أهم المهارات اللي لازم تعلميها لطفلك علشان يعرف يدافع عن نفسه
كتير من الأمهات بتنصح أطفالها بنصيحة (اللي يضربك اضربه)، وده لأنهم بيعتقدوا بالطريقة دي بيعلموا أطفالهم إزاي يكونوا شجعان ويدافعوا عن نفسهم بكل قوة من زمايلهم في المدرسة اللي بيضربوهم أو من أقرانهم في النادي أو في أي مكان تاني، وبكده بيكون من وجهة نظرها أنه ابنها قوي وقادر على حماية نفسه.
لكن الحاجة اللي كتير منهم بيغفل عنها أنه هل الاسلوب ده هيطلع طفل سوي وشجاع بالفعل؟
وايه اللي ممكن اعمله علشان فعلا يدافع عن نفسه بطريقة صح، وفي كوكب الاطفال هنقولك على طرق تعليم الاطفال الدفاع عن النفس، واللي هنتعرف عليها مع بعض في المقال ده.
ازاي اعلم ابني يدافع عن نفسه
في أساليب كتير ممكن ننفذها في تعليم الاطفال الدفاع عن النفس، والحاجة اللي من المهم إنك تعرفيها إنه طريقة تربيتك لابنك بتأثر بشكل مباشر في سلوكياته وتصرفاته وشخصيته، وكمان في طريقة تعامله مع المواقف اللي بيمر بيها في الحياة، علشان كده من المهم إنك تاخدي بالك من كل حاجة بتعمليها قدامه ودلوقتي هنتعرف مع بعض على بعض الحاجات المهمة منها:-
عززي من ثقة طفلك بنفسه
وتعتبر دي واحدة من أهم الطرق في تعليم الاطفال الدفاع عن النفس، وده لانه الطفل اللي بيعتدي على زمايله دايما بيحاول يدور على زميله اللي ثقته في نفسه معدومة أوعلى الاقل مزعزعة، وده بيبان من انه طفلك ما بيكونش عنده ثقة في نفسه لم بيتكلم مع حد، وكلامه بيظهر في شكل متقطع وبصوت واطي.
علشان كده الاطفال دول بيكونوا فريسة سهلة لزميلهم اللي بيحاول يعتدي على حد منهم، وممكن تعززي من ثقة طفلك بنفسه إنه تخليه دايما يعبر عن رأيه من غير ما يخاف من حد ما دام بيتكلم بأدب، ودايما اديله مساحة من النقاش معاكي في أي حاجة يحب يتكلم فيها.
كمان إنك تخليه يعبر عن مشاعره بكل حرية من غير ما يخاف من حد ويقول بيحب ايه ويكره ايه من غير ما نفرض عليه حاجة هو مش بيحبها لمجرد أنه أنتي شايفاها هي الافضل بالنسبة ليه، اديله كمان مساحة من الحرية في الحاجات المتعلقة بيه، وأنه ياخد قرارته بنفسه في الأمور اللي تخصه.
نمي المهارات الاجتماعيه عند طفلك
وده لأنه في الغالب الطفل اللي بيقع فريسة للضرب من زمايله هو الطفل اللي معندوش صحاب، وبيحب يقعد لوحده في أوقات كتير، وبيتجنب إنه يختلط مع زمايله أو الناس اللي موجودين في حياته بأي شكل من الاشكال.
من الحاجات اللي ممكن تنمي التواصل الاجتماعي عند طفلك إنك تاخديه النادي مثلا في يوم الاجازة وتحاولي تقربيه من زمايله هناك وأنه يجرب اللعب معاهم، أو إنك تاخديه معاكي عند قرايبك اللي عندهم ولاد في نفس سن ابنك، وهناك لم توصلي خليه يلعب معاهم.
اتكلمي معاه عن خصوصية جسمه
وده هيكون من خلال إنك توضحيله في حدود في التعامل مع لناس التانية ومساحات مسموح بيها، ونفس الأمر معاه أنه في حدود لتعامل الناس معاه، وأنه من حق يعترض عن أي حاجة حد يعملها معاه ومتعجبوش، وأنه يعبر عن مشاعره بكل حرية من ناحية تقبله للتصرفات دي أو عدم موافقته عليها.
يعني مثلا لو كنتي بتتبعي مع ابنك أسلوب العقاب بالضرب، حاولي تعرفي إزاي يحاول يدافع عن جسده، واللي هيكون من خلال رد فعله عن التصرف اللي أنتي عملتيه.
وكمان شوف ردي فعله هيكون ايه لم تحاولي تجبريه على أنه يحضن أو يبوس حد بالعافية، كل الحاجات دي هتعلمه أنه في خصوصية للجسد، وفي حاجات مسموح بيها، وحاجات لا يمكن نتخطاها.
علميه أساسيات الدفاع عن النفس
ودي من خلال إنك تعرفيه أنه لازم يرد بقوة على أي حد ممكن يحاول يضربه أو يعتدي عليه، ولازم يعرف اللي قدامه أنه لا يمكن يقبل بده، لأنه غالبا الطفل المعتدي بيرجع لم يحس إنه اللي هيعتدي عليه واثق من نفسه وقوي.
وممكن تدربيه في البيت على أنه إزاي ممكن يصد الضربات اللي ممكن أي حد يواجهها ليه من غير ما يأذي الشخص التاني ولا يضربه.
شاركيه في بعض الانشطة الرياضية
من الحاجات المهمة في تعليم الاطفال الدفاع عن النفس هو أنه تسيبيه يختار الالعاب اللي يحبها من ألعاب القوى والدفاع عن النفس، وده مش بس علشان يتعلم إزاي يدافع عن نفسه، ولكن علشان حاجة مهمة لتحسين صحته البدنية والنفسية، ومن المهم إنك تشاركيه في الألعاب دي وتلعبي معاه.
كده يكون تعرفنا مع بعض على طرق تعليم الاطفال الدفاع عن النفس، واللي منها إنك تعرفيه أنه في خصوصيه لجسده، وإنك تساعديه على تقوية ثقته بنفسه.
لو عندك أي فكرة جديدة ممكن طبقها في الموضوع ياريت لو تشاركينا بيها في كوكب الاطفال.
كتبت: شيماء عبدالباقي
