أسباب وأعراض، وطرق علاج المغص عند الاطفال
طبعا كلنا نعرف مغص الاطفال ونسمع عنه، وده بسبب الألم اللي بيسببه المغص للطفل وبيخليه يبكي بطريقة غير طبيعية، وده بيخلي كتير من الأمهات تسهر مع طفلها بسبب المغص ده من غير ما تعرف هو ماله ولا ممكن تعمله أيه علشان يسكت.
وهنا هنتعرف مع بعض على علامات المغص عند الاطفال، وأسبابها، وإزاي تعالجيها في البيت بأسهل الطرق.
علامات تدل على إصابة الطفل بالمغص
في حاجات كتير ممكن تكون من علامات المغص عند الاطفال، واللي من أهمها انه نكون عارفين تاريخ البكاء بشكل تفصيلي عن الطفل، يعني مثلا أنتي بتكون على دراية كاملة بأكتر الاوقات اللي بيبكي فيها طفلك في الطبيعي، واللي غالبا بتكون قبل ما ينام، وفي ساعات الليل المتأخرة.
لكن لو خالف الطبيعي اللي متعود عليه في البكاء بيكون بسبب حاجة معينة، واللي غالبا بيكون سببها المغص، علشان كده من المهم إنك تكوني عارفة تاريخ بكاء طفلك بشكل تفصيلي، وده لأنه بيساعد كتير في تحديد درجة المغص، وإزاي ممكن نعالجها، وتاريخ البكاء بالنسبة لطفلك لازم يكون عارفة فيه النقط دي:-
توقيت البكاء
وده غالبا بيكون على مدار اليوم وبشكل غير طبيعي، وبتزيد شدة البكا باليل، وبيكون بشكل كبير في الستة أسابيع الأولى من عمر الطفل، ولكن بتبدا بعد كده بتخف بشكل تدريجي.
كمية البكاء
والحاجة اللي من المهم إنك تعرفيها إنه نوع جنس المولود ملهوش أي علاقة بكمية البكاء عند الاطفال، وأنه لو كان الطفل ممغوص سواء كانت بنت أو ولد هيبكي بشكل غير طبيعي.
وإنك تعملي مقارنة ببكاء طفلك في العادي وبين البكاء اللي حاسة أنه هو زايد في فترة معينة هيساعدك كتير في إنك تعرفي ابنك مغموص ولا لأ، وده لأنه لم يكون الطفل عنده مغص بيكون البكاء بصوت عالي جدا، وغالبا غير متوقف، ده غير أنه بيسبب خلل في الصوت عن الصوت الطبيعي لبكاء الطفل.
الأعراض الشائعة لمغص الطفل
فى أعراض كتير ممكن تظهر على الطفل واللي بتعتبر من علامات المغص عند الاطفال بشكل أكيد، واللي منها:-
- حدوث تشجؤ لطفلك، أو أنه يطلع غازات بشكل مستمر تعتبر من أكتر العلامات اللي بتعرفك أنه ابنك بيعاني من مغص، واللي غالبا بتحصل بسبب ابتلاع طفلك للهوا سواء هو وبيرضع، هو وبيبكي.
- لم يكون طفلك بيعاني من مغص بيبكي بشده، وهو بيبكي بتلاقيه قافل ايديه جامد، ده غير أنه بتلاقيه بيحاول يحرك رجليه ناحية بطنه.
- لم تلاحظي كمان ابنك لونه وشه احمر فاتح عند البكا، وفي لون أسود شاحب حوالين بقه دي بتبقى من الحاجات اللي بتعرفك أنه ابنك عنده مغص.
- من أكتر الحاجات اللي ممكن تعرفك أنه ابنك عنده مغص هو إنك تلاحظي أنه بطنه متورمه ومنتفخة، واللي غالبا بتكون بسبب بلع ابنك للهواء هو وبيرضع.
الفرق بين بكاء الاطفال العادي، والبكاء لم يكون الطفل عنده مغص
بين الكتير من الدكاترة أنه بكاء الاطفال لم يكون عندهم مغص بيكون أكتر حده، وانه الطفل مش من السهل أنه يهدا حتى لو أكلتيه أو عملتيله أي حاجة وده بيسبب ازعاج للأم والأب بسبب البكاء اللي على مدار اليوم، على غير البكاء العادي، واللي بتلاحظي فيه إنك مجرد ما تأكلي الطفل بيبدأ يهدا عن البكا أو إنه يلعب.
أسباب مغص الاطفال
اللي صرح به كتير من الدكاتره أنه مفيش سبب معين لإصابة الطفل بالمغص، وأنه مفيش حاجة تفسر أنه غالبا بيحصل من نهاية الشهر الاول للطفل، لكن في مجموعة من الاسباب اللي ممكن يكون ليها دور كبير في إصابة الطفل بالمغص، واللي منها:-
- أنه الجهاز الهضمي للطفل نموه مااكتملش.
- أنه مفيش توازن في البكتريا اللي موجودة في القناة الهضمية.
- أنه ممكن يكون الطفل عنده حساسية من اكل معين هي اللي بتسبب ليه المغص.
- وكمان ممكن يكون بسبب الصداع النصفي اللي بيصيب الاطفال بشكل مبكر.
طرق علاج المغص عند الاطفال
في أكتر من طريقة طبيعية ممكن من خلالها تعالجي المغص عند طفلك، واللي منها:-
البابونج واليانسون
ودول بيكون من خلال إنك بتغليهم كأنك بتغلي الشاي، وبعد ما تبرد بتدي منها لطلفلك بالمعلقة على مدار اليوم.
زيت البابونج وزيت اللوز
ودي بتعملي خليط من الزيتين، بحيث إنك تحطي 5 معالق من زيت البابونج العطري، ومعلقة واحدة من زيت اللوز، وتبدأي تحطي كمية مناسبة منها على بطن طفلك، وتدليكي كويس وبرفق.
اليانسون
وده بإنك بتغلي معلقة واحدة من اليانسون مع ربع لتر من الميه، وأول ما تبرد بتديها لابنك على أربع مرات.
اليانسون والنعناع
وده بنعمله زي ما بنعمل الشاي، وأول ما بيبرد تديه لابنك بالمعلقة.
كل الحاجات دي بتخفف من حدة المغض عند طفلك.
امتي ممكن أروح للدكتور لم يكون طفلي ممغوص
طبعا زي ما قولنا انه طبيعي انه ممكن طفلك يتصاب بالمغص في شهوره الأولي بعد الولادة، لكن اللي مش طبيعي واللي المفروض تروحي للدكتور وطلب استشارته لم طفلك يبقى عنده مغص ودرجة حرارته عالية بسبب المغص ده، كمان لو كان المغص مسبب ليه اسهال أو امساك لازم تروحي بيه للدكتور.
ومن الحالات اللي من المهم ولازم تلجأي فيها للدكتور أنه طفلك يفضل يعاني من المغص لأكتر من ستة شهور بعد ولادته.
كده بنكون تعرفنا على علامات المغص عند الاطفال واللي منها أنه يبكي بصوت عالي، وأسبابه واللي غالبا بتكون بسبب ابتلاع الطفل للهوا هو وبيرضع أو يبكي، وكمان عرفنا طرق العلاج الطبيعة اللي منها مغلي اليانسون، وأخيرا امتى ممكن تلجأي للدكتور واللي واحدة منهم انه طفلك ترتفع درجة حرارته.
ياريت لو شاركتينا بتجربتك لو عندك طرق مختلفة تدل الأم على مغص الطفل
كتبت: شيماء عبدالباقي
