أسباب القلق عند الاطفال، وأعراضه، وطرق علاجه
إن طفلك يشعر بالقلق لم تخليه في بيئة جديدة زي لم بتتنقلوا على بيت جديد، أو عند دخوله المدرسة لأول مرة كل ده أمر طبيعي، وبيزول بعد فترة بسيطة من الوقت ويكون تأقلم مع البيئة الجديدة وكل ما فيها من أفراد ونظام.
لكن لم يستمر القلق ده معاه لفترة طويلة، ويتحول لردود أفعال غير طبيعية، ويتداخل مع الأنشطة اليومية اللي بيمارسها طفلك كده بيتحول القلق اللي عنده من قلق طبيعي إلى القلق المرضي عند الاطفال، وده بيكون ليه مجموعة من الأسباب والاعراض وكمان طرق لعلاجه، هنتعرف عليها مع بعض.
القلق عند الاطفال
زي ما وضحتلك فوق إنه القلق أمر طبيعي عند الاطفال، لكن في بعض التصرفات لو ظهرت على طفلك بتنبهك أنه القلق اللي بيعاني منه طفلك غير طبيعي، وغير اللي موجود عند كل الأطفال اللي في سنه، زي أنه يظهر عنده بشكل مفاجئ نوبات من الخوف الشديد تجاه شئ معين.
والنوع ده من القلق بيبدأ في سن مبكر عند الأطفال، أو ممكن يظهر في سن المراهقة، ويستمر حتى سن البلوغ، وممكن تقدري تسيطري على النوع ده من القلق من خلال الكشف المبكر له.
أسباب القلق المرضي لدى الأطفال
طبعا مفيش حاجة يتحصل من غير سبب، علشان كده القلق الغير طبيعي عند الأطفال ليه مجموعة من الأسباب واللي منها:-
- عوامل وراثية
بعض الأطفال بيكون القلق عندهم بسبب وراثي، يعني ممكن ي، وده لان الطفل بكون ورثه منك أو من باباه، وده لأنه الجنين بيرث الجينات من الوالدين.
- عوامل بيولوجية
وده سبب من الأسباب الرئيسية في حدوث القلق المرضي عند الاطفال، وخاصة لو حصل خلل في كيمياء الدماغ، وخاصة لو كان الأمر متعلق بالدوبامين، والسيروتونين، وهما عبارة عن ناقلان عصبيان، وهم المسؤلين عن التحكم في الطريقة اللي بيشعر بيها الإنسان، ومن ثم بيبدأ يتكون شعور القلق، وده بيحصل لم بيكون النقص في العنصرين دول خارج عن السيطرة .
- عوامل الأسرة
في بعض الأسر بتكون مليانة بالتوتر والقلق بشكل شبه مستمر، وده بيأثر على الطفل خاصة في وقت نشأته، وبيخلي الطفل يتوراث هذا القلق، والموضوع مش بينتهي عند النقطة دي، وده لأنه طريقة تعامل الأسرة مع القلق والخوف اللي بيعاني منه الطفل بطريقة معينة بتساهم بطريقة مباشرة في إصابة الطفل بالقلق، علشان كده مهم إنك توفري لابنك بيئة هادية.
- عوامل بيئية
في حاجات ممكن يتعرض ليها الطفل في البيئة اللي بيعيش فيها بتكون بالنسبة ليه عبارة عن تجارب مؤلمة، زي مثلا لا قدر الله إنك تنفصلي أنتي وباباه ، أو حدوث وفاة لحد قريب منه، أو إصابته بمرض شديد، أو تعرضه لمشاهدة عنف في أسرتكم، كل الحاجات دي بيكون ليها دور كبير في إني طفلك يعاني من اضطراب في القلق ويتحول القلق عنده من قلق طبيعي لقلق غير طبيعي.
أعراض اضطراب القلق عند الأطفال
في مجموعة من الأعراض اللي ممكن تظهر على طفلك، واللي بتوضحلك أنه بيعاني من قلق غير طبيعي، واللي منها:-
- التبول اللاإرادي.
- هتلاحظي عنده صعوبة في التركيز.
- بيكون بيعاني من نوبات من الغضب والعدوان.
- بيعاني من صعوبة في النوم، أو هتلاحظي أنه بيصحى بشكل متكرر في الليل نتيجة أنه بيحلم أحلام بتضايقه.
