقال أسهل الأناشيد التعليمية للأطفال، واللي منها نشيد الأعداد، واللي بيعلم طفلك الأرقام، ونشيد بسم الله واللي بيعلم طفلك لازم يقول بسم الله قبل ما يعمل أي حاجة، ونشيد الأشكال الهندسية، واللي بيتعلم طفلك منه إنه شكل المربع والمستطيل والدايرة، ونشيد الصلاة، وأخيرا نشيد الخضار.
لو في أي نشيد تعرفيه ممكن يعلم أطفالنا حاجة جديدة ياريت لو تشاركينا بيه في كوكب الأطفال.
