أسباب الغيرة وطرق علاجها
كتير من الآباء والأمهات بيعانوا من مشكلة الغيرة عند الاطفال، وخاصة لو كان عندهم أكتر من طفل في البيت وفي أعمار متقاربة، وده اللي بيخليهم دايما يدوروا عن طرق جديدة لعلاج المشكلة دي بعيد عن العصبية والضرب أو أي أسلوب عنيف.
لكن للأسف بسبب الخناق اللي عطول موجود بين الأولاد، وتفننهم في أساليب جديدة في الغيرة بيخرج الأب والأم عن السيطرة على نفسه واللي بالتأكيد هتزيد من المشكلة مش هتحلها، علشان كده في كوكب الأطفال هنتعرف مع بعض على أسباب الغيرة عند الاطفال، وطرق علاجها.
أسباب الغيرة عند الاطفال
في حاجات كتير ممكن تكون السبب في غيرة طفلك، واللي من المهم إنك تعرفيها علشان تتجنبيها، واللي منها:-
إنك تحسسي طفلك بأنه هو مركز الكون
وده لأنه في كتير من الأمهات بتغلط في أسلوب تربيه ولادها، زي مثلا الاهتمام المفرط بيه، واللي بيتسبب في نتايج عكسية لم تنشغلي عنه لأي سبب من الأسباب، زي أنه يجيله أخ جديد، فيبدأ طفلك يحس إنه كل الاهتمام اللي كنتي بتديهوله أخده أخوه الجديد، فيبدأ يغير.
ده غير أنه ممكن تتطور الغيرة عند طفلك للتعامل بشكل عنيف مع أخوه الجديد، زي أنه يضربه، أو يحاول يخضه، علشان كده من المهم إنك توازني في طريقة حبك لابنك حتى إن كان وحيد.
صعوبة التعبير عن مشاعرهم
كتير من الأطفال بتلاقي صعوبة في إني هي تعبر عن مشاعرها، خاصة لو أنتي كنتي اهملتي في إنك تعلمي طفلك التعبير عن مشاعره، فيبدأ يستخدم الغيرة كوسيلة للتعبير عن مشاعره.
شعور الطفل بالعجز
ودي حاجة من الحاجات المهمة اللي بتتسبب في الغيرة عند الاطفال، وده علشان في كتير من أطفالنا بيحس بالعجز في أنه يعمل كل حاجة هو عايزها، علشان كده بيحب أنه باباه ومامته يكونوا معاه دايما، ولم يبدأ الاب والأم غير قادرين على تلبيه كل طلباته بسبب طلبات أخواته التانين، خاصة لو كان في طفل أصغر منه في السن بتبدأ تظهر الغيرة دي، خصوصا لو كان فرق السن بين الاطفال مش كبير.
يعني مثلا ممكن تلاقي الاطفال قاعدين مع بعض وحاضنين بعض وهم بيتفرجوا على التلفزيون في جو أسري هادي مليان سعادة وحب، وفجاة وبسرعة تلاقيهم بيتخانقوا مع بعض على أبسط الأسباب، لكن في الغالب الغيرة بتكون مش موجودة في الأسر اللي بيكون في فرق كبير نسبيا في أعمار أطفالهم، وده لأنه الابن الكبير بيكون اتعود على أنه هو الأكبر، وأنه هو اللي لازم ياخد باله من أخواته.
أنواع الغيرة عند الاطفال
طبعا للغيرة أنواع، وبتختلف من طفل لطفل، يعني مفيش نوع غيرة ثابت عند كل الاطفال، واللي منها:-
غيرة الطفل من باباه أو مامته
كتير من الأطفال بتغير من باباه على مامته، وفي بعض الأحيان ممكن يحصل العكس، وطبعا أنتي كأم تعتبري أهم شخص في حياة ابنك، حتى أهم من باباه بالنسبة ليه، فلو لاحظ إنك بتهتمي بأي حد غيره مثلا زي باباه بيحس بأني ده تهديد ليه وده اللي بيثير مشاعر الغيرة عنده.
