7 أفكار مميزة لتشجيع الطلاب في الفصل على التفاعل
في العصر الحالي، أصبح من الصعب تحفيز أولادنا على التعليم واكتساب المعرفة بالأساليب التقليدية التي اعتدنا عليها. لذا، إذا لم يكن لدى الطالب دافع داخلي للتعلم، فلن يتمكن أبدًا من تحقيق المستوى التعليمي الذي يرغب به والديه أو معلمه.
لهذا السبب، يلعب المعلم دورًا حيويًا في البحث عن طرق إبداعية تساعد الطفل على امتلاك دافع للتعلم. والأم الناجحة هي التي تسعى دائمًا لاكتشاف أساليب جديدة لتطوير نفسها، حتى تكون قادرة على تعليم ابنها كيفية تنمية دافع شخصي للتعلم. في هذا المقال، سنتعرف معًا على بعض الطرق البسيطة لتشجيع الطفل على المشاركة في الفصل.
أسهل الافكار لتشجيع الطلاب في الفصل
في كتير من الطرق اللي ممكن تتبعيها علشان تساعدي ابنك ان يشارك في الفصل، واللي منها:-
خلق بيئة آمنة
ودي تعتبر واحدة من أهم طرق تشجيع الطفل للمشاركة في الفصل، وده لأنه في كتير من أطفالنا بيكون حابين أنهم يشاركوا في الفصل، لكن دايما عندهم شعور بالخوف أنه ممكن يكون اجاباتهم غلط، أو أنه يكون خايف من المدرس، الحاجات دي كلها بتأدي لنتايج لا يحمد عقباها.
علشان كده من المهم أنه يكون المدرس في الفصل متفهم للأمور دي، ويقدم الدعم النفسي لطلابه، ويشجعهم دايما على المشاركة لمستمرة، حتى لو كانت إجابات الطالب خطأ بشكل متكرر، يشجعه على المشاركة وأنه أكيد في مرة هيوصل للمرحلة اللي اجابته تكون فيها صح ومن غير ما يكون خايف من الفشل أو أي حاجة تانية.
تغيير فضاء التعلم
طبعا أنت كمدرس لازم تكون مدرك أنه عمره طلابك ما هيقدروا يحققوا النجاح ويكونوا قادرين على المشاركة معاك في الفصل أنت وقاعد على المكتب ومن غير ما تدور على طرق جديدة تحفزهم على المشاركة في الفصل، وده لأنه الطالب دايما بيحتاج لتجديد.
أنا شخصيا أتذكر أنه لم كنت في المرحلة الابتدائية كنت بفرح جدا لم نغير مكان الفصل وناخد الحصة في مكان تاني، زي المعمل، أو حتى في أوضة الحاسب الآلي ونتفرج على حاجة جديدة لها علاقة بدراستنا، وأكيد أنت لو عملت كده هيكون طلابك مبسوطين وهيحفزهم أكتر للمشاكة في الفصل، وده لأنه الطلاب بيحتاجوا للتجديد بشكل متكرر، يعني ممكن تاخدهم لمكتبة المدرسة وتقوموا بعملية بحث جماعي عن موضوع معين.
خلق جو من المنافسة الشريفة بين الطلاب
أن المدرس يحاول يخلق جو من المنافسة الشريفة بشكل تربوي بين طلابه ده بيكون له دور كبير في تشجيع كل طلاب الفصل على المشاركة، وده ممكن يكون من خلال ممارسة بعض الأنشطة التعليمية الجماعية، أو من خلال بعض التطبيقات التعليمية.
تحسيس الطالب بالمسؤلية
ومن الافكار لتشجيع الطلاب في الفصل أنت دورك كمعلم أن تدرك أن المتعلمين من حقهم أنهم يختاروا طريقة التعليم الخاصة بيهم، وأنه تسيب ليهم حرية الاختيار في الواجبات المنزلية اللي المفروض يعملوها، بلاش أنت اللي تقوم بتحديد كل حاجة، وحسسهم دايما أنهم لهم حرية اختيار ده.
تقديم مكافآت بسيطة
ودي تعتبر واحدة من أهم طرق تشجيع الطفل للمشاركة في الفصل، والجميل في الموضوع أنها مش هتحتاج منك ميزانية كبيرة، وده لأنه ممكن تقدم ليه قلم جميل، أو حتى علبة شيكولاتة، المدح والثناء على الطفل من أهم الحاجات اللي بتساعده وتحفزه على أنه يشارك في الصف، المهم أنك توصل للطفل الفخر والسعاده بيه بحصوله على الهدية، وإنك بتشجع باقي الطلاب على أنه يكونوا زيه.
التعرف على الطلاب
والمقصود هنا مش إنك تعرف اسم كل طالب، بالرغم أنها من أمر ضروري بلا شك، ولكن المقصود هنا إنك تعرف هوايات كل طالب، أيه الحاجات اللي بيحبها، وإيه الحاجات اللي بيكرهها، كل الحاجات دي بتمنح الطفل الثقة بنفسه وبتأثر بشكل ايجابي على سلوكياته داخل الفصل، ومن ثم عملية تعليمه.
الحوار والنقاش
ودي من الحاجات المهمة اللي تعتبر افكار لتشجيع الطلاب في الفصل على المشاركة، وده لأنه من خلال النقاش بنقدر نوصل لنقاط الضعف والخلل الموجودة عند كل طفل، واللي بتمنعه من أنه يشارك في الصف، وده لأنه الوصول ليها والبحث عن حل لتجاوزها بيساهم بشكل كبير في منح الطفل احساس بالأمل والنجاح.
كده يكون تعرفنا على أهم الطرق لتشجيع الطفل للمشاركة في الفصل، واللي منها تقديم المكافآت البسيطة، وتغيير فضاء التعلم، والتعرف على الطلاب، والمشاركة والحوار، واحساس الطالب بالمسؤلية، وخلق بيئة آمنة.
لو عندك طريقة بتستخدمها في تشجيع الاطفال على المشاركة في الفصل ياريت تشاركنا بيها.
