علمي طفلك الألوان بهذه الطرق السبعة

أسهل الطرق لتعليم طفلك الالوان

تتساءل الكثير من الأمهات حول كيفية تعليم أطفالها الالوان، وذلك لانها تجد صعوبة في ذلك مثله مثل الكثير من الانشطة التي تحتار الام في كيفية تعليمها لطفلها.

وفي كوكب الاطفال قررنا أن نقدم لك اسهل الطرق التي يمكن من خلال لها تعليم طفلك الالوان.

طرق تعليم الاطفال الالوان

في طرق كتير ممكن تعلمي بيها طفلك الالوان، ودلوقتي هقولك على أسهل الطرق وأفضلها، واللي منها ممكن طفلك يتعلم الالوان بكل سهولة:-

طبق وجبة ملونة

يعني مثلا ممكن تقدمي لطفلك مجموعة من الخضروات في وجبة طعام له، وكل نوع من الخضار ممكن يسألك عليه هتقوليله اسم الخضار ولونه.

يعني مثلا لو سألك على الطماطم وقالك ايه دي؟، تقوليله دي طماطم حمراء، خبز بني، فلفل أحمر أو أخضر على حسب لونه، وهكذا.

• استخدمي الاغاني والقوافي

ودي واحدة من أسهل الطرق لتعليم الاطفال الالوان، وده لأنه الكثير من المتخصصين أثبتوا أنه الموسيقى بتأثر بشكل قوي على ادراك الطفل لأي حاجة.

فمثلا انتي ممكن تختاري مجموعة من الـ Dvd اللي بيكون متوفر عليها مجموعة من أغاني الاطفال، والصور المتحركة، وحاولي تختاري مجموعة حذابة يتشد لها طفلك وتأثر فيه.

يعني مثلا تختاري الاغاني اللي بتكون نهايتها زي بعض أو متشابهة ده بيسهل على طفلك كتير في تعليمه أي حاجة.

وممكن تستعيني بفيديو زي ده

قارن بين الاشياء المتطابقة

هتسأليني وتقوليله يعني ايه، هقولك يعني لم تعلمي طفلك الألوان في المقارنة بين شيئين مثلا، حاولي أنك تقارني نفس الشيئين بلونين مختلفين.

يعني مثلا لم تقارني بين كرتين واحدة صفراء والتانية حمراء هيكون أسهل بالنسبة لطفلك التعرف على الألوان من إنك تقارني مثلا بين كرة حمراء، وسترة صفراء.

وده بناء على كلام قاله احد المدرسين في مرحلة ما قبل المدرسة، واللي لاحظه أثناء تعليمه للأطفال الالوان بين أكثر من طفل.

الألعاب والالغاز

طبعا كلنا عارفين أني اللعب هو أكتر حاجة بيحبها الطفل، وأكتر حاجة ممكن يركز فيها، علشان كده ممكن تستخدمي الالعاب والالغاز اللي تساعد طفلك على تعليمه الالوان.

يعني مثلا ممكن تشتري لعبة بتتكون من مكعبات وكل لون مكعب مكتوب على اسم اللون بتاعه، وتطلبي من طفلك انه يجيبلك من بين الالوان اللون اللي بتطلبيه.

دفاتر الرسم

ودي واحدة من أفضل الطرق لتعليم الاطفال الالوان، ودي هتكون من خلال إنك ترسمي مجموعة من الاشياء اللي سهل إنك ترسميها، يعني مثلا ممكن ترسمي عربية، تفاحة، قلب قطة، وهكذا.

بعد كده هتقصي كل رسمة من الرسومات اللي انتي رسمتيها على شكلها، يعني القلب تقصيه على شكل قلب وهكذا، بعد كده هتلوني كل كذا رسمة بنفس اللون، وبعدين تجمعي كل الرسومات مع بعض وتطلبي من ابنك أنه يجمعلك كل الرسومات اللي بنفس اللون مع بعض.

بعد كده هتعرفي طفلك على لون كل مجموعة، وتطلبي منه أن يرسم نفس الرسمه في دفتر الرسم، بالطريقة دي اللون هيثبت في عقل طفلك.

تعليم الاطفال الالوان بالملابس اللمفضلة لديهم

يعني لو طفلك بيحب يلبس تيشرت معين وبنطلون معين من ملابسه، أو حذاء معين، عريه على كل لون قطعة هو بيحب يلبسها، وفي كل مرة يلبس الحاجة اللي بيحبها عرفيه لونها، ومع التكرار هيعرف اللون ومستحيل ينساه.

التركيز على الالوان الاساسية

يعني أهم حاجة ممكن تاخدي بالك منها لم تعلمي طفلك الالوان إنك تعلميه الالوان الاساسية، وبلاش تعلميه الالوان الصعبه والغير متعارف عليها على الاقل في البداية.

ومن اهم الالوان الاساسية اللي ممكن تعليمها لابنك في البداية ألوان إشارات المرور الاحمر والاصفر والاخضر.

السن المناسب لتعليم الاطفال الالوان

طبعا سؤال بيتردد كثير في أذهان أي أم، امتي أبدأ اعلم طفلي الالوان، وأكد الكثير من المتخصصين أنه يمكن تعليم الاطفال الالوان ف وقت باكر من عمرهم، وده لانه الاطفال بتعتمد على ذاكرتها القوية في الحاجات اللي بتشوفها واللي بتتعلمها.

ويعتبر أنسب عمر لتعليم الطفل الالوان بعد بلوغه العام الاول وما بين بلوغه العام الثاني، وأكد الخبراء أنه الطفل ممكن يتعلم الالوان بعد تعلمه للكلام مباشرة، ولكنه يحتاج إلى التكرار الكثير.

بكده حبيبتي أكون قولتلك على اهم الطرق واسهلها اللي ممكن تعلمي بها طفلك الالوان، لو عندك أي استفسار أو سؤال ممكن تسيبيه في الكومنتات وأنا هتابع وأرد عليكي

---

كتبت: شيماء عبدالباقي