11 من الخبايا من أجل تحقيق مذاكرة أفضل لطفلك
تبحث كل أم عن أفضل الطرق اللي ممكن تساعدها في تحفيز أطفالها للمذاكرة والتفوق، والحصول على أعلى الدرجات، خاصة أنه في الفترة الأخيرة أصبحت المناهج التعليمية صعبة، وبتتطور بشكل كبير، وطبعا مش كل الأطفال واحد، فيمكن أن يكون طفلك من الأطفال الذين منحهم الله حب المذاكرة فهو يؤدي ذلك على أفضل وجه دون جهد منك، وقد يكون من هؤلاء الأطفال الذين يحتاجوا إلى مساعدة أمهاتهم وآبائهم في المذاكرة.
ولأننا في كوكب الأطفال دايما بنهتم بيكي وبمشاكلك والوصول إلى أفضل الحلول اللي ترضيكي هنتعرف من خلال المقال ده على بعض الطرق تشجيع طفلك على المذاكرة.
كيف يمكنك تحفيز طفلك على المذاكرة
في كتير من الطرق اللي ممكن تساعدك في تحفيز طفلك على المذاكرة، واللي منها:-
اجعلي طفلك يدرك أن طريقة دراسته مهمة
وممكن توضحي ليه النقطة دي من إنك تاخديه معاكي في زيارة لطالب مجتهد في مذاكرته، وخليه يسأله أيه السبب اللي بيخليه يذاكر كتير، وحاولي تحكيله عن أيام طفولتك، وقد أيه كانت المذاكرة صعبة وممتعة في نفس الوقت.
إبدأي من سن صغير
بمجرد أن طفلك يبدأ يتعلم أي حاجة من أنواع التعلم لازم تعرفيه أنه من المهم أنه يوازن وقته، بمعني أنه في وقت للمذاكرة أو أي حاجة هو بيتعلمها، وبين اللعب، أو أنه يتفرج على التلفزيون، وعوديه أنه المذاكرة والمدرسة وعمل الواجب المدرسي كل الأمور دي مقدمة على أي حاجة تانية.
بلاش تجبري طفلك على المذاكرة
ودي واحدة من أهم طرق تشجيع طفلك على المذاكرة، وده لأنك حاولتي تجبريه أن يذاكر بالاكراه ده ممكن يتحول إلى نتيجة عكسية، ويكره الدراسة ككل، ولكن لو حاولتي اقناع بشكل هادي ولطيف ممكن أن يستجيب لكي وتحققي ما تودينه، يعني مثلا لو قولتليه حاسة أنه من الأفضل إنك دلوقتي تروح تذاكر، غير لم تأمريه أمر وتقوليله بصراخ يالا روح ذاكر دلوقتي.
كوني قدورة حسنة
يعني خلي طفلك يشوفك وأنتي قاعدة وبتخلصي أي حاجة من شغلك، أو لو كنتي مرأة غير عاملة قعدي معاه وأنتي مثلا بتخططي لميزانية الشهر أو تظاهري إنك بتقومي بشئ مهم، وخصصي كل يوم ساعة تقضيها معاه هو بيذاكر، كل الأمور دي هتساعد طفلك على أنه يذاكر بشكل قوي وفعال.
امنحي أطفالك قسط من الراحة أثناء المذاكرة
من المهم إنك توازني بين وقت المذاكرة وبين إنك تخصصي لأطفالك وقت من الراحة، وده لأنه المذاكرة بشكل متواصل للأطفال في السن ده، ولمدة أكتر من 20 دقيقة من غير ما يأخدوا فترة من الراحة ممكن يكون ليه تأثير سلبي سواء على المذاكرة أو حياتهم الاجتماعية.
والعكس صحيح لو منحتيهم كل 20 دقيقة من المذاكرة 20 دقيقة من الراحة واللعب والمرح هتساعدهم الطريقة دي على تحصيلهم للمذاكرة بشكل أفضل، والحاجة اللي من المهم إنك تاخدي بالك منها إنك ما تسيبيش طفلك يقعد كل فترات الراحة على التليفون أو جهاز الكمبويتر، وده علشان عينه ترتاح بشكل مناسب من التركيز اللي بيجهدها.
