علمي ابنك تقبل الخسارة دون أن يعتاد الفشل
كتير من الأمهات والأباء بيعانوا من مشكلة عدم تقبل ابنهم للخسارة في أي شئ، واحنا كآباء لا ننكر أن نحب أن يكون أطفالنا دايما فايزين، لكن المفروض أننا نقاوم الرغبة دي وما نتعودش نتدخل في حياتهم خوف من أنهم يخسروا، وخيبة الأمل اللي ممكن يحسوا بيها بعد الخسارة.
فلو هنقدر ندخل في أمور حياتهم هم وصغيرين مش هنقدر لم يكبروا، ده غيرأنهم هيبقوا غير مؤهلين للتعامل مع الخسارة، ودايما عايزين يكونوا هم الفايزين، ومع بعض هنتعرف على طرق تقبل الخسارة عن الاطفال.
كيف اعلم طفلي تقبل الخسارة؟
كتير من الأطفال بيعانوا من مشكلة عدم تقبل الخسارة ومواجهة الفشل، وده اللي بيخليه يتصرف تصرفات بتضايق كل الناس اللي موجوده حواليه، وده بيكون بسبب أنه ما تعلمش إزاي يكون عنده تقبل للخسارة، ومن الحاجات المهم إنك تعرفيها أنه تعليمه الخسارة بيكون في سن صغير، وده علشان تترسخ جواه المبادئ والثوابت والقواعد الأساسية للنقطة دي، ومع بعض هنتعرف على أهم الطرق اللي هتساعدنا في تقبل الخسارة عند الأطفال، واللي منها:-
تعليمه تقبل الخسارة باللعب
قبل أن يكمل طفلك عمر سنتين من المهم إنك تبدأي تلعبي معاه، وده علشان يتعلم الخسارة والفوز، وازاي يكون متقبل لأي نتيجة.
وهتعلميه ده بإنك هتديله الفرصة أن يكون هو الفايز في البداية، حتى لو اضطريت إنك تعلمي ده عن قصد، لم هيشوفك هادية بالرغم من إنك خسرانه وفرحانه إنه هو اللي فاز هيحس إنه ده أمر طبيعي، والعكس صحيح، وفي الحالتين هيحاول يقلدك، فحاولي تكوني هادية وروحك رياضية في تقبل الخسارة.
امدحي طفلك واثني عليه ولكن بحدود
يعني مفيش مانع إنك تشكري ابنك وتمدحي فيه قدام الناس وقدامك لم يعمل حاجة حلوة، ده أمر طبيعي، ولكن خلي بالك إنه لازم يكون المدح والشكر ده بحدود، وده علشان لو طفلك اتعرض لخسارة في مرة تانية ما يحسش بالاحباط الشديد بسبب الخسارة دي، وده لأنه شايفك إنك بتمدحي فيه بشكل مبالغ فيه، وشايفة انه هو دايما لازم يكون هو الفايز.
وحاولي دايما تفكري ابنك أنه الفوز والخسارة دايما بتكون على حسب المجهود اللي عمله كل واحد، وأنه مش دايما بتنتهي بالفوز.
شجعيه لو خسر
من الحاجات للي بتخلي الطفل محبط وبتزيد عنده من تأنيب الضمير عنده هو إنه يشوف باباه ومامته حزنين لم يخسر، علشان كده من المهم إنك تأخدي بالك من الحتة دي، وتحاولي تتجنبيها، وإنك في المقابل تشجعي طفلك على المجهود اللي عمله حتى إن كان هو الخسران، أو إنه ما نجحش في تنفيذ المهمة المطلوبة منه.
يعني على سبيل المثال لو كنتي بتعلمي ابنك يبدأ يمشي لو وقع على الارض هو بيتعلم من الافضل إنك تصقفي ليه على المجهود اللي عمله علشان يتعلم، وتحاولي تشجعيه أنه يقوم ويكمل تاني، وده علشان يدرك أنه الخسارة مش نهاية العالم وأنه ممكن نحاول أكتر من مرة.
علميه أن الحزن بقدر محدود
ودي واحدة من اهم طرق تعليم الاطفال تقبل الخسارة، وده لأنه ما نقدرش أنه نمنع الطفل من إنه يحزن شوية بسبب خسارته في لعبة أو أي حاجة من هذا القبيل، لكن المهم إنك ما تسيبهوش يستمر لفترة طويلة في حزنه، وخليه يعمل أي حاجة تانية يقدر يعملها بشكل أفضل.
اجعليه يهنئ المنافس بالفوز
من أهم الحاجات اللي هتساعدك في إنه طفلك يتعلم تقبل الخسارة إنك تخليه يهنيْ الفايز بفوزه، وده ممكن تعليمه ليه من خلال إنك تخليه يشارك التصقيف للشخص الفايز في أي لعبة بتروحوا تحضروها سوا، وكده هيتعلم إنه الانجاز يستحق التحية من الآخرين.
تعليمه أن الخاسر ليس فاشل
كتير من الاباء والأمهات بيرسخوا في دماغ أطفالهم فكرة أن الخسران هو دايما الشخص الفاشل، وعلشان كده بنلاقي الطفل بيربط بين الخسارة والفشل بشكل تلقائي، علشان كده من المهم أنه نشيل الفكرة دي من دماغهم، وده من أنه نخليهم يتعلموا أنه الخسارة مش مهم وإنه الحاجة المهمة هو إنه نحاول في المرات الجاية أني نكسب ونحقق الربح.
كثرة الالعاب الجماعية
ودي حاجة من الحاجات المهمة في تعليم الاطفال تقبل الخسارة، وده لأنه كثرة اللعب في ألعاب جماعية بتعلمه أن الفوز مش بيكون في كل مرة، وإنه مرة بيكسب، ومرة بيخسر، وده بيخليه يتعود على شعور الخسارة، علشان كده بيكون شعور الخسارة بالنسبة ليه مش محزن ولا مؤلم.
عدم السماح لأحد باحباطه
من أكتر الحاجات اللي بتخلي الطفل غير متقبل للخسارة أنه منافسه الفايز يحاول يضايقه بأي كلمة، ودي حاجة منتشرة جدا بين الأطفال وتعتبر طبيعية بسبب عدم نضجهم بشكل كامل، وممكن تتغلبي على دي بإنه تتابعي طفلك أثناء لعبه، وماتسمحيش لأي حد يضايقه أو يحبطه، أو إنه حتى يستهزء بيه بسبب خسارته.
بكده نكون تعرفنا مع بعض على أهم طرق تعليم الاطفال تقبل الخسارة واللي منها إنك تلعبي معاه اللعب الجماعية كتيير علشان يعرف إنه في خسارة وفوز ومش كل مرة هيفوز، واللي هتخليه يتعود على شعور الخسارة، واللي كان منها برضو إنك ما تخليش حد يحبطه بسبب خسارته.
هنكون سعداء بيكي لو شاركتينا بتجربيتك في تعليمك لطفلك تقبل الخسارة
كتبت: شيماء عبدالباقي
