ما الفرق بين التعليم المنزلي والحضانة؟
وما هي مميزات وعيوب الحضانة التعليمية؟
مميزات وعيوب الحضانة للأطفال، وما هو السن المناسب لدخول طفلي الحضانة، وهل الحضانة أفضل أم التعليم المنزلي
كتير من الأمهات بتسأل من الأفضل إني أدخل طفلي حضانة ولا لأ؟، ولكن لا يوجد إجابة قاطعة على هذا السؤال، وده لأنه بيتوقف على عدة عوامل، واللي منها هل أنتي إمرأة عاملة، سن طفلك كام هيكون كام لم يدخل الحضانة.
وفي كوكب الأطفال هنقدملك بعض العناصر ومميزات وعيوب دخول طفلك للحضانة، واللي منها هتقدري توصلي لإجابة على سؤالك السابق، تعالي نتابع مع بعض.
ما هي مميزات الحضانة التعليمية للأطفال؟
في كتير من مميزات حضانات الأطفال واللي منها:-
- من أهم مميزات الحضانة أنه طفلك بيبدأ يتعرف على ناس جديدة من غير أفراد أسرته، وده بيبعث في نفسه آثار إيجابية وبتخليه سعيد وقادر على التغلب على الخجل اللي بيكون عند أي طفل في المرحلة دي من الناس الغير مألوفة في حياته اليومية، ده غير أنه بتحسن من مهارات النطق عنده، وبيكون قادر على تكوين جمل كاملة علشان يقدر يتواصل مع الآخرين.
- من مميزات الحضانة برضو أني بتخلي طفلك قادر على الاعتماد على نفسه، وفاهم لمبدأ ومسألة الحرية اللي بيمتلكها ولكن في حدود معينة.
- تعمل على تعليم طفلك بعض الصفات الحسنة، زي التعاون والمشاركة وحب الآخرين.
- الحضانة كمان بتساعد طفلك على تنمية المهارات الاجتماعية عنده، ويكون لديه القدرة الكاملة للتواصل مع الأغراب.
علمي طفلك أن يمسك بالقلم بالطريقة الصحيحة وفى الوقت المناسب
ما هي سلبيات الحضانة التعليمية للأطفال؟
على الرغم من أنه في مميزات كتير للحضانة بالنسبة لطفلك، ألا أنه لها بعض السلبيات، واللي منها:-
- من سلبيات الحضانة أنها بتعرض طفلك لأكثر من أي طفل تاني قاعد في بيته للأمراض وانتقال الفيروسات من خلال العدوى ومخالطته لزمايله في الحضانة، ده غير أنه بيكون أكثر عرضة لنزلات البرد في الشتاء.
- ممكن طفلك أنه يتعرض للإساءة سواء كان من قبل المربيات أو المدرسين في الحضانة وده بيترك أثر نفسي سلبي عند طفلك.
- طفلك بيتعود على شرب اللبن الصناعي بدل من لبن الأم الطبيعي اللي مليان فوايد لم يروح الحضانة وهو عمره أقل من سنتين.
- من أهم سلبيات الحضانة أنها ممكن تحرم طفلك من الحنان اللي بيحتاجه في الفترة دي.
- في الحضانة ممكن طفلك يتعلم بعض الألفاظ البذيئة والشتايم، وده بيكون بسبب مخالطته لمجموعة من الأطفال.
- صرح كتير من التربويون أنه الأطفال اللي بيتم رعايتهم في الحضانة بيكونوا أكثر عدوانية من غيرهم من الاطفال اللي بيتم تعليمهم في المنزل.
- أثبتت بعض الدراسات الأمريكية أن الأطفال اللي بيقضوا أكثر من 30 ساعة في الأسبوع في الحضانة بيكون عندهم اضطراب في بعض السلوكيات.
مواصفات الحضانة الجيدة
لو كان من الضروري ليكي إنك تدخلي ابنك حضانة يبقى لازم تبحثي عن حضانة كويسة تتوفر فيها مجموعة من الصفات علشان تكوني مطمئنة على طفلك، واللي منها:-
- أن الحضانة يكون فيها مدرسين عندهم خبرة وثقافة كافية لتعليم الأطفال، ده غير أنهم يكون عندهم القدرة والصبر للتعامل مع الأطفال.
- أنه الحضانة بيتوفر فيها مكان بيتم فيه استقبال أهل الطفل بعيد عن الأطفال.
- أنه الحضانة بتكون مهتمة بنوع الطعام اللي بياكله طفلك، والوقت اللي فيه بيتم تقديم الأكل للطفل.