ضعي نظام المكافآة
ودي من الطرق تشجيع طفلك على المذاكرة، وده من خلال اتفاقك معاه أنه لو انجز دروسه على اكمل وجه، هتخليه يشاهد التفلزيون نص ساعة زيادة، أو إنك هتزودي مصروفه، والعكس صحيح.
عرفي طفلك الأهداف من الدراسة
وده لأنه في كتير من الأطفال بيظنوا أنه مفيش هدف أو مغزي من الدراسة، لكن لو فهمتي طفلك أنه الدراسة بهدف، وأنه حصوله على درجات عالية هو اللي هيخليه قادر على أنه يدخل أفضل الكليات اللي ممكن تأهله إلى أن يكون دكتور أو مهندس أو أي حاجة هو بيحبها هتساعده أنه يذاكر بشكل أفضل.
علمي طفلك أنه يتعلم لا أن يذاكر فقط
من المهم إنك تشجعي طفلك أنه كل يوم يتعلم معلومة حتى ولو بسيطة، وده لأنه كل المذاكرة اللي بيذاكرها مش هيكون ليها أي معنى لو لم يفهم ويتعلم ما يذاكره، وده هيكون من خلال إنك تاخدي ابنك معاكي في مكان عام يكون قادر على اثارة فكره وذهنه، زي مثلا إنك تأخديه حديقة الحيوان، المكان ده هيثير ذهنه بشكل كبير، وهيفضل يتكلم عليه لفترة، الطريقة دي أو أي حاجة تشبهه هتساعده أن يتعلم ويحب التعلم.
قللي من مصادر التشتت عند طفلك
ودي من أهم طرق تشجيع طفلك على المذاكرة، وهو إنك توفري ليه الجو المناسب اللي يساعده على المذاكرة، زي إنك تطفلي التلفزيون هو وبيذاكر، وإنك تأخدي منه جهاز الأيباد أو التليفون علشان تتأكدي أنه مش هيلعب بيه أثناء المذاكرة، وممكن تفصلي النت بشكل عام أثناء وقت المذاكرة.
تعرفي على أفضل الطرق لتعلم طفلك
ودي لأنها هتساعده على أنه يذاكر ويتفوق، وده بأنك تعرفي أيه الطريقة المناسبة ليه في المذاكرة والتعلم، واللي هتخليه مشارك للمعلومة، فعلى سبيل المثال جربي معه أن يقرأ شيئا تعلمه بصوت عالي أمامك، بعد كده كرري عليه اللي قاله، وده لأنه التكرار بيخلي تذكر المعلومات أسهل وأبسط.
حاولي دايما أنك تفهمي أيه هي البيئة اللي ممكن تخليه يذاكر بشكل أفضل، يعني مثلا هيذاكر أفصل لم يكون الأكل جمبه ولم يكون بعيد، لم يقعد على المكتب، ولا لم يذاكر على الكنبة.
الاستعانة بمدرس خصوصي
كتير من المدرسين بينصحوا بالاستعانة بالمدرس بشكل خصوصي للطفل، فلو ميزانيتك المادية تسمح بده ما تترديش لحظة فإنك تستعيني بمدرس لطفلك، علشان يقدر يحقق مذاكرة وتعلم أفضل.
كده يكون تعرفنا مع بعض على أفضل بعض طرق تشجيع طفلك على المذاكرة، واللي منها إنك تكوني قدوة لطفلك، وإنك تبدأي تعلميه المذاكرة في سن صغير، وتكافئيه على انجاز دروسه، وتستعيني بمدرس خصوصي، وتتعرفي على نوع البيئة اللي طفلك بيقدر يحقق فيها أفضل مذاكرة.
لو ليكي أي تجارب سابقة ساعدتك على أنه طفلك يحقق مذاكرة أفضل ياريت تشاركينا بيها في كوكب الاطفال.
كتبت: شيماء عبدالباقي
