أسهل الطرق لتعويد الطفل على أن ينام في سريره
كثير من الأمهات بتعاني من مشكلة نوم ابنها معاها في نفس الأوضة حتى بعد ما كبر وينفع أن ينام في أوضة لوحده، وللأسف ده بيكون لأسباب كتير واللي من أهمها اهمال الأم لحل هذه المشكلة.
علشان كده في كوكب الأطفال هنقولك على أهم الطرق اللي هتساعدك في تعليم الطفل النوم بمفرده، واللي هنتعرف عليها مع بعض.
أسهل الطرق لتعليم الطفل النوم بمفرده
في طرق كتير ممكن تساعدك على تعليم طفلك النوم لوحده في أوضته، واللي منها:-
اختاري الوقت المناسب لتنفيذ المهمة
من الحاجات المهمة اللي لازم تخليها في بالك أنه تعليم الطفل النوم بمفرده يحتاج منك إنك تختاري وقت مناسب، يعني بلاش تحاولي تعلمي طفلك إنه ينام في أوضته لوحده، في نفس الوقت اللي بتبدأي تعلميه يدخل الحمام لوحده، أو إنك بتستعدي لاستقبال طفل جديد فإنتي عايزة تعودي ده بأي شكل إنه ينام في أوضته لوحده لأنه في حد هيجي ياخد مكانه.
اتكلمي مع ابنك على مدار اليوم عن توقعاتك على نومه لوحده في غرفته
خلال اليوم حاولي تتكلمي مع ابنك اكتر من مرة عن نومه لوحده في أوضته وعلى سريره الجميل، وأنه كل واحد ليه سرير لازم ينام فيه، وإنه بابا وماما ليهم سرير بيناموا فيه، وهو كمان ليه سرير جميل لازم ينام فيه ويتعود عليه، وعرفيه أنه هو قد ايه بيسمع كلام ماما وهيتعلم ينام لوحده.
شاركي طفلك في عمل البوم لقصص قبل النوم
ومش مقصود من كده أنك تعملي كتاب متقن بشكل فني لقصص الاطفال، ولكن هي مجرد وسيلة بيرتبط بيها الطفل، وبتلجأي ليها لم تدخلي مع طفلك في فراش النوم.
كملي روتين اليوم لدخول الطفل السرير
واللي منها إنك تعملي كوباية لبن دافي لابنك يشربها قبل ما ينام، وبعدها يغسل أسنانه بالفرشة والمعجون، وتحكيله حدوتة قبل النوم، وتغطيه بالغطا اللي بيحبه، ويهدي الاضاءة.
هيئي لنفسك للمواجهة لاعتراض طفلك على النوم في سريره والبكاء
من الحاجات اللي ممكن تتعرضي ليها لم ابنك ينام في سريره إنك بعد ما تنوميه وتبدأي تتسحبي علشان انتي كمان تنامي في سريرك إنه يصحى مرة تانية ويبكي، وإنه مش عايز ينام في السرير لوحده، اللي من المهم إنك تعمليه في الموقف ده إنك ما تستسلميش لرغبته مهما كان الامر.
نامي مع طفلك في غرفته
في الفترة اللي بتبدأي تعودي فيها طفلك أنه ينام فر أوضته لوحده نامي على السرير اللي جمبه، وده علشان يحس بالأمان ويحس إنه في حد جميه، وأنه مش نايم لوحده في أوضته.
اجلسي في غرفة طفلك حتى ينام
بلاش تستمري في وضع إنك تنامي على السرير اللي جمبه، وده لأنها مرحلة انتقاليه، يعني بعد كده اتعودي بعد ماتنومي طفلك في سريره، وتخلصي الروتين اليومي لم قبل النوم زي شرب اللبن وغسل الأسنان، وإنك تحكيله حدوته قبل النوم، اقعدي على أي كرسي موجود في الأوضة وبلاش تنامي، ولو حاول ابنك يكلمك التزمي الصمت،ولو استمر في الكلام سيبي الأوضة لحد ما يهدأ ويسكت.
في الصبح راجعي اللي حصل مع ابنك في تعويده على النوم لوحده
ودي واحدة من اهم طرق تعليم الطفل النوم بمفرده، وده لأنه لو كانت الليله مضنية ومتعبه في تعليم طفلك أنه ينام لوحده بتبدأي تعيدي عليه توقعاتك في أنه ينام لوحده، وإنك كنتي متخيله أنه هيقدر ينام لوحده وتشجعيه على ده.
أم لو كانت الليله مرضية بالنسبة ليكي ونام طفلك لوحده ما تتردييش إنك تكافئية على ده، وده علشان ما يفكرش في مرة أنه هو يرجع ينام معاكم في السرير.
لا تعودي للوراء
لم تبدأي تعودي طفلك أنه ينام لوحده وبدأت فعلا في ده بلاش تاخدي خطوة لورا، زي إنك مثلا ترجعيه ينام لحضنك مرة تانية، حتى لو كان هو تعبان، في الحالة دي روحي أنتي واقعدي معاه في أوضته، وده لأنه هيخلي الطفل يحب النوم معاكم بعد ما اتعود أنه ينام لوحده.
نصائح ذهبيه تساعدك في تعليم طفلك النوم لوحده
في حاجات كتير ممكن لو اتباعنا بعض منها هتساعدنا في تعليم الطفل النوم بمفرده، واللي منها:-
- احضني طفلك كتير على مدار اليوم، وما تخليش الحاجة دي ومشاعر الحب والحنان والعطف مقتصره على أوقات النوم، وده علشان طفلك ما يتأثرش بيها ويربطها بميعاد نومه، ويرفض أنه ينام لوحده بعد كده.
- تدرجي في تعليم طفلك أنه ينام لوحده، يعني مثلا في البدايه عوديه على أنه ينام في سرير منفصل عن سريرك أنتي وباباه، وده لانه تعتبر الخطوة دي بمثابة خطوة تمهيدية في تعليمه أنه ينام لوحده.
- قبل الذهاب للنوم حممي طفلك بماء دافي، وده لانه بيساعده على الاسترخاء وأنه ينام بسرعة.
- كوني حريصة على معرفة الحاجات اللي بيخاف منها طفلك في أوضته، واللي بالطبع هتتغلبي عليها وتتخلصي منها.
- خلي في إضاء هادية في الأوضة لم طفلك ينام لوحده، وده علشان يحس بالأمان لحد ما يتعود ينام لوحده، وينتقل بالتدريج شيئا فشيئا.
- بلاش توبخي طفلك لم يقوم من سريره ويجي عندك في أوضتك، وحاولي تحتويه وترجعيه بهدوء لسريره.
كده يكون تعرفنا مع بعض على أهم الخطوات اللي هتساعدك في تعليم الطفل النوم بمفرده، واللي بتبدأ بإنك تختاري الوقت المناسب اللي تعلميه النوم لوحده، وبتنتهي بإنك ما ترجعيش خطوة لورا بعد ما تقدمتي تحت أي ظرف، وكمان عرفنا مع بعض أهم النصايح اللي هتساعدنا في تنفيذ ده.
لو عندك أي تعليق أو سؤال سيبيه في كومنت وهنتابع التعليقات وهنرد على حضرتك.
كتبت: شيماء عبدالباقي
شكرا جزيلا لكم