أفضل 6 طرق لعلاج السلوكيات الخاطئة للأطفال
كتير من الأمهات بتعاني من مشكلة بعض السلوكيات الخاطئة اللي بيعملها طفلها، واللي بتسبب غضبها بسهولة جدا بسبب أنها بتقوم بكتير من التحذيرات أنه ميكررش التصرفات دي وبيرجع يعملها تاني، لكن اللي من المهم إنك تعرفيه أن صفة التحدي وعدم سماع الكلام بيكون سلوك طبيعي عند معظم الاطفال.
علشان كده لو حاولتي تصبري شوية وتقدمي لطفلك النصيحة في هدوء وإنه ما يكررش التصرفات الخاطئة هتقدري تتغلبي على المشكلة دي، ولأنه في كوكب الأطفال يهمنا نساعدك في أي مشكلة تواجهيها مع طفلك هنقدم ليكي أهم طرق علاج السلوكيات الخاطئة للأطفال، فلنتابع سويا.
ما هي طرق علاج السلوك الخاطئ للطفل؟
في طرق كتير ممكن تتعلميها وتحاولي إنك تتبعيها في علاج التصرفات الغلط اللي بيكررها طفلك، لكن في طرق منها سهلة ومهمة وضحتها لينا الدكتورة هيذر ماغواير ودي دكتورة متخصصة في علم النفس، واللي أكدت على أنه من المهم على الأب والأم عند علاج السلوكيات الغلط عند أطفالهم أنه ما يأخدوش تحدي أطفالهم ليهم على محمل شخصي وأنه مش بيسمع الكلام.
ده غير أنه من المهم أنه نمنح ولادنا قدر كافي من الحرية والقوة، وكمان اختيار أسلوب العقاب اللي هم يختاروا لم يعملوا حاجة غلط، ودلوقتي هنتعرف مع بعض على أهم طرق علاج السلوكيات الخاطئة للأطفال:-
كافئ السلوك الايجابي
ودي واحدة من الطرق الفعالة في علاج السلوكيات الخاطئة للأطفال، ودي بتكون من خلال إنك تركزي على السلوكيات الايجابية اللي بيعملها طفلك بدلا من التركيز على السلوك الغلط، كمان امدحي كل سلوك كويس بيعمله، يعني مثلا لم تلاقي طفلك بيعمل واجباته المدرسية امدحيه واثني عليه، وكافئيه ولو بحاجة بسيطة مثلا زي قطعة شيكولاته بيحبها.
تجنبي العقاب على السلوك السئ
كتير من الأمهات بتلجأ لأسلوب العقاب لم طفلها بيعمل تصرف غلط، وده بيخلي الطفل بيدخل في حالة من العناد وبيكرر نفس الفعل مرة تانية، علشان كده من المهم إنك تركزي على طفلك مش على السلوك اللي بيقوم بيه، يعني تحاولي تحافظي على نبرة الصوت هادية، رغم أنه تعتبر المهمة دي واحدة من المهام الصعبة على كتير من الآباء والأمهات لكن من المهم إنك تسيطري على نفسك.
يعني مثلا لو شوفتي ابنك بيلون على الحيط بلاش تزعقي وتقوليلي (لأ، أو توقف) بصوت عالي وعنيف، لكن ممكن تقوليله الحيط ما ينفعش نرسم عليها، ممكن نرسم على الورق الأبيض، أو على السبورة البيضا، وخلي في بالك دايما إن الحاجة اللي هتوجهي تركيز ابنك عليها هي اللي هتحصلي عليها.
اختاري المعركة التي تخوضيها مع طفلك
ودي ممكن تكون من خلال ابنك بيطلب منك حاجة معينة في وقت غير مناسب، يعني مثلا لو ابنك طلب منك التابلت على العشاء، وأنتي رفضتي، هتلاقي ابنك بدأ يصرخ ويعيط، وده علشان يستفزك بأي شكل وفي النهاية تنفذي اللي هو عايزه.
في الحالة دي ممكن تتحول المعركة اللي بينك وبين طفلك إلى تيار مستمر من اللاءات والأوامر والنواهي، وده بيخلي ابنك يعمل كتير من التصرفات اللي مش هتعجبك واحد ورا واحد، وده علشان في النهاية يوصل للي هو عايزه.
علشان كده من المهم إنك تختاري المعارك اللي ممكن تخوضيها مع ابنك، يعني لو زي ما ذكرنا فوق أنه بيطلب التابلت على العشاء لو كان ده بيعيق من تناول وجبة العشاء له أو أنه وقت العشا ده وقت مميز بالنسبة للأسرة من الضروري إنك تصري على رأيك وترفضي طلبه.
لكن لو كان الأمر غير كده وإنه كل اللي بيقعد على العشا بيكون معاه الموبايل بتاعه ويفضل يبص فيه فهنا من الأفضل إنك تستجيبي لطلب ابنك.
التدخلات المسبقة
ودي بتساعد كتير في تقليل وقوع التصرفات الغلط اللي ممكن ابنك يعملها، وده بيكون من خلال إنك تعرفي ابنك بشكل مسبق بالأنشطة اللي هيعملها ووقت النوم بتاعه، وتحاولي تذكريه بده بشكل مستمر، التدخلات المسبقة دي هتساعده إنه ينتقل من الأنشطة اللي بيحبها إلى الأنشطة اللي مش بيحبها أو بمعنى أصح اللي أقل حب ليها بكل سهولة، واللي هتقلل من نسبة السلوكيات الغلط.
تعليمات فعالة
الحاجة اللي لازم تتأكدي منها أن عدم سماع أولادك ليكي ده بيكون عن قصد، وده بيكون بسبب تركيزهم الشديد في اللعب، وخاصة لو كانت اللعب ده من خلال الالعاب اللي بتكون موجودة على الهواتف، أو على التابلت، علشان كده بيكون مطلوب منك إنك تقدمي النصايح والتوجيهات لأطفالك بشكل مختلف.
يعني مثلا لو هتطلبي حاجة معينة من ابنك أو بنتك وهو بيلعب بلاش تنادي عليه ولكن الفتي نظره ليكي قبل الكلام، زي مثلا إنك تحطي أيدك على كتفه وتتأكدي أنه التفت ليكي وبعدين تقولي الكلام اللي أنتي عايزه تقوليه.
عرض خيارات محددة
ودي طريقة من أفضل الطرق في علاج السلوكيات الخاطئة، وإنك تعرضي على طفلك أكتر من خيار بيحسسه إنه عند بعض الحرية والسيطرة على الموقف، يعني مثلا بلاش لم تيجي تطلبي منه يلبس هدومه تقوليله حابب تلبس هدومك دلوقتي؟، وده لأنه الطفل هيقول لأ بشكل تلقائي، لكن ممكن تعرضي عليه الفكرة بطريقة تانية وهي حابب تلبس التيشرت اللي لونه أصفر ولا اللي لونه أحمر.
كده يكون تعرفنا مع بعض على طرق علاج السلوكيات الخاطئة للأطفال واللي منها مكافئة السلوك الايجابي، وعرض خيارات متعددة، وتعليمات فعالة، والتدخلات المسبقة، وتجنب العقاب على السلوك السئ.
لو عندك اقتراح في أنه إزاي ممكن نمي ولادنا من السلوكبات الخاطئة ياريت تشاركينا بيه.
كتبت: شيماء عبدالباقي
