تدريب الطفل على الهدوء بطرق رائعة وبدون عقاب
كتير من الأمهات بتعاني من مشكلة الحركة الكتير والازعاج اللي بيعمله طفلها، ده غير إنه بيسبب لها الارهاق، وطبعا مفيش أم مش بتحلم إنه يكون عندها طفل هادي ما يسببش أي مشكلة ليها جوا البيت أو برة، علشان كده من المهم إنك تعلميه إنه يكون هادي جوا البيت، علشان يكون هادي برة
وطبعا مش معني كده إنك تقيدي حرية ابنك في اللعب، وده لأنه الطفل بيكون محتاج ده أووي في فترة الطفولة، وده لأنه النمو الحركي مهم جدا للطفل مع النمو العقلي والعاطفي بالنسبة ليه، لكن في كتير من الأحيان بنحتاج لهدوء الطفل، خاطة في الأماكن اللي بيكون فيها انتظار زي العيادات، أو في أحد الزيارات زي زيارة حد من قرايبنا.
علشان كده هنتعرف مع بعض على طريق تعويد الطفل على الهدوء.
خطوات تدريب الطفل على الهدوء داخل المنزل
طبعا في حاجات كتير ممكن تساعدنا في تعودي الطفل على الهدوء، وزي ما قولنا فوق إنه من المهم إنك تعلميه الهدوء داخل البيت الأول علشان يقدر يطبقه برا البيت، والطرق دي منها:-
طوري قدرة طفلك على الجلوس
وده هيكون من إنك تعودي طفلك يقعد أكبر قدر ممكن من غير ما يتحرك، وهتستخدمي بعض الأساليب اللي هتخليه يقدر يعمل ده بشكل تدريجي، يعني مثلا في البداية خلي طفلك يقعد في حضنك وغني ليه أغنية، بعد أن يتعود على الوضع ده، استخدمي نفس الأسلوب ولكن خلي طفلك يقعد على كرسي بدل من إنك تخديه في حضنك.
اقعدي جمبه، واستمري في التحدي، وده مثلا بإنك تحكيله حدوتة حلوة، وحاولي خليه يتفاعل معاكي، يعني مثلا أساليه بعض الأسئلة اللي ليها علاقة بالصور اللي موجودة في القصة.
استمري على هذه التمارين لفترة، وكل مرة زودي فترة جلوس ابنك على الكرسي، مرة بعد مرة هتلاقيه اتعود أنه يقعد لفترة طويلة من غير ما يتحرك.
شجعي ابنك على ممارسة الانشطة الفنية
ودي واحدة من أهم طرق تدريب الطفل على الهدوء، واللي فيها هتلعبي مع طفلك وشجعيه أنه يلعب معاكي الألعاب اللي مفيهاش نشاط بدني، زي مثلا إنك تطلبي منه أنه يلون الصور قبل ما يعمل أي حاجة تانية، أو إنكم تلعبوا مع بعض لعبة الفوازير والالغاز، والالعاب دي بتنشط وتطور المهارات عند الطفل، زي تقوية الذاكرة، وقدرته على أنه يقعد أطول وقت ممكن من غير ما يتحرك.
استخدمي وجبات الطعام كممارسة
من المهم إنك تعلمي طفلك أنه الجلوس على السفرة علشان ناكل لازم يكون بهدوء، وأنه الجري أو اللعب في الوقت ده مش مسموح بيه، وممكن تشجعيه على الحاجات دي بوعده بهدية لو نفذ ده وسمع كلامك.
بعض النصائح المهمة لتعليم طفلك الهدوء خارج المنزل
في كتير من النصايح اللي ممكن ننفذها في تعليم اطفالنا الهدوء برا البيت، واللي منها:-
- فهمي طفلك أنه خارجين برا البيت وأنه مهم أنه يقعد هادي، يعني مثلا لو هو رايح يحلق شعره، فهميه أنه مهم أن يقعد ساكت علشان شعره ما يبوظش هو وبيحلقه الحلاق، وانه يقعد هادي ويتفرج في المرايه على قصة شعره، وممكن تساعديه أنه يعمل كده بأنه تشغلي ليه الاغاني اللي بيحبها.
- بلاش تسيبي ابنك يتفرج على التلفزيون او يشوف الفيديوهات الموجوده على التليفونات كتير، وده بحجة أنه قاعد هادي، وده لأنها في الحقيقة بتعلمه العنف مش الهدوء.
- فهميه إزاي نتصرف مع الناس اللي موجوده في البيت وأنه الأمر مش عشوائي، وده لأنه لو اهملتي في التعامل معا في كيفية التصرف جوا البيت مش هيقدر يكون هادي برا.
- علميه أنه لم يكون غضبان من حاجة يدخل أوضته ويقعد شوية مع نفسه لحد ما يهدا.
- علمي طفلك بعض التقنيات اللي تساعده على التحكم في غضبه وإزاي ممكن تهدي جسمه ونفسه، زي أنه ممكن ياخد نفس عميق، أو أنه يمارس المشي بطريقة سريعة.
بكده يكون تعرفنا مع بعض على الطرق المهمة في تدريب الطفل على الهدوء، واللي منها هنطور من مهارات الجلوس لأطول فترة ممكنه ليه، ونمارس معاه الانشطة اللي مش بتحتاج لنشاط بدني زي الالغاز.
هنكون سعداء لو شاركتينا بتجربتك في كيفية تدريب طفلك على أنه يكون هادئ.
كتبت: شيماء عبدالباقي