- بيرفض أنه يروح المدرسة.
- كثير البكاء.
- بيقطم في ضوافره.
- بيعمل مشاكل كتير في المدرسة مع زمايله.
- وجود أفكار سلبيه عنده.
- هتلاحظي أنه بيعاني من مشاكل في التنفس.
أنواع القلق عند الأطفال
في خمس أنواع للقلق عند الأطفال، واللي هي:-
- القلق العام
وده عبارة عن قلق بشكل عام وبيكون مستمر، وبيكون بشكل متكرر تجاه الأنشطة اليومية أو المشكلات البسيطة اللي تواجهنا في يومنا.
- قلق الانفصال
وده بيكون قلق مفرط بسبب خوف الطفل من انفصال باباه ومامته عن بعض، وعلى الأغلب النوع ده بيختفي عند طفلك بمجرد أن يكمل 3 أو أربع سنين.
وده واحد من أكتر أنواع القلق اللي كتير من الأمهات بتتجاهله، وده من منطلق الخجل عند الاطفال شئ عادي، ودي حاجة لازم تاخدي بالك منها وما توقعيش فيها، وهو نوع من أقل أنواع القلق انتشار بين الاطفال، وهتلاقي طفلك بيكتفي بالكلام معاكي أو مع أي حد من زمايله بس، من غير ما يحاول يتكلم مع حد تاني، وده من أهم أعراض هذا النوع واللي بتيزيد مع الوقت عند الاطفال.
- الرهاب المحدد
وده نوع من القلق اللي ممكن يكون عند طفلك، وبيكون بسبب شئ معين وبيحاول يتفاداه، سواء كانت عاصفة رعدية أو بركة سباحة، او الخوف من حشرة معينة.
- الرهاب الجماعي
وده واحد من أهم أنواع القلق اللي ممكن يتعرض ليها طفلك، وبيكون عبارة عن خوف طفلك من من المشاركة في المواقف الاجتماعية، وبيكون عنده شعور بالحرج من نظرة الناس ليه.
طرق علاج القلق المرضي عند الاطفال
هنا بيتم اللجوء إلى أحد المتدربين لتشخيص القلق من خلال معالج مدرب من خلال جلسات متعددة مع طفلك أنتي وباباه، واللي بيتم فيها طرح مجموعة من الأسئلة عن امتى بيحصل القلق، وأيه هي المخاوف اللي عند طفلك وبتسبب ليه القلق ده.
وبيتم اختيار طريقة علاج القلق عند طفلك بناء على عمره، وأسباب الخوف، وبيكون العلاج من خلال واحدة من طريقتين:-
- العلاج السلوكي المعرفي
هو واحد من أنواع العلاج الحديثة للقلق عند الاطفال، واللي بتساعده على السيطرة على القلق اللي عنده، والقدرة على التغلب على مخاوفه والتحكم في تصرفاته.
- الأدوية
وبيتم اللجوء ليها بعد أن يتم فشل العلاج من خلال الكلام، أو تكون الحالة شديدة.
مجموعة من النصائح لتخلص طفلك من القلق
في مجموعة من النصائح اللي لو حاولتي اتباعها هيكون ليها دور فعال في تخلص طفلك من القلق اللي عنده، واللي منها،
- ساعدي طفلك أن يتخذ قرارات حتى ولو صغيرة.
- التزمي بجميع الجلسات اللي مع المدرب المعالج لطفلك.
- تعزيز ثقته بنفسه.
- تشجيع طفلك بشكل مستمر ومدحه وده علشان يتغلب على مخاوفه.
كده انتهينا من مقالنا القلق المرضي عند الاطفال، وتعرفنا على أهم أسبابه واللي منها ما هو بيولوجي، ووراثي، وعوامل أسرة، وعوامل بيئية، وتعرفنا على أنواعه واللي منها القلق العام، وقلق الانفصال، والصمت الانتقائي، وكمان عرفنا أهم طرق العلاج واللي منها العلاج السلوكي المعرفي، والأدوية.
لو في طريقة استخدمتيها في علاج النوع من ده عند طفلك وكانت فعالة هنكون سعداء لو شاركتينا بيها في كوكب الاطفال
كتبت شيماء عبدالباقي