- أنه الحضانة يكون مكانها بعيد عن المناطق المزعجة والضجيج، وده طبعا لأنه الازعاج بيأثر على نفسية الطفل بشكل سلبي.
كيف تؤثر الحضانة في ذكاء الطفل؟
أثبتت الكثير من الدراسات أنه الطفل اللي بيدخل الحضانة بيكون أكثر ذكاء من الطفل الذي لم يجتاز نفس التجربة.
ما هو السن المناسب لدخول الحضانة؟
معظم التربويون صرحوا بان أنسب سن لدخول طفلك الحضانة هو سن الثالثة، وده لأنه كتير من الأمهات بتعتقد أنه الطفل في الوقت ده بيكون لسه صغير جدا، وغير قادر على التعليم، وأنه كل اللي بيتعلمه في الحضانة هو أنه يلعب ويقطع الورق بس، على عكس أمهات تانية برضو بتشوف أنه سن الثلاث سنوات ده عمر كبير علشان تدخل ابنها الحضانة، وأنها المفروض تدخله قبل كده.
ولكن في الحالتين بتكون الأم غلطانة لأنه دور الحضانة مش بس بيقتصر على تعليم طفلك، لا بالعكس دي بتعلمه حاجات تانية كتير بتكون أفضل من التعليم نفسه، زي مثلا تعلمه زي يجمع ألعابه بعد ما يخلص لعب ويرجعها مكانها، معاشرة أطفال تانية، ترتيب أفكاره، كل الحاجات دي بتعلمها الحضانة للطفل، وكل ما تأخر الوقت بالنسبة لطفلك أنه يدخل الحضانة بيكون تعلميه النشاطات دي أصعب.
كمان دخول طفلك في سن أقل من3 سنين بيسبب فجوة بينك وبينه، لأنه الطفل في المرحلة دي بيكون محتاج أكتر حاجة أمه، ده غير أن الأم هتكون أكثر حرص على ابنها في المرحلة دي من أي حد تاني، زي مثلا مربيات الحضانات.
الحضانة أم التعليم المنزلي
والمقصود بالتعليم المنزلي هو التعليم اللي بيتم خارج المؤسسات التعليمية، ومنها اللي بيخضع لمنهج الدولة في التعليم، ومنها اللي بيكون تعليم وفق منهج معين، ومنها اللي بيكون حر، والنوع الأخير بيتم تحديده بناء على اختيارات طفلك، يعني بمعنى أصح النوع ده من التعليم بيكون طفلك هو اللي بيوجهه، يعني مثلا لو طفلك مهتم بدارسات الرياضيات بتحاولي توفري ليه كل الأدوات والموارد المتعلقة بالرياضيات زي مثلا توفري ليه كتب فيها تمارين رياضية كتير يحلها.
ولو كان مهتم بالرسم بتوفري ليه كتب في الرسم، وممكن تروحي لمكتبة تسألي عن أفضل الكتب في الرسم المناسبة لسن طفلك وتشتريها ليه.
وفي ناس كتير استنكرت النوع ده من التعليم واعتبرته غير لائق بالمرة، بالرغم من أن الطفل في الطريقة دي بيدرس اللي بيحبه وهيكون مهتم بيه وعنده شغف دائم لتعلم حاجات كتير فيه لأنه من اهتماماته، ده غير أنه المعلومة اللي هيدرسها هتركز في عقله.
وربما يكون الأسلوب ده مناسب لبعض الحالات لكن بالطبع نتائجه ليست هي الأفضل من نتائج الحضانة، وده بناء على بعض من الدراسات المحدودة والتجارب اللي تمت بين الفئة القليلة اللي تم تعليمها بالطريقة دي، وبين الأطفال اللي اتعلموا في الحضانة.
وكده بيكون تعرفنا مع بعض على الحضانة ومميزاتها واللي منها أنها بتعلم طفلك التواصل مع أطفال جدد، والتغلب على الخجل، وعيوبها واللي منها أنها بتعمل فجوة بينك وبين طفلك وممكن تحرمه من حنانك، ومواصفات الحضانة الجيدة واللي منها يكون على تواصل مع أولياء أمور الطلاب، وأخيرا التعليم المنزلي، واللي من خلال المقارنة بينهم هتكوني قادرة على الاجابة على سؤالك أدخل طفلي حضانة ولا لأ؟.
ياريت تشاركينا بالقرار اللي توصلتي ليه بعد ما قرأتي المقال، وهل كنتي موفقة في اختيارك أم لا؟.
كتبت: شيماء عبدالباقي
