ما هي معايير جودة حضانات الأطفال

أهم معايير جودة الحضانات لضمان تعليم طفلك فيها

تبحث الكثير من الأمهات وأولياء الأمور عن أفضل الحضانات اللي ممكن تدخل ابنها فيها أول ما يكمل عمر 3 سنين، واللي بتكون خاضعة لمعايير الجودة لوزارة التضامن الاجتماعي، واللي بتحرص بشكل مستمر على تطوير الخدمات اللي بيتم تقديمها للأطفال في المرحلة دي، واللي بتعمل على الارتقاء بيها وتطويرها طول الوقت.

وفي كوكب الأطفال هنوضحلك أهم المعايير اللي لم تتوفر في الحضانة بيكون أمان ليكي أنك تدخلي ابنك فيها، تعالي هنتعرف عليها مع بعض.

أهم معايير جودة الحضانات

في كتير من المعايير اللي من المهم أنها تتوفر في الحضانة علشان تكوني قادرة على إنك تدخلي طفلك فيها، واللي منها:-

رؤية الحضانة

من أهم المعايير اللي بناء عليها بتختاري أنها مناسبة لطفلك أنها تكون بتمتلك وثيقة معلنة، بيكون فيها موضح هدف الروضة، وأنها بتسعى بكل طاقتها من أجل تحقيق هذا الهدف، ده غير أنه لازم يكون في وثيقة تانية بتحتوي على رسالة الروضة واللي من المهم إنها تكون متفقة مع هدفها، وأنه الاتنين بيكملوا بعض.

إقرأ أيضا:تعليم النطق للأطفال بالطرق التربوية الصحيحة

القيادة

وبتعتبر القيادة واحدة من أهم المعايير اللي بتحدد ليكي مدى جودة الحضانة اللي ممكن تكون مناسبة لطفلك، وهي أن الحضانة بتكون بتمتلك فريق كامل من القيادة يكون قادر على استخدام أهم الطرق الديمقراطية في تشغيل الحضانة، هذا بالإضافة إلى مشاركة كل الأطراف المعنية في القرارات اللي بيتم وضعها بخصوص الأطفال اللي في الحضانة.

كمان من المهم توفير البيئة المناسبة اللي يكون طفلك قادر على استيعاب الدروس من خلالها، بالإضافة لمتابعة عمل المربيات في الحضانة وتقويم سلوكهم في حالات الخطأ.

ومن أهم المعايير برضو أن القيادة تكون قادرة على سن القوانين اللي بتسهل على الحضانة القيام بدورها وتنفيذ واجباتها بكل سهولة تجاه الأطفال، وتسخير كل الموارد البشرية الموجودة في الحضانة لتحقيق أهدافها، ورفع نتاج التعليم.

إقرأ أيضا: طفلي لا يصبر .. كيف يتعلم الاطفال الصبر؟

مبنى الحضانة وتجهيزاته

من أهم معايير جودة حضانات الأطفال أنه مبنى الحضانة يكون مناسب لممارسة كافة الأنشطة اللي ممكن يقوم بيها أطفال الحضانة سواء كانوا الأطفال من الأطفال الأصحاء، أو من ذوي الاحتياجات الخاصة، بالإضافة إلى توفر المرافق الصحية والاسعافات الأولية للأطفال بشكل مناسب.

بالإضافة إلى أنه من أهم المعايير اللي بتدل على جودة الحضانة الاهتمام بمساحة غرفة الأطفال بالنسبة لأعمارهم وخاصة في فصل الصيف، وده بسبب ارتفاع درجات الحرارة، وأنه من الأفضل عدم ازدحام الفصل بالطلاب، والحرص على توفير كافة عناصر الأمن والسلامة في كل جوانب الحضانة.

المشاركة المجتمعية

من أهم المعايير اللي بتدل على مدى جودة الحضانة تطبيق مبدأ المشاركة بشكل فعال ما بين إدارة الحضانة وأسرة الطفل، والمجتمع المحلي، ده غير تعاونهم وتشاركهم في تنفيذ الأنشطة اللي بتنفذها الروضة للأطفال، ومن أهم المعايير اللي بتحدد جودة الحضانات برضو أنها تكون حريصة على عقد الندوات اللي بتعلمك أنتي وأسر كل الأطفال اللي في الحضانة إزاي تتعاملوا مع أطفالكم بشكل سليم.

ضمان الجودة والمساءلة

والمسئولية دي بتكون موكلة على عاتق الإدارة من خلال وضع نظام محلي بيكون مسئول عن تحقيق معايير الجودة بالنسبة للحضانة، بالإضافة لتنفيذ الأهداف على مختلف المستويات، والعمل علي تحديد خطة من أجل الارتقاء بمستوي الحضانة، واللي هيتحقق بناء على برنامج المساءلة الذاتية.

طفل الحضانة

من المهم انه طفلك يكون عنده رغبة في حب التعلم لكل المواد الأكاديمية اللي ممكن يتم تدريسها للأطفال اللي في مستواه، كمان أن يكون على استعداد كامل للتفاعل مع الآخرين بكل النشاطات اللي ممكن يشارك فيها، سواء كانت الأنشطة دي فنية، أو موسيقية، أو حركية.

وأهم حاجة من المفترض أنها تكون في طفلك أنه يكون يمتلك القدرة على تحديد مصادر الخطر اللي موجودة حواليه ويبعد عنها، بالإضافة إلى أنه يكون عنده المهارة للتعامل مع الأجهزة البسيطة، والمهارات الاجتماعية اللي من خلالها يقدر يتواصل مع أي حد.

إقرأ أيضا: حيل سهلة لتعليم الأطفال دخول الحمام

المعلم

ودور المعلم في الحضانة بيتمثل في أنه هو المسئول عن التخطيط لعملية التعليم والتعلم، بالإضافة إلى اعداد وتجهيز كافة النشاطات التعليمية اللي بتكون مناسبة لسن طفلك ، بالإضافة إلى تحديد الأدوات بشكل سليم واللي من خلالها بيتم تقييم الطفل.

ومن المهم أن المعلم يساهم في توفير جو مناسب وجاذب للطفل من أجل اتمام عملية التعلم، وإضافة مجموعة من الأنشطة المهنية للأنشطة الإكاديمية، مع الحرص على أنه يهتم بترقية نفسه وتطوير ذاته.

المناخ التربوي

وتعتبر واحدة من أهم المعايير اللي بتدل على جودة خدمة الحضانة، وده من خلال توفير خدمة الإرشاد التربوي لمجتمع الروضة المتمثل في الإدارة والمعلمين، وكمان الأهالي والأطفال، بالإضافة إلى حرص إدارة الحضانة على التنسيق مع المؤسسات المجتمعية والعمل على تنفيذ الأنشطة المشتركة بينهم بما يساهم في خدمة مصلحة الطفل والمعلم، والحرص على نشر الثقافة الصحية بينهم.

كده يكون اتنتهينا من مقالنا، واللي عرفنا من خلاله أيه هي أهم معايير جودة حضانات الأطفال، واللي منها المناخ التربوي، والمشاركة المجتمعية، والمعلم، ودور الطفل، ورؤية الحضانة، والقيادة، ومبني الحضانة وتجهيزاته، وأخيرا ضمان الجودة والمساءلة.

لو حاسة أنه في نقطة تانية ممكن تكون مهمة أنها تكون متوفرة في الحضانة ياريت تشاركينا بيها.

كتبت: شيماء عبدالباقي