الغيرة من أخوه أو أخته الأصغر منه
من أول ما طفلك أتولد وهو حاسس أنه محور الاهتمام منك ومن باباه ومن العيله كلها، لكن أول ما بتخلفي طفل جديد بيحس أنه جزء كبير من الاهتمام اللي كان ليه راح للطفل الجديد، فيبدأ الطفل يغير من أخوه أو أخته الصغير، وبتظهر مشاعر الغيرة دي في شكل تصرفات عدوانية للطفل مكنش يعملها قبل كده، أو أنه كل شوية يبقى في مود مختلف من غير سبب، وممكن يوصل الأمر إنه يدخل طفلك في مرحلة اكتئاب لو اهملتي في علاج الموضوع.
علاج الغيرة عند الاطفال
في طرق كتير ممكن تساعدك في إنك تتغلبي على الغيرة الموجودة عند طفلك، واللي منها:-
حسسي ابنك بأهميته
من الحاجات المهمة واللي هتساعدك في إنك تتغلبي على مشكلة الغيرة الموجوده عند ابنك إنك تحسسيه بقيمته، وده هيكون بإنك بتمدحيه قدام الناس أو اصحابه وتتكلمي قدامهم عن الحاجات الحلوة اللي بيعملها، سواء كان نشاط، أورسمة حلوة رسمها، أو حتى إنه بيسمع كلامك.
الحاجات دي كلها هتعزز من ثقة نفس ابنك، وهتخليه دايما واثق من نفسه وإنه مميز من غير ما يقارن نفسه مع حد حتي لو كان موجود حواليه أطفال كتير في سنه.
تربية الطفل على بعض المبادئ الأساسية من الصغر
إنك تعلمي طفلك المبادئ الأساسية للتنشئة الصح من هو وصغير حاجة مهمة، واللي منها إنك تعلميه الكرم والتعاون وحب الناس واحترامهم وعدم التعدي على حقوق غيره كل المبادئ دي لم يتربي عليها من هو وصغير هتحد من مشاعر الغيرة عنده.
العدل بين الأبناء
ودي مشكلة كبيرة بيقع فيها كتير من الأمهات، وهي إنها مجرد إنها تنجب طفل جديد بتهمل الطفل الكبير، وده لأنها بتعتقد إنه كبير ومش محتاج رعاية، مع إنه العكس هو الصح إنه ممكن يحتاج رعاية أكتر وده لأنه حاسس بالغيرة من الطفل الجديد اللي جه وأخد مكانه من اهتمام وحب ورعاية، وعدم الاهتمام بيخلي مشاعر الغيرة تزيد كل يوم عن اليوم اللي قبله وبتظهر في شكل تصرفات عدوانية تجاه أخوه أو أخته الجديدة.
الابتعاد عن التمييز
ودي حاجة مهمة جدا من المهم إنك تاخدي بالك منها، يعني بلاش تميزي طفل من أطفالك عن باقي أخواته، يعني بلاش تتكلمي عن انجازات واحد منهم ومميزاته قدام باقي أخواته، خاصة لو أنتي عارفة إنه اللي عمله ما يقدرش حد من أخواته يعمله، وده لأني التمييز وإنك تتكلمي عن أهم مميزاته بيولد مشاعر الغيرة عند الأخوات.
الاستماع إلى احتياجات الطفل
وده من خلال إنك تهتمي بالكلام مع طفلك عن احتياجاته، وتحسسيه إنه الوقت ده ملكه وأنه متاح ليه أنه يقول على كل الحاجات اللي هو عايزها، ومن المهم إنك تمنحيه الاهتمام في الحاجة اللي بيحبها حتى لو أنتي حاسة إنه الأمر مش مهم.
يعني مثلا لو قالك إنه معاه ماتش كورة هو وصحابه بكره، هو وخارج الصبح للمدرسة ادعيله انه هو اللي يكسب، ولم يرجع أساليه عن المباراة، وحاولي تدعميه لو خسر، أو هنئيه بفوزه وفوز فريقه.
وحاولي إنك تلبي ليه كل المعقول من احتياجاته، وده علشان ما يحسش إنه احتياجاته مش مهمة بالنسبة لاحتياجات أخوه الجديد.
كده يكون تعرفنا على انواع الغيرة عند الاطفال، وأسبابها وطرق علاجها واللي منها إنك تحسسيه بأهميته، وتعدلي بينه وبين أخواته في المعاملة.
نتمنى تشاركينا بتجربتك مع ابنك في علاج مشكلة الغيرة .
كتبت: شيماء عبدالباقي
