أسنان الطفل – كيف نحافظ عليها ؟
ومتى يجب اللجوء للطبيب
فم الإنسان بيعتبر أرض خصبة لمختلف أنواع البكتيريا، وخاصة لو كان طفل، علشان كده دكاترة الأسنان بتنصح بغسل الأسنان بالمعجون مرتين في اليوم على الأقل، واستخدام الخيط الطبي في تنظيفها بشكل كويس.
لكن السؤال اللي بيتردد على أذهان كتير من الأمهات هو كيف اهتم بأسنان طفلي، ده غير أنه أكيد معجون الأسنان اللي بنستخدمه لا يناسب طفلي، علشان كده في كوكب الأطفال اهتمنا بمشاكلك والبحث عن حل ليها.
طريقة الاهتمام بصحة أسنان الطفل
من الحاجات المهم إنك تعرفيها كأم وبتهتم بصحة طفلها أن كتير من الدكاترة بينصح بالرضاعة الطبيعية للطفل، وخاصة في أول ست شهور من عمره، وده لأنها بيكون ليها دور كبير في الحفاظ على صحة أسنان طفلك، وده لأن لبن الأم بيمد الطفل بالكالسيوم اللي بيقوي الأسنان وبيحميها من التسوس.
وفي بداية تسنين طفلك ممكن تستخدمي قطعة من شاش أبيض وتمسحي بيها اللثة، بعد كده وأول ما يوصل طفلك لعمر الثلاث سنوات تبدأي تخليه يغسل بفرشة الأسنان والمعجون، ولازم يكون معجون مناسب للأطفال ممكن تشتريه من الصيدلية بعد ما تتأكدي من الدكتور أنه مناسب لطفلك.
هتبدأي تعلمي طفلك أنه يغسل أسنانه بالفرشاة والمعجون، بأنك تغسلي أسنانك أمامه وتطلبي منه إنه يقلدك، وخلي بالك من أنه يبلع المعجون أو يصيبه أي ضرر، علشان كده من الأفضل تقليل كمية المعجون اللي بيغسل بيها قدر المستطاع، كمان خليه يبصق المعجون قبل ما يغسل فمه، وده علشان تضمني أنه مش هيصيبه أي ضرر لا قدر الله.
متى وكيف يتعلم الطفل أن يأكل بمفرده ؟
ومن أهم الحاجات اللي هتساعدك في الحفاظ على نظافة أسنان طفلك هو إنك تهتمي بتغيير فرشة الأسنان الخاصة بيه كل شهرين أو تلاتة بحد أقصى، وكمان أحب اطمنك أن الفلورايد الموجود في معجون الأسنان ده آمن جدا على طفلك حسب تصريحات كتير من الدكاترة، وده لأنه بيكون بنسبة أقل من الموجودة في معجون الأسنان الخاص بالكبار، المهم إنك تكوني حريصة على إنك تختاري نوع معجون كويس لطفلك ومناسب لعمره.
متى يجب أن يرى الأطفال طبيب الأسنان؟
بعد أن تعرفنا على إجابة السؤال “كيف اهتم بأسنان طفلي؟”
مهم نعرف امتى لازم طفلك يزور دكتور الأسنان، واللي غالبا بتكون بعد ما يبلغ الطفل 3 سنين من عمره، والزيارة دي بيحاول الدكتور انه يعلم فيها طفلك ازاي يحافظ على أسنانه، وإزاي يقدر يستخدم فرشاة الأسنان ، وغالبا الزيارة دي بيتم تكرارها كل 6 شهور أو 12 شهر، وده لعمل فحوصات دورية لأسنان طفلك.
لكن في بعض الحالات لا تستدعي الانتظار ومهم إنك تروحي للدكتور في أسرع وقت، ومن الحالات دي شعور الطفل بأنه في ألم في أسنانه، أو إنك تلاحظي وجود ورم في اللثة، أو حدوث نزيف في اللثة بالرغم من أنه بيستخدم فرشاة أسنان ناعمة، أو أنه ابنك يتعرض لفقد أحد أسنانه الدائمة، كل الحالات دي بتكون من الحالات الضرورية للذهاب للدكتور للحفاظ على صحة أسنان طفلك.
نصائح هامة لتعليم الطفل تنظيف الأسنان
في كتير من الحاجات اللي ممكن تتبعيها في تعليم طفلك تنظيف أسنانه واللي منها إنك مثلا تسيبيه يختار فرشاة أسنانه واللي غالبا بتكون من خلال اختيار فرشاة بتكون على شكل ميكي ماوس أو أي حاجة من الشخصيات الكرتونية اللي بيحبها، كمان ممكن تخليه يشغل أغنية بيحبها هو وبيفرش أسنانه، ويستمر في غسيلها لحد ما تخلص الأغنية، وده بيكون كأداة لقياس وقت عملية تنظيف أسنانه.
ومن الحاجات اللي هتشجع طفلك أنه يهتم بتنظيف أسنانه إنك تكافئيه على اهتمامه، حتى ولو كان من خلال حاجة بسيطة، وكوني حريصة في إنك أنتي وبتكافئيه ما تقدميش ليه حاجة حلوة، وممكن تقدمي ليه حاجة مفيدة زي بعض شرائح التفاح أو أي نوع فاكهة بيحبه.
بعض الأطعمة التي قد تضر بأسنان الطفل
في أطعمة كتير هتساعدك على الحفاظ على صحة أسنان طفلك، زي الفاكهة والخضروات، وشرب الحليب، وغيرها كتير من الأطعمة المفيدة، ومن ناحية تانية في أكيد بعض الأطعم اللي ممكن تكون سبب رئيسي في تسوس أسنان طفلك، واللي منها:-
- العصائر اللي بيكون فيها نسبة سكريات عالية.
- والبسكويت.
- والزبيب.
- والعسل.
- والكراميل.
- الحلوى.
- المشروبات الغازية.
والحاجة الجميلة واللي مهم إنك تاخدي بالك منها هو إنه تنوعي في الأطعمة اللي بتديها لابنك، وده لأنها هتفيده بشكل عام في صحة جسمه وأسنانه، وبلاش تكوني زي بعض الأمهات اللي بيدور في دماغها أنه لسه بدري على اهتمامها بأسنان ابنها الصغير، ولكن الاهتمام في عمر مبكر لطفلك هيساعده أنه يكون عنده أسنان قوية وصحية، وهتستمر معاه لأطول فترة ممكنة.
كده يكون انتهينا من موضوع مقالنا، كيف اهتم بأسنان طفلي.
لو في طريقة جديدة نفذتيها مع ابنك علشان تحافظي على أسنانه ياريت تعرفينا بيها.
كتبت: شيماء عبدالباقي
