إزاي اغرس في نفس طفلي القناعة والرضا
طبعا القناعة هي الثروة الحقيقة اللي بتفضل مع الانسان طول عمره، وتعليمها لأطفالنا حاجة مهمة وضرورية، وده لأنه في ناس كتير بالرغم من أنها عندها فلوس كتير ، ومعاهم حاجات كتير من سبل الراحة في الحياة لكن بيفتقدوا نعمة القناعة والرضا باللي معاهم.
وهنا بيجي سؤال على بال كتييير من الأمهات وهو تعليم الاطفال القناعة يكون إزاي؟
وهنا هجاوبك على السؤال ده بشكل واضح في السطور الجاية.
ايه هي طرق تعليم الاطفال القناعة
بتحتاري أنا وأنتي إزاي نعلم ولادنا القناعة والرضا، على الرغم أنه في حاجات كتير ممكن نعملها تسهل علينا الحته دي لكن احنا مش واخدين بالنا منها، تعالي نتعرف عليها سوا.
إبدأي بنفسك
وده طبعا لأنه احنا بنكون قدوة لولادنا في كل حاجة بنعملها سواء كانت الحاجة دي حلوة أو وحشة، وده لأنهم بيقلدونا وهم مش مدركين الحاجة دي، يعني لو أنت باين قدام طفلك فرحان هو بيكون فرحان وبيقلدك، وممكن تعلمي طفلك ده إزاي؟، من إنك تخلي بالك من تصرفاته قدامه.
يعني مثلا لو خرجتوا مرة في خروجة عائلية أنتي وباباه لم تشتروا حاجة حاولوا تكون قليلة، وده لأن هيكون انطباع عنده أنه كل حاجة ليها حدود، وأنه الموضوع مش عشوائي.
لو ابنك طلب منك إنك تشتريله كذا نوع عصير فهميه أنه ما ينفعش يختار غير نوع واحد زي ما عملتي أنتي وباباه، مع التكرار هيفهم أنه كل حاجة بحساب.
التدريب على الامتنان والشكر
ودي واحدة من أهم الحاجات اللي هتساعدنا في تعليم الاطفال القناعة، وده لأنه اظهار الشكر والشعور بالراحة النفسية للحاجات الحلوة اللي بتحصل في حياتنا اليومية بيعلمنا القناعة، وكمان بيبعد أي تفكير عنا بالحاجات اللي ناقصة في حياتنا، وهنا من المهم أنه تعلمي طفلك أنه يشكر ربنا على كل حاجة حلوة بتحصل في حياته حتى لو كانت بسيطة.
يعني مثلا لو رب الاسرة خرجكم في يوم الاجازة الاسبوعية لازم نعلمه يشكر باباه أنه خرجه، ونفهمه أنه في ناس كتير ممكن ما تخرجش في الاجازة بتاعتها.
المكافآت الصغيره
وده بأنك تحتفلي أنتي وزوجك قدام ابنك بالحاجات الصغيرة، يعني بلاش تخلي الاحتفال مقتصر على الاحداث الكبيرة بس، وده لأنه هيعكس شعور بالقناعة والرضا عند ابنك بأي حاجة حلوة تحصله في حياته حتى لو كانت صغيرة.
يعني مثلا ممكن أنتي تجيبله هدية ولو بسيطة لأنه حصل على درجة حلوة في اختبار الشهر بتاع المدرسة.
منح الآخرين
من أهم الحاجات اللي بتساعدنا في غرس الرضا والقناعة في أولادنا إنك تعلمي ابنك أنه يدي الناس التانية، وده لانه العطاء بيخلي شعور الرضا والقناعة عند الطفل قوي، وبيبدأ يدركه واحدة واحدة كل ما بيكبر.
يعني على سبيل المثال عودي ابنك على أنه يشارك زمايله بالألعاب اللي بتشتريهاله، وكمان الاكل اللي ممكن تديهلوله هو ورايح المدرسة، وده لأنه الحاجات دي بتعلم ابنك إزاي يكون قنوع وراضي، وكمان بتعلمه العطف والحب للناس التانية.
علميه قيمة المال اللي بيصرفه
ودي واحدة من أهم الطرق اللي بتساعدنا زي نعلمه أطفالنا يكونوا راضين وعندهم قناعة في الحياة، وده هيكون بأنك تعرفيه بتمن الحاجات اللي بتشرتريهاله، وبيشريها باباه، وأنه قد ايه باباه بيتعب علشان يجيب الفلوس اللي بيشتريله بيها الحاجات اللي بيجيبها ليه.
وممكن تعرفي مدى صعوبة أن يجيب فلوس أنه تطلبي منه يعمل حاجة في البيت بسيطه مقابل إنك تديله مبلغ بسيط، ساعتها هيحس هو قد ايه تعب علشان يقدر ياخد الفلوس اللي قولتيله عليها.
ومن الحاجات المهمة اللي ممكن تعلم طفلك القناعة أنك تحكيله حواديت ليها علاقة بالقناعة واللي دايما بتكون نهايتها حلوة لأي طفل قنوع، ونهاية وحشة لأي طفل طماع وعنيد وعايز كل حاجة ليه لوحده.
بلاش المقارنة
ودي من الحاجات المهمة اللي ممكن نقع فيها قدام ولادنا من غير ما ناخد بالنا، واللي طبعا بيكون ليها نتايج سلبيه على ابنك في تعليمه القناعة والرضا، وهو إنك تقارني حياتك بحياة أي حد من أهلك أو اقاريبك، أو إنك تقارني طفلك بأي حد من زمايلة سواء كان في شكله، وفي مستواه الدراسي في المدرسة.
كل الحاجات دي بتسبب في نتايج عكسية من غير ما تاخدي بالك، يعني مثلا بلاش تقولي لجوزك صحبتي فلانة راحت مصيف هي وجوزها وعيالها مش زينا قاعدين في البيت.
أو إنك تقولي لابنك أنا عايزاك تبقى زي صاحبك يوسف وتجيب نفس الدرجات اللي بيجيبها في الامتحان.
كده أكون عرفنا بعض بعض الحاجات المهمة اللي تساعدنا في تعليم الاطفال القناعة، واللي من أهمها إنه تعلمي طفلك الامتنان والشكر لكل حاجة حلوة بتحصل في حياته، وأنه بلاش كمان تقارنيه بأي حد من زمايله.
لو في فكره جديد استخدمتيها في تعليم طفلك الفناعة ياريت تشاركينا بيها.
كتبت: شيماء عبدالباقي